ដោយ៖ វិចិត្រ

តាមរយៈការសិក្សាស្រាវជ្រាវជីវ:ចម្រុះដែលធ្វើឡើងដោយម៉ាស៊ីនថតស្វ័យប្រវត្តក្នុងរយៈពេល ៨ខែ ពោលគឺ​នៅ​ចន្លោះខែមករា ដល់ខែសីហា ឆ្នាំ២០២៥ បានបង្ហាញពីប្រភេទសត្វសំខាន់​ជា​ច្រើន ដែលកំពុង​មានវត្តមាននៅក្នុងឧទ្យានជាតិវីរៈជ័យ។ នេះបើតាមសេចក្តីប្រកាសរបស់​ក្រសួង​បរិស្ថាន នៅថ្ងៃ​​ទី១២ ខែកុម្ភៈ ឆ្នាំ២០២៦។    

ឧទ្យានជាតិវីរៈជ័យ​មាន​ទី​តាំងស្ថិតនៅភាគឦសាននៃប្រទេសកម្ពុជា ដែលជាជម្រក​ដ៏មាន​សា​រៈ​សំខាន់ និងសុខសាន្ត សម្រាប់សត្វព្រៃគ្រប់ប្រភេទ ដោយលាតសន្ធឹងគ្របដណ្តប់លើខេត្តចំនួនពីរ គឺខេត្តរតនគិរី និងខេត្តស្ទឹងត្រែង។ ​ឧទ្យាន​ជាតិ​វីរៈ​ជ័យ បង្កើតឡើង​នៅ​ឆ្នាំ​១៩៩៣ មាន​ផ្ទៃដី ៣៣២.៥០០ ហិកតា ហើយមានផ្ទៃក្រឡា ៣.៣២៥ គីឡូម៉ែត្រក្រឡា។

ក្នុងនោះក្រសួងបានបញ្ជាក់ឱ្យដឹងថា តាមរយៈកិច្ចសហការរវាង អង្គការសត្វព្រៃ និងរុក្ខជាតិ ជា​មួយក្រសួងបរិស្ថាន ដោយមានការគាំទ្រពីមន្ទីរបរិស្ថានខេត្តរតនគីរី និងការចូលរួមពី ជន​ជាតិដើមភាគតិច និងសហគមន៍មូលដ្ឋាន បានរកឃើញប្រភេទសត្វសំខាន់ៗ ដែលកត់ត្រា បានចំនួន ៤២ប្រភេទ ក្នុងនោះ ថនិកសត្វ៣២ប្រភេទ បក្សី៩ប្រភេទ និងពួកល្មួន១ប្រភេទ។

ប្រភេទសត្វកម្រសំខាន់ៗទាំងនោះ មានដូចជា ដំរីអាស៊ី ឆ្កែព្រៃ ខ្លាពពក ខ្លាលឿងមាស កេងកង​ធំ ខ្លាភ្ញីថ្មកែវ រញីប្រផេះ ក្ងោក ស្វាកន្ទុយស ពង្រូល និងប្រភេទសត្វផ្សេងៗ ជាច្រើន ទៀត។

សម្រាប់ប្រភេទសត្វដែលបានកត់ត្រាខាងលើនេះ មាន២ប្រភេទត្រូវបានចាត់ទុកជាសត្វជិត ផុត​​ពូជ​បំផុត ៥ប្រភេទ ជាសត្វជិតផុតពូជ និង១៣ប្រភេទជាសត្វងាយរងគ្រោះ៕