ដោយ៖ វិចិត្រ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានថ្លែងថា កម្ពុជាមិនចាំបាច់ត្រូវការ​នាំចូល​ប្រេ​​ង​ពីប្រទេសថៃឡើយ ដោយកម្ពុជាមានប្រភពនាំចូលប្រេងពីប្រទេស​ផ្សេងៗគ្រប់ គ្រាន់​។

សម្តេចធិបតីបានបញ្ជាឱ្យចាត់វិធានការផ្លូវច្បាប់ប្រឆាំងនឹងក្រុមហ៊ុនដែលរត់ពន្ធប្រេងខុសច្បាប់ពីប្រទេសថៃចូលមកកម្ពុជា ​បន្ទាប់ពីមានសារព័ត៌មានរបស់ថៃបានរាយការណ៍ពាក់ព័ន្ធនឹង​បណ្តាញ​រត់ពន្ធប្រេងឆ្លងដែនខុសច្បាប់នេះ។  

តាមរយៈសារនៅលើបណ្តាញសង្គមហ្វេសប៊ុកនៅថ្ងៃទី៣ ខែមេសា ឆ្នាំ២០២៦ សម្តេចមហា​បវរ​ធិបតី ហ៊ុន ម៉ាណែត បានបញ្ជាឱ្យ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល ឯកឧត្តម ស ថេត អគ្គស្នងការនគរបាលជាតិ និងឯកឧត្តម គុណ ញឹម អគ្គនាយក​នៃអគ្គ​នាយក​ដ្ឋានគយ និងរដ្ឋាករកម្ពុជា ស្រាវជ្រាវករណីបណ្តាញរត់ពន្ធខុសច្បាប់នេះបានច្បាស់​លាស់។

ក្នុងនោះសម្តេចធិបតីនាយករដ្ឋមន្ត្រី បានរំឮកថា កម្ពុជា បានផ្អាកការទិញប្រេងឥន្ទនៈ និង​ឧស្ម័ន​ឥន្ទនៈគ្រប់ប្រភេទពីប្រទេសថៃចាប់តាំងពីខែមិថុនា ឆ្នាំ២០២៥ ហើយក៏មិនមានការ​ចាំ​ចា​ប់​ក្នុងការនាំប្រេងចូលពីប្រទេសថៃទៀតដែរ ដោយកម្ពុជាមានប្រភពប្រេងពីប្រទេស​ផ្សេងៗ​គ្រ​ប់​គ្រាន់ហើយ។

សម្តេចបានសង្កត់ធ្ងន់ថា ប្រសិនជាមានករណីនេះពិតប្រាកដមែន ត្រូវស្រាវជ្រាវឱ្យឃើញ​មុខសញ្ញាពាក់ព័ន្ធទាំងអស់ ហើយត្រូវចាត់វិធានការច្បាប់ឱ្យបានតឹងរឹងបំផុត។

ជាមួយគ្នានេះសម្តេចក៏បានព្រមានឱ្យដកអាជ្ញាប័ណ្ណ ប្រសិនជាមានពាក់ព័ន្ធជាមួយក្រុមហ៊ុន ប្រេងណា​មួយ ហើយប្រសិនជាមានពាក់ព័ន្ធជាមួយមន្ត្រីរាជការ ឬកងកម្លាំង​ប្រដាប់​អាវុធ​កម្ពុ​ជា ត្រូវបញ្ចប់តួនាទី និងបណ្ដេញចេញពីក្របខណ្ឌជាកំហិត មិនថាបុគ្គលនោះមានតួនាទី ឬ​ឋាន​ន្តរស័ក្តិប៉ុណ្ណាទេ៕