រដ្ឋមន្ត្រីក្រសួងបរិស្ថានចាត់ឱ្យមន្ត្រីជំនាញចុះស៊ើបអង្កេតមន្ត្រី២រូប ករណីសង្ស័យបានទារលុយពីក្រុមហ៊ុនមួយនៅខេត្តកំពង់ស្ពឺ

16 ម៉ោងមុន

ដោយ៖ វិចិត្រ

រដ្ឋមន្ត្រីក្រសួងបរិស្ថាន ឯកឧត្តម អ៊ាង សុផល្លែត បានចាត់តាំងឱ្យមន្ត្រីជំនាញរបស់ក្រសួងចុះធ្វើការស៊ើបអង្កេតលើមន្ត្រីនៃមន្ទីរបរិស្ថានខេត្តកំពង់ស្ពឺ២រូបដែលសង្ស័យថាមានជាប់ពាក់ព័ន្ធនឹងការទារលុយពីរោងចក្រកែច្នៃដំណាប់ស្វាយមួយកន្លែងក្នុងខេត្តកំពង់ស្ពឺ។ ការណ៍នេះធ្វើឡើង បន្ទាប់ពីមានការផ្សព្វផ្សាយថា មន្ត្រីនៃមន្ទីរបរិស្ថានខេត្តកំពង់ស្ពឺ ចំនួន២រូបបានទាមទារលុយពីរោងចក្រ ១៥០០ដុល្លារ ជាថ្នូរនឹងការធ្វើរបាយការណ៍ វាយតម្លៃមិនល្អលើការងារគ្រប់គ្រងសំណល់រឹង រាវ ក្នុងរោងចក្រ ប៉ុន្តែក្រោយមក បានព្រមព្រៀងគ្នាត្រឹម ៦០០ដុល្លារ។

បើតាមការឱ្យដឹងរបស់ក្រសួងបរិស្ថាន ក្រោយមានការចាត់តាំង នៅថ្ងៃទី៦ ខែមីនា ឆ្នាំ២០២៦ មន្ត្រីជំនាញ បានចុះទៅដល់ទីតាំងរោងចក្រកែឆ្នៃដំណាប់ស្វាយខ្នាតតូចមួយកន្លែង ឈ្មោះ ហុង ចេងហ្វាង ដែលមានទីតាំងនៅក្នុងភូមិខ្នងក្រាំង ឃុំតាំងសំរោង ស្រុកភ្នំស្រួច ខេត្តកំពង់ស្ពឺ ដោយបានជួបតំណាងក្រុមហ៊ុន ជាជនជាតិចិន និងអ្នកបកប្រែចំនួន២នាក់ និងបានសាកសួរ ដើម្បីស្វែងរកការពិត និងរកភាពស្អាតស្អំជូនភាគីម្ចាស់ក្រុមហ៊ុន ក៏ដូចជាភាគីមន្ត្រីនៃមន្ទីរបរិស្ថាន។

ក្នុងករណីនេះរដ្ឋមន្ត្រីបរិស្ថានបញ្ជាក់ឱ្យដឹងថា ក្រសួងបរិស្ថាននឹងមិនទុកឱ្យករណីនេះចប់ ដោយមិនដឹងខុសត្រូវ ហើយមិនមានអ្នកទទួលខុសត្រូវនោះទេ ហើយក្រសួងបរិស្ថាន មិនអនុញ្ញាតឱ្យមន្ត្រីប្រព្រឹត្តអំពើខុសឆ្គងនោះទេ។ លោកបន្ថែមថា មន្ត្រីប្រព្រឹត្តខុស នឹងទទួលខុសត្រូវ តែបើមិនបានប្រព្រឹត្តខុសទេ នឹងទទួលបានយុត្តិធម៌៕