ដោយ៖ វិចិត្រ

កម្ពុជាឈនមុខគេនៅក្នុងថាមពលកកើតឡើងវិញ និងបានប្តេជ្ញាចិត្តយ៉ាងមុតមាំ ចំពោះកិច្ចព្រមព្រៀងទីក្រុងប៉ារីស តាមរយៈផែនការ NDC 3.0 ក្នុងការកាត់បន្ថយការបញ្ចេញឧស្ម័នឱ្យបា​ន ៥៥% នៅឆ្នាំ២០៣៥។ ការបញ្ជាក់ពីការប្តេជ្ញាចិត្តនេះ ធ្វើឡើងនៅក្នុងជំនួបសម្តែងការគួរសមជាមួយកញ្ញា Tzeporah Berman ស្ថាបនិក និងជាប្រធានសន្ធិសញ្ញាមិនរីកសាយភាយ ឧស្ម័នឥន្ធនៈហ្វូស៊ីល (FFNPT) នាព្រឹកថ្ងៃទី១៨ ខែមីនា ឆ្នាំ២០២៦ នៅទីស្តីការក្រសួង​បរិ​ស្ថា​ន។

ស្ថាបនិកសន្ធិសញ្ញាមិនរីកសាយភាយឧស្ម័នឥន្ធនៈហ្វូស៊ីល(FFNPT) កញ្ញាTzeporah Berman បានកោតសរសើរ​កម្ពុជាចំពោះភាពស្អាត ភាពបៃតង និងចីរភាព ដែលយុទ្ធសាស្រ្ត​នេះ បានបង្ហាញពីការ​អនុវត្ត​ជាក់ស្តែងមិនមែនត្រឹមតែជាទ្រឹស្ដីទេ។ កញ្ញាថា ដូចនេះ ពិភព​លោកគួររៀន​សូត្រតាមកម្ពុជា។

ជាមួយគ្នានេះដែរ កញ្ញា Tzeporah Berman បានស្នើឱ្យកម្ពុជាគាំទ្រ និងយល់ព្រមជាគោល​ការណ៍ ក្នុងការធ្វើជាម្ចាស់ផ្ទះសន្និសីទអន្តរជាតិលើកទី៣ ស្ដីពីការបញ្ឈប់ឥន្ធនៈហ្វូស៊ីល (The 3rd conference on fossil fuel phase-out) ដែលគ្រោងនឹងប្រារព្ធឡើងនៅដើមឆ្នាំ២០២៧ ឬ ២០២៨ ដើម្បីបង្ហាញពីភាពដឹកនាំរបស់កម្ពុជាក្នុងតំបន់អាស៊ី នៃសន្ធិសញ្ញាមិនរីកសាយភាយ​ឥន្ធនៈហ្វូស៊ីល ដែលជាយន្តការបំពេញបន្ថែមដល់កិច្ចព្រមព្រៀងទីក្រុងប៉ារីស ដើម្បីផ្ដល់ការ​គាំទ្រផ្នែកហិរញ្ញវត្ថុ និងបច្ចេកវិទ្យាដល់ប្រទេស ដែលកំពុងអភិវឌ្ឍដូចជាកម្ពុជាដែរ។

ស្របជាមួយគ្នានេះ ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន បានគាំទ្រ និងលើក​ឡើង​ពីយន្តការរបស់កម្ពុជាឆ្លើយតបនឹងសន្ធិសញ្ញាមិនរីកសាយភាយឥន្ធនៈហ្វូស៊ីល ដោយមាន​   ថា​ម​ព​លកកើតឡើងវិញ។

បើតាមរដ្ឋមន្ត្រីក្រសួងបរិស្ថាន បច្ចុប្បន្នកម្ពុជាជាប់ចំណាត់ថ្នាក់លេខ២ ក្នុងអាស៊ានលើផ្នែក ថាមពលកកើតឡើងវិញ និងគ្រោងបង្កើនសមាមាត្រថាមពលចម្រុះឱ្យដល់ ៧២% នៅឆ្នាំ​២០៣៥​ និងក្លាយជាប្រទេសអព្យាក្រឹតកាបូន នៅឆ្នាំ២០៥០។

ជាមួយគ្នានេះ ក្រសួងបរិស្ថាន​បាន​ដាក់ចេញកោះអព្យាក្រឹតកាបូនគំរូដំបូងគេបង្អស់នៅក្នុង អាស៊ីដែលត្រៀមនឹងដាក់សម្ពោធ កោះអព្យាក្រឹតកាបូន (Carbon Neutral Island) នៅចុង ខែមីនានេះ៕