ដោយ៖ សំនៀង

អាកាសយានដ្ឋានអន្តរជាតិភ្នំពេញ នឹងបើកដំណើរការសាកល្បងជាសួនសាធារណៈជូន​សា​ធា​រណជន ចូលទស្សនា កម្សាន្ត ហាត់ប្រាណ និងលេងកីឡា ដោយមិនគិតថ្លៃ ក្នុងគោល​បំណង​ចូលរួមអបអរសាទរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ និងឱ្យឃើញច្បាស់​ពី​ស្ថាបត្យកម្មនៃអាកាសយានដ្ឋានអន្តរជាតិភ្នំពេញដែលមានតម្លៃជាប្រវត្តិសាស្ត្រ។ នេះបើតាម​ការ​ជូនដំណឹងរបស់ ក្រុមការងារអន្តរក្រសួង ដើម្បីសិក្សាអំពី ការគ្រប់គ្រង និងប្រើប្រាស់​អាកាស​យានដា្ឋនអន្តរជាតិភ្នំពេញចាស់ នៅថ្ងៃទី៦ ខែមេសា ឆ្នាំ២០២៦។  

សេចក្ដីជូនដំណឹងបានបន្តថា ប្រជាពលរដ្ឋអាចចូលទស្សនាជុំវិញតំបន់ និងអគារជាច្រើន ក្នុង​នោះរួមមាន អគារផ្លិត និងប៉មបញ្ជហោះហើរ (Tower) ដែលត្រូវបាន​កសាង​ឡើង​នៅ​អំឡុង​ទសវត្សរ៍ឆ្នាំ១៩៥០ តំបន់ជុំវិញបរិវេណអគារចេញចូលអ្នកដំណើរវីអាយភី (VIP) ចំណតយន្ត​ហោះស៊ីវិល និងតំបន់ផ្លូវរត់របស់យន្តហោះ (Runway) ជាដើម ដែលសុទ្ធសឹងតែជាតំបន់​ និង​ទីតាំង​ប្រវត្តិសាស្ត្រនៃវិស័យអាកាសចរស៊ីវិលកម្ពុជា។

បន្ថែមលើនេះ រដ្ឋាភិបាលបានតុបតែងលម្អនៅតំបន់មួយចំនួន និងការដាក់បដាផ្សេងៗ​ដែល​មាន​រូបភាពជាល្បែងប្រពៃណីជាតិខ្មែរ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ សម្រាប់ឆ្នាំ ២០២៦ ក្នុងបរិវេណព្រលានយន្តហោះនេះផងដែរ។

សេចក្តីជូនដំណឹងដដែលនេះបានឱ្យដឹងដែរថា ការបើក​សាក​ល្បង​នេះ មានរយៈពេល ៩ ថ្ងៃ គឺ ចាប់​ពីថ្ងៃសៅរ៍ ទី១១ រហូតដល់ថ្ងៃអាទិត្យ ទី១៩ ខែមេសា ឆ្នាំ២០២៦ ដែលអនុញ្ញាតឱ្យ​ប្រ​ជា​ពល​រដ្ឋ​ចេញចូល ចាប់ពីម៉ោង ៥:០០ ព្រឹក ហើយត្រូវចាកចេញនៅម៉ោង ៩:០០ យប់។

សម្រាប់ប្រជាពលរដ្ឋចូលកម្សាន្តដោយថ្មើរជើង ចេញចូលតាមច្រក វីអាយភី (VIP) (ចំណុច​លេខ​១)។ ប្រជាពលរដ្ឋចូលកម្សាន្ត តាមរយៈមធ្យោបាយ ដូចជា កង់ ម៉ូតូ ឡាន ចូលតាម​ច្រក​អគារ Terminal (ចំណុចលេខ ៣)។ ប្រជាពលរដ្ឋចូលកម្សាន្ត តាមរយៈមធ្យោបាយ ដូចជា កង់ ម៉ូតូ ឡាន ចេញតាមច្រកអគារ Terminal (ចំណុចលេខ ២)។

ក្នុងនោះក្រុមការងារក៏បានស្នើឱ្យប្រជាពលរដ្ឋ​ត្រូវចូល​រួម​រក្សា​អនាម័យ និងសណ្ដាប់ធ្នាប់ ដោយ​ប្រើប្រាស់បន្ទប់ទឹកចល័ត និងធុងសម្រាមឱ្យបានត្រឹមត្រូវ និងមានរបៀបរៀបរយ (ចំណុចលេខ ៦, ៧, ៨ និង៩)។

ប្រជាពលរដ្ឋត្រូវចូលរួមអនុវត្តឱ្យបានខ្ជាប់ខ្ជួនទៅតាមស្លាកសញ្ញា និងការណែនាំ សម្រាប់​គ្រប់បរិវេណដែលហាមឃាត់ និងហាមដាច់ខាតមិនឱ្យមានការលក់ដូរ មិនឱ្យមានការ​យក​ចូល ​និងពិសាគ្រឿងស្រវឹង និងមិនឱ្យមាន ការយកចូល និងប្រើប្រាស់កាំជ្រួច និងគ្រឿងផ្ទុះ នានា នៅក្នុងបរិវេណអាកាសយានដ្ឋានអន្តរជាតិភ្នំពេញ។

ជាមួយគ្នានេះសេចក្តីជូនដំណឹងនេះក៏បានកំណត់អំពីតម្លៃនៃការផ្ញើយានជំនិះគ្រប់ប្រភេទផងដែរ ដោយក្នុងនោះម៉ូតូមួយគ្រឿងតម្លៃ១ពាន់រៀល ហើយឡានមួយគ្រឿងតម្លៃ២ពាន់រៀល។ ដោយឡែកសម្រាប់ការផ្ញើកង់ ក្រុមការងារកំណត់មិនឱ្យយកថ្លៃផ្ញើឡើយ៕