មន្ត្រីជំនាញ ចុះពិនិត្យលើការគ្រប់គ្រងទីលានទុកដាក់សំរាមជំរុញភាពស្អាត អនាម័យបរិស្ថាន និង សុខភាពសាធារណៈ

27-មិនា-2026 - ម៉ោង 12:15:PM

ដោយ៖ វិចិត្រ

មន្ត្រីជំនាញនៃអគ្គនាយកដ្ឋានតំបន់ការពារធម្មជាតិ អគ្គនាយកដ្ឋានសហគមន៍មូលដ្ឋាន និង ស.ទ.ស. នៃក្រសួងបរិស្ថាន នៅថ្ងៃទី ២៦ ខែមីនា ឆ្នាំ២០២៦ បានចុះសិក្សាពិនិត្យ ដើម្បីកែលម្អទីលានចាក់សំរាម សម្រាប់ក្រុងខេមរភូមិន្ទ និងស្រុកមណ្ឌលសីមា ដែលស្ថិតនៅភូមិសាស្ត្រឃុំទួលគគី ស្រុកមណ្ឌលសីមា ក្រោមកិច្ចសហការចូលរួមពីតំណាងរដ្ឋបាលខេត្តកោះកុង អាជ្ញាធរពាក់ព័ន្ធ មន្ទីរបរិស្ថាន មន្ទីរពាក់ព័ន្ធ និងក្រុមហ៊ុនផ្តល់សេវាប្រមូលសំរាម។

តាមរយៈការផ្សព្វផ្សាយរបស់ក្រសួងបរិស្ថាន នៅថ្ងៃទី២៧ ខែមីនានេះ បានឱ្យដឹងថា ការចុះពិនិត្យ និងពិភាក្សាលើទីតាំងទុកដាក់សំរាម ក្នុងភូមិសាស្រ្តខេត្តកោះកុង នាពេលនេះ បានធ្វើឡើងស្របនឹងស្មារតីនៃការអនុវត្តលិខិតលេខ ៣៣១សជណ.កបច ចុះថ្ងៃទី៩ ខែមីនា ឆ្នាំ២០២៦ របស់ទីស្តីការគណៈរដ្ឋមន្ត្រី។ ក្នុងនោះក្រុមការងារបានពិភាក្សា ដើម្បីពិនិត្យលើពីគ្រប់ភាគីពាក់ព័ន្ធ ក្នុងកិច្ចសហការកែលម្អទីលានដែលមានស្រាប់ និងការសិក្សាវាយតម្លៃផលប៉ះពាល់បរិស្ថាន នៅលើទីតាំងស្នើសុំ ២ទីតាំងផ្សេងទៀត។

ក្រសួងបរិស្ថានបានដាក់ចេញយុទ្ធនាការជាច្រើន ដែលចាប់ផ្តើមពីការអប់រំផ្សព្វផ្សាយ ឈាន ទៅការអនុវត្តសកម្មភាព កាត់បន្ថយការប្រើប្រាស់ប្លាស្ទិក ការរើសសំរាម សំអាតបរិស្ថានតាមលំនៅដ្ឋានមូលដ្ឋាន និងតាមដងផ្លូវជាតិ ជំរុញការញែក និងទុកដាក់សំរាមឱ្យបានត្រឹមត្រូវ ដើម្បីជំរុញភាពស្អាតនៅកម្ពុជា ទាំងនៅលើដី ក្នុងទឹក និងលើមេឃ។

ក្រសួងបញ្ជាក់ថា ការចែកធុងសំរាមដល់មូលដ្ឋានសាលារៀន មណ្ឌលសុខភាព និងវត្តអារាម នៅទូទាំងប្រទេស ការពង្រឹងការគ្រប់គ្រងទីលានទុកដាក់សំរាម នឹងជាយុទ្ធសាស្រ្តចម្បងមួយ បន្ថែមទៀត ដែលក្រសួងបរិស្ថាន ផ្តោតលើការអនុវត្តគោលការណ៍ប្រតិបត្តិបច្ចេកទេស (SOP) យ៉ាងម៉ឺងម៉ាត់ ដើម្បីកាត់បន្ថយផលប៉ះពាល់បរិស្ថាន។ សកម្មភាពគន្លឹះមួយចំនួន ដែល ត្រូវអនុវត្ត រួមមានការកែលម្អហេដ្ឋារចនាសម្ព័ន្ធទីលាន, ការគ្រប់គ្រងទឹកកខ្វក់, ការរៀបចំដីកប់ខ្ទប់ឱ្យស្របស្តង់ដារ, និងការពង្រឹងសមត្ថភាពរដ្ឋបាលថ្នាក់ក្រោមជាតិក្នុងការប្រមូល ដឹកជញ្ជូន និងទុកដាក់ឱ្យបានត្រឹមត្រូវ៕