ដោយ៖ វិចិត្រ

រដ្ឋមន្រ្តីក្រសួងបរិស្ថានគាំទ្រការចូលរួមពីភាគីពាក់ព័ន្ធ ក្នុងការងារគ្រប់គ្រងធនធានធម្មជាតិ នៅតាមតំបន់ការពារធម្មជាតិ ដើម្បីធានានិរន្តរភាពបរិស្ថាន និងការអភិវឌ្ឍដោយចីរភាព។ ការលើកឡើងរបស់ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថានបែបនេះ ធ្វើឡើងនៅក្នុង ជំនួបជាមួយក្រុមសហគមន៍ព្រៃឡង់ នៅរសៀលថ្ងៃទី១៧ ខែមីនា ឆ្នាំ២០២៦ នាទីស្តីការក្រសួង។

នៅក្នុងជំនួបនោះ ឯកឧត្តម អ៊ាង សុផល្លែត បានស្វាគមន៍ និងជំរុញឱ្យគ្រប់អង្គការដៃគូ សហគមន៍ប្រជាពលរដ្ឋ ចូលរួម​ចំណែកការងារអាទិភាពរបស់ក្រសួងបរិស្ថានជាពិសេសការ ដាក់ទិសដៅរួម ក្នុងការពង្រីកវិសាលភាពគម្របព្រៃឈើឱ្យបានច្រើន ស្របតាមយុទ្ធសាស្រ្ត ចក្រាវិស័យបរិស្ថាន ដែលបានបង្កើតឡើងអនុលោមតាមគោលនយោបាយ និងយុទ្ធសាស្ត្រ របស់រាជរដ្ឋាភិបាល និងការលើកកម្ពស់ជីវភាពប្រជាពលរដ្ឋនៅតាមសហគមន៍ ការអភិវឌ្ឍប្រកបដោយចីរភាព។

ជាមួយគ្នានេះ រដ្ឋមន្រ្តីក្រសួងបរិស្ថាន ក៏បានលើកទឹកចិត្តឱ្យក្រុមសហគមន៍ព្រៃឡង់ ចូលរួមសហការក្នុងការពង្រឹងការអនុវត្តច្បាប់លើបទល្មើសធនធានធម្មជាតិ ការចែករំលែកព័ត៌មាន ការពង្រឹងចំណេះដឹង ចូលរួមដាំស្តារព្រៃសហគមន៍ និងការសហការចូលរួមក្នុងការទប់ស្កាត់បទល្មើសធនធានធម្មជាតិនៅក្នុងមូលដ្ឋាន៕