ភ្នំពេញ៖ ធនាគារអភិវឌ្ឍន៍អាស៊ី (ADB) បានប្រកាសថា ខ្លួននឹងផ្តល់កញ្ចប់ហិរញ្ញប្បទានសរុប ៤៥០ លានដុល្លារអាមេរិក ដើម្បីជួយការពារគ្រួសារក្រីក្រនៅកម្ពុជា និងពង្រឹងសេដ្ឋកិច្ចរបស់កម្ពុជា និងស្រីលង្កា ខណៈជម្លោះនៅតំបន់មជ្ឈិមបូព៌ាបានជំរុញឱ្យថ្លៃដើមរស់នៅកើនឡើង និងបង្កើនភាពមិនប្រាកដប្រជាដល់ប្រទេសជាច្រើននៅអាស៊ី និងប៉ាស៊ីហ្វិក។

លោក ម៉ាសាតូ កាន់ដា (Masato Kanda) ប្រធានធនាគារអភិវឌ្ឍន៍អាស៊ី (ADB) បានថ្លែងថា គ្មានគ្រួសារណាមួយគួរតែត្រូវធ្លាក់ចូលក្នុងភាពក្រីក្រកាន់តែខ្លាំង ដោយសារតែជម្លោះដែលកើតឡើងនៅចម្ងាយរាប់ពាន់គីឡូម៉ែត្រពីប្រទេសរបស់ពួកគេ។

«យើងកំពុងចាត់វិធានការយ៉ាងឆាប់រហ័ស ដើម្បីការពារគ្រួសារដែលកំពុងជួបការលំបាកជាង ១ លានគ្រួសារនៅកម្ពុជា ខណៈជួយប្រទេសស្រីលង្កាបង្កើតការងារ ទាក់ទាញការវិនិយោគ និងពង្រីកពាណិជ្ជកម្ម។ ការវិនិយោគទាំងនេះនឹងជួយឱ្យប្រទេសទាំងពីរអាចទប់ទល់នឹងសម្ពាធបច្ចុប្បន្ន និងមានភាពរឹងមាំជាងមុននៅពេលប្រឈមនឹងវិបត្តិនាពេលអនាគត»។

 

កញ្ចប់ហិរញ្ញប្បទាននេះ រួមបញ្ចូលទាំងវិធានការឆ្លើយតបបន្ទាន់ចំពោះវិបត្តិ និងការគាំទ្រកំណែទម្រង់សេដ្ឋកិច្ចរយៈពេលវែង។ ក្នុងនោះ ADB នឹងផ្តល់ ប្រាក់កម្ចី ២៥០ លានដុល្លារ សម្រាប់កម្មវិធី អន្តរាគមន៍រហ័សដើម្បីស្ថិរភាពសេដ្ឋកិច្ច (Rapid Intervention for Stabilization of the Economy – RISE) របស់កម្ពុជា និង ប្រាក់កម្ចីផ្អែកលើគោលនយោបាយ ២០០ លានដុល្លារ សម្រាប់កម្មវិធី អភិវឌ្ឍន៍ពាណិជ្ជកម្ម ការវិនិយោគ និងឧស្សាហកម្ម របស់ប្រទេសស្រីលង្កា។

សម្រាប់កម្ពុជា កម្មវិធី RISE នឹងផ្តល់ថវិកាដើម្បីអនុវត្តវិធានការសារពើពន្ធបណ្តោះអាសន្ន និងមានគោលដៅច្បាស់លាស់ ក្នុងគោលបំណងរក្សាស្ថិរភាពសេដ្ឋកិច្ច និងការពារចំណាយផ្នែកសង្គមដែលបានគ្រោងទុកនៅក្នុងថវិកាជាតិឆ្នាំ២០២៦។ កម្មវិធីនេះក៏នឹងជំរុញការប្រើប្រាស់បច្ចេកវិទ្យាថាមពលស្អាតផងដែរ។

ADB បានឱ្យដឹងថា គ្រួសារក្រីក្រជាង ១ លានគ្រួសារ ដែលបានចុះបញ្ជីក្នុងកម្មវិធី IDPoor របស់រាជរដ្ឋាភិបាលកម្ពុជា នឹងទទួលបានការគាំទ្រផ្នែកប្រាក់ចំណូល ក្នុងនោះមានយ៉ាងហោចណាស់ ៣៥០.០០០ គ្រួសារ ដែលមានស្ត្រីជាមេគ្រួសារ។ ជំនួយនេះក៏រួមបញ្ចូលការសម្រួលបំណុល និងការគាំទ្រធាតុចូលកសិកម្មសម្រាប់ប្រជាពលរដ្ឋនៅតំបន់ជនបទផងដែរ។

ADB បញ្ជាក់ថា ប្រាក់កម្ចី ២៥០ លានដុល្លារ របស់ខ្លួនសម្រាប់កម្ពុជា នឹងត្រូវបំពេញបន្ថែមដោយហិរញ្ញប្បទានដែលមានតម្លៃស្មើ រហូតដល់ ២៥០ លានដុល្លារ ពី ធនាគារវិនិយោគហេដ្ឋារចនាសម្ព័ន្ធអាស៊ី (AIIB) និង រហូតដល់ ១៨៨ លានដុល្លារ ពី ទីភ្នាក់ងារសហប្រតិបត្តិការអន្តរជាតិជប៉ុន (JICA)។ សរុបហិរញ្ញប្បទានសម្រាប់កម្មវិធីនេះ អាចកើនដល់ ៦៨៨ លានដុល្លារ។

ចំណែកនៅប្រទេសស្រីលង្កា ប្រាក់កម្ចី ២០០ លានដុល្លារ របស់ ADB រួមមានថវិកាបន្ថែម ១០០ លានដុល្លារ ដើម្បីជួយប្រទេសនេះស្រូបយកសម្ពាធសេដ្ឋកិច្ចដែលបណ្តាលមកពីជម្លោះនៅមជ្ឈិមបូព៌ា។

កម្មវិធីនេះនឹងគាំទ្រកំណែទម្រង់ដើម្បីធ្វើទំនើបកម្មប្រព័ន្ធពាណិជ្ជកម្ម បង្កើនសមត្ថភាពប្រកួតប្រជែងរបស់សហគ្រាសធុនតូច និងមធ្យម និងទាក់ទាញការវិនិយោគចូលទៅក្នុងតំបន់សេដ្ឋកិច្ចពិសេស។ ADB រំពឹងថា កំណែទម្រង់ទាំងនេះនឹងជួយឱ្យអាជីវកម្មអាចពង្រីកផលិតកម្ម បង្កើនការនាំចេញ និងភ្ជាប់ខ្លួនទៅនឹងខ្សែច្រវាក់តម្លៃក្នុងតំបន់ និងពិភពលោក ដែលនឹងរួមចំណែកបង្កើតការងារ និងជំរុញកំណើនសេដ្ឋកិច្ចដឹកនាំដោយវិស័យឯកជន។

ADB ក៏បានបញ្ជាក់ថា ការធ្វើពិពិធកម្មផលិតផលនាំចេញ និងការបង្កើនសមត្ថភាពប្រកួតប្រជែង នឹងជួយពង្រឹងភាពធន់របស់សេដ្ឋកិច្ចស្រីលង្កាចំពោះវិបត្តិខាងក្រៅនាពេលអនាគត។

ធនាគារអភិវឌ្ឍន៍អាស៊ី (ADB) គឺជាធនាគារអភិវឌ្ឍន៍ពហុភាគីឈានមុខមួយ ដែលគាំទ្រកំណើនប្រកបដោយចីរភាព បរិយាបន្ន និងភាពធន់នៅទូទាំងតំបន់អាស៊ី និងប៉ាស៊ីហ្វិក។ បង្កើតឡើងក្នុងឆ្នាំ១៩៦៦ ADB មានសមាជិកចំនួន ៦៩ ប្រទេស ក្នុងនោះ ៥០ ប្រទេស មកពីតំបន់អាស៊ី និងប៉ាស៊ីហ្វិក។