ប្រេស៊ីល និងកម្ពុជា រួមគ្នាប្រយុទ្ធប្រឆាំងនឹងឧក្រិដ្ឋកម្មបរិស្ថាន ដោយវិធានការច្បាប់ជាតិ-អន្តរជាតិសម្រាប់មនុស្សជំនាន់ក្រោយ

17 ម៉ោងមុន

ដើម្បីជាវិធានការដ៏មានប្រសិទ្ធភាព ក្នុងការទប់ស្កាត់នូវការបាត់បង់សត្វព្រៃដោយការជូញដូរ និងការកាប់សម្លាប់សត្វព្រៃ ធនធានធម្មជាតិ និងសកម្មភាពផ្សេងៗដែលធ្វើឱ្យបាត់បង់ និងរេចរិលព្រៃនៅក្នុងភូមិសាស្រ្តតំបន់ត្រូពិក ប្រស៊ីល និងកម្ពុជា បានផ្តួចផ្តើមបង្កើតកិច្ចសហប្រតិបត្តិការទ្វេភាគី រួមគ្នាប្រឆាំងនឹងឧក្រឹដ្ឋកម្មបរិស្ថាន ដោយអនុលោមតាមច្បាប់ជាតិ និងអន្តរជាតិ។ ការណ៍នេះត្រូវបានធ្វើឡើងនៅក្នុងជំនួបសម្តែងការគួរសមរវាងឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន ជាមួយលោកជំទាវ Vivian Loss Sanmartin ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសហព័ន្ធប្រេស៊ីល ប្រចាំព្រះរាជាណាចក្រកម្ពុជា នារសៀលថ្ងៃទី២ ខែកុម្ភៈ ឆ្នាំ២០២៦ នៅទីស្តីការក្រសួងបរិស្ថាន។ នេះបើតាមការចុះផ្សាយដោយក្រសួងបរិស្ថាន។

ក្នុងនោះបើតាមក្រសួងបរិស្ថាន ភាគីទាំងពីរបានសង្កត់ធ្ងន់ទៅលើសារៈសំខាន់នៃសម្ព័ន្ធភាពប្រយុទ្ធប្រឆាំងនឹងឧក្រិដ្ឋកម្មបរិស្ថាន ផ្តួចផ្តើមដោយប្រេស៊ីល ហើយស្របទៅនឹងយុទ្ធសាស្រ្តចក្រាវិស័យបរិស្ថាន រួមមាន ភាពស្អាត ភាពបៃតង និងចីរភាព ដែលក្រសួងកំពុងអនុវត្តយ៉ាងសកម្ម ដើម្បីឆ្លើយតបការប្រឆាំងនឹងឧក្រិដ្ឋកម្មបរិស្ថាន។ ជាមួយគ្នានេះក្រសួងបរិស្ថានថាខ្លួនបានអប់រំ និងបញ្រ្ជាបចំណេះដឹងទាំងនេះជារៀងរាល់ថ្ងៃ តាមរយៈការផ្សព្វផ្សាយ ការអនុវត្តច្បាប់ ក្រមបរិស្ថាន ធនធានធម្មជាតិយ៉ាងតឹងរ៉ឹង ដោយគ្មានការលើកលែង ប៉ុន្តែក៏នៅតែមានផលប៉ះពាល់ពីជម្លោះព្រំដែន ដែលបណ្តាលឱ្យមានការស្លាប់បាត់បង់ជីវិតសត្វដំរីម្តាយនិងកូន និងជីវិតសត្វព្រៃដទៃទៀត ដែលត្រូវផ្លាស់ទីទៅកាន់កន្លែងមានសុវត្ថិភាពជាដើម។

ក្រសួងបន្តថា កិច្ចសហប្រតិបត្តិទ្វេភាគីរវាងប្រេស៊ីល-កម្ពុជា បានប្តេជ្ញាចិត្តរួមគ្នា ដោយបង្កើតជាក្របខ័ណ្ឌរួមនៃកិច្ចសហការអន្តរជាតិ ក្នុងការទប់ស្កាត់ការជួញដូរសត្វព្រៃ និងការកាប់ព្រៃឈើខុសច្បាប់ដែលការណ៍នេះមិនចំពោះតែកម្ពុជាទេ គឺស្ថិតនៅក្នុងភូមិសាស្រ្តតំបន់ត្រូពិក ដោយអនុលោមតាមច្បាប់ជាតិ និងអន្តរជាតិដើម្បីការពារ ថែរក្សាបរិស្ថាន សម្រាប់មនុស្សជំនាន់ក្រោយ៕