ដោយ៖ វិចិត្រ

វាជារឿងគួរឱ្យសោកស្តាយយ៉ាងខ្លាំង ប្រសិនបើភាគីថៃសម្រេចដកខ្លួនជាឯក​តោភាគី​ពីអនុ​ស្ស​រណៈឆ្នាំ២០០១ ដែលនេះជាជំហានមួយងាកចេញពីស្មារតីសហប្រតិបត្តិការ ដែលជាមូល​ដ្ឋាន​គ្រឹះនៃឯកសារនេះ។ នេះជាការលើកឡើងរបស់អ្នកនាំពាក្យក្រសួងការបរទេស និងសហ​ប្រតិបត្តិការអន្តរជាតិកម្ពុជា នៅក្នុងសេចក្តីថ្លែងការណ៍ចុះថ្ងៃទី៨ ខែមេសា ឆ្នាំ២០២៦ ឆ្លើយ​តប​ចំ​ពោះការសាកសួរពីសារព័ត៌មានជាច្រើនពាក់ព័ន្ធនឹងការពិចារណារបស់ប្រទេសថៃ ក្នុងការ​ដក​ខ្លួនចេញពីអនុស្សរណៈនៃការយោគយល់គ្នា ស្តីពីតំបន់ទាមទារ​ដែនសមុទ្រត្រួតគ្នានៃ​ខ្ពង់​រាបបាតសមុទ្រ ដែលបានចុះហត្ថលេខារវាងកម្ពុជា និងថៃ ក្នុងឆ្នាំ២០០១។

អ្នកនាំពាក្យបានបញ្ជាក់ថា ចំពោះប្រទេសកម្ពុជាវិញ នៅតែប្រកាន់ខ្ជាប់យ៉ាងមុតមាំ និងឥត​ងា​ក​​​រេចំពោះខ្លឹមសារ និងស្មារតីនៃអនុស្សរណៈ ព្រមទាំងចំពោះសុច្ឆន្ទៈ និងភាពស្មោះត្រង់ដែ​ល​​បាននាំឱ្យអនុស្សរណៈនៃការយោគយល់គ្នានេះ សម្រេចបានកាលពីឆ្នាំ២០០១។

នៅក្នុងសេចក្តីថ្លែងការណ៍ខាងលើនេះ អ្នកនាំពាក្យក្រសួងការបរទេសកម្ពុជា បានសង្កត់ធ្ងន់​ថា អនុស្សរណៈនៃការយោគយល់គ្នាឆ្នាំ២០០១នេះ ឆ្លុះបញ្ចាំងពីឆន្ទៈនយោបាយ ពិតប្រាកដ និងបំណងរួមរបស់ប្រទេសកម្ពុជា និងថៃ ក្នុងការរៀបចំដោយស្មោះត្រង់នូវក្របខ័ណ្ឌមួយ​ដែ​ល​​​ភាគីទាំងពីរអាចទទួលយកបាន ដើម្បីជាមូលដ្ឋានសម្រាប់ការទាញយកផលប្រយោជន៍រួម ពីធនធាននៅក្នុងតំបន់ដែនសមុទ្រត្រួតគ្នា (OCA) ហើយក្នុងពេលដំណាលគ្នានោះ ក៏ជំរុញការ កំណត់ព្រំដែនសមុទ្រស្របតាមច្បាប់អន្តរជាតិផងដែរ។

លើសពីនេះ អនុស្សរណៈឆ្នាំ២០០១ ក៏បង្ហាញពីសុច្ឆន្ទៈរបស់ប្រជាជាតិទាំងពីរ ក្នុងកិច្ចខិត​ខំ​ប្រឹ​ង​​ប្រែង កំណត់ព្រំដែនសមុទ្រមួយប្រកបដោយមិត្តភាព កិច្ចសហប្រតិបត្តិការ និងវិបុលភាព​រួម​គ្នា​ស​ម្រាប់ប្រជាជននៃប្រទេសទាំងពីរ។

កាលពីពេលថ្មីៗនេះ នាយករដ្ឋមន្ត្រីថៃ លោក អនុទិន ឆាន់វីរៈគុល ធ្លាប់សន្យាថានឹងលុប​ចោ​ល​​​អនុ​ស្សរណៈឆ្នាំ ២០០១ ជាមួយកម្ពុជា ដោយថា កិច្ចព្រមព្រៀងនេះលែង​បម្រើ​ផល​ប្រ​យោ​​ជន៍​​របស់ប្រទេសថៃទៀតហើយ ហើយថាការដកខ្លួនចេញ​ណាមួយ​នឹង​ត្រូវ​អនុវត្តតាម​នីតិ​វិធី​ផ្លូវ​ច្បាប់៕