ដោយ៖ កែវ រតនៈ
ក្រោមការសម្របសម្រួលលឿនរហ័ស និងការយកចិត្តទុកដាក់ពីថ្នាក់ដឹកនាំ និងមន្ត្រីជំនាញរបស់ក្រសួងការងារ និងបណ្តុះបណ្តាលវិជ្ជាជីវៈ ការស្នើសុំរបស់អ្នកដឹកជញ្ជូនលើថ្នាលបច្ចេកវិទ្យា (អ្នករត់កង់បី) ដែលតំណាងឱ្យអ្នករត់កង់បីនៅទូទាំងប្រទេស ទទួលបានដំណោះស្រាយសះជាហើយនៅថ្ងៃទី១៩ ខែឧសភា ឆ្នាំ ២០២៦នេះ។ នេះបើតាមការបញ្ជាក់របស់លោក ស៊ុន មេសា អ្នកនាំពាក្យក្រសួងការងារ។

 
អ្នកនាំពាក្យបានគូសបញ្ជាក់ក្រោយកិច្ចប្រជុំថា អ្នករត់កង់បីនិងក្រុមហ៊ុនផ្តល់សេវាដឹកជញ្ជូន ឯកភាព លើ ៣ចំណុចសំខាន់ៗដែលរួមមានការផ្តល់ថវិកាបន្ថែមជូនអ្នកបើកបរកង់បីចំនួន៥០០រៀលក្នុងមួយជើងដំណើរទៅលើតម្លៃអនុវត្តបច្ចុប្បន្នបណ្តោះអាសន្នរយៈពេល៣ខែ ចាប់ពីថ្ងៃទី១ ខែមិថុនា ដល់ថ្ងៃទី៣១ ខែសីហា ឆ្នាំ២០២៦ និងការកាត់កម្រៃជើងសារមិនឱ្យលើសចំនួន១៥ភាគរយ។ ដោយឡែក ការបិទអេបណាមួយពីក្រុមហ៊ុនទៅកាន់អ្នកបើកបរ ត្រូវមាននីតិវិធីច្បាស់លាស់និងជូនដំណឹងជាមុនជាចាំបាច់។

គួរបញ្ជាក់ថា ក្រុមអ្នករត់ម៉ូតូកង់បីឱ្យក្រុមហ៊ុន Grab បានចេញតវ៉ាជាបន្តបន្ទាប់តាំងពីខែមេសា ដើម្បីស្នើឱ្យក្រុមហ៊ុន បន្ថយការកាត់យកកម្រៃជើងសាក្នុងស្ថានភាពដែលតម្លៃប្រេងឥន្ធនៈហក់ឡើងខ្ពស់ខ្លាំង។ ដោយឡែកការតវ៉ាកាលពីថ្ងៃទី១៥ ខែឧសភា ឆ្នាំ២០២៦នៅខាងមុខក្រុមហ៊ុន Grabគឺជាការតវ៉ាលើក​ទី៣​ហើយ ដែលមានអ្នករត់កង់បីប្រមាណ៥០នាក់ចូលរួម៕

 រូបភាព៖ ក្រសួងការងារ