ដោយ៖ ​វិចិត្រ

កម្ពុជានៅតែបញ្ជាក់ពីជំហររបស់ខ្លួនថា  បន្ទាត់ព្រំដែន​មិន​ត្រូវបានផ្លាស់ប្តូរដោយការប្រើ​ប្រា​ស់​​កម្លាំងនោះទេ ខណៈថៃនៅតែបន្តសកម្មភាពរំលោភបំពានម្តងហើយម្តងទៀតមកលើ​ធិប​តេយ្យ​កម្ពុ​ជា។

តាមរយៈសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ​កម្ពុជា នៅថ្ងៃអាទិត្យម្សិលមិញ ខ្លួនបានធ្វើការតវ៉ាជំទាស់ជាផ្លូវការប្រឆាំងនឹង​ប្រទេស​ថៃ ចំពោះ​​​សកម្ម​​ភាព​ខុសច្បាប់ និងកើតឡើងដដែលៗរបស់ក្រុមយោធាថៃ នៅតំបន់​ដែល​កាន់​​កាប់​ដោយខុសច្បាប់ក្នុងឃុំស្រអែម ស្រុកជាំក្សាន្ត ខេត្តព្រះវិហារ។

នៅថ្ងៃទី៤ ខែមេសា ឆ្នាំ២០២៦ កងកម្លាំងប្រដាប់អាវុធថៃបានធ្វើសកម្មភាពឈូសឆាយ​ដី​ក្បែរ​តំ​បន់ប្រាសាទព្រះវិហារ ភាគខាងជើងនៃវត្តកែវសិក្ខាគីរីស្វារៈ ព្រមទាំងបានរាយលួស​បន្លា​​ប្រវែង​​ប្រមាណ ១០០ ម៉ែត្រ និងដាក់ពង្រាយរថពាសដែកនៅតំបន់បុស្សស្បូវ-ជាំតែ ផង​ដែរ​។

កម្ពុជាក៏បានទាមទារឱ្យថៃបញ្ឈប់ជាបន្ទាន់នូវរាល់សកម្មភាពខុសច្បាប់ទាំងនេះ បញ្ឈប់​ការ​ប្រព្រឹត្ត​រាល់សកម្មភាពឯកតោភាគីផ្សេងៗ និងត្រូវធ្វើសកម្មភាព​បន្ថយភាពតានតឹង ពង្រឹង​ទំនុក​ចិត្តគ្នាទៅវិញទៅមក ព្រមទាំងថែរក្សាសន្តិភាព និង​ភាព​ជាអ្នក​ជិត​ខាង​ល្អនៅ​តាម​បណ្តោ​យ​ព្រំដែន។

កម្ពុជាថាខ្លួនមិនទទួលស្គាល់នូវបន្ទាត់ព្រំដែន ឬការទាមទារដែនដីដោយឯកតោភាគី ពី​សំណាក់ភាគីថៃឡើយ។

ជាមួយគ្នានេះក្រសួងការបទេសកម្ពុជា បានហៅសកម្មភាពរបស់យោថៃទាំងនេះថា មិនមែន​ជា​​ការ​​ការ​ពារខ្លួនទេ និងប្រាសចាកពីស្មារតីនៃសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈ​កម្ម​ការព្រំដែនទូទៅ (GBC) នាថ្ងៃទី២៧ ខែធ្នូ ឆ្នាំ២០២៥។

នៅក្នុងសេចក្តីប្រកាសព័ត៌មានដដែលខាងលើ កម្ពុជាបានបដិសេធយ៉ាងដាច់​អហង្ការ​​ ចំពោះ​ការប៉ុនប៉ងណាមួយ ក្នុងការធ្វើឱ្យខូចស្ថានការណ៍ ដោយបង្កើតការ​កាន់​កាប់​លើ​ដីជាក់ស្តែង (fait accompli on the ground) និងបានធ្វើការតវ៉ាយ៉ាងខ្លាំង ចំពោះ​សក​ម្ម​ភាព​ទាំងឡាយ ដែលរំលោភអធិបតេយ្យ និងបូរណៈភាពទឹកដីរបស់កម្ពុជា ក្រោមអនុសញ្ញាបារាំង-សៀមឆ្នាំ១៩០៤ និងសន្ធិសញ្ញា​ឆ្នាំ​១៩០៧។ សកម្មភាពទាំងនោះក៏ផ្ទុយនឹងវិធានការបន្ថយ​ភាព​តានតឹង ដែលមានចែងក្នុង​សេច​ក្តីប្រកាសរួមរបស់គណៈកម្មការព្រំដែនទូទៅ ចុះថ្ងៃ​ទី​២៧ ខែធ្នូ ឆ្នាំ២០២៥ និងកិច្ចព្រមព្រៀង ដែលមានស្រាប់រវាងប្រទេសទាំងពីរផងដែរ៕