ខណ្ឌរដ្ឋបាលជលផលខេត្តពោធិសាត់ បានចុះបង្ក្រាបបទល្មើសនេសាទ នៅតំបន់ភូមិសាស្ត្រ​ស្រុក​ក្រគរ ក្នុងខេត្តពោធិ៍សាត់ ដោយបង្ក្រាប និងរឹបអូសបានឧបករណ៍នេសាទ​ខុសច្បាប់​មួយ​ចំនួន។ នេះបើតាមការឱ្យដឹងពីក្រសួងក្រសួងកសិកម្ម រុក្ខាប្រមាញ់ និងនេសាទ។

នៅថ្ងៃទី២៤ ខែមិថុនា ឆ្នាំ២០២៦ លោក ភុន សុវណ្ណា នាយខណ្ឌរដ្ឋបាលជលផលខេត្ត​ពោធិ៍​សាត់ បានដឹកនាំក្រុមការងារ ផ្នែករដ្ឋបាលជលផលក្រគរ សង្កាត់រដ្ឋបាលជលផលកំពង់លួង សហការជាមួយ កងរាជអាវុធហត្ថខេត្តពោធិ៍សាត់ កម្លាំងកងពលតូចថ្មើរជើងលេខ៥៣ និង​កម្លាំង​តំបន់ប្រតិបត្តិការសឹករងពោធិ៍សាត់ ចុះត្រួតពិនិត្យ និងទប់ស្កាត់ បង្ក្រាបបទល្មើស​នេសាទ ចាប់ពីចំណុចជ្រោយស្ដី នៅក្នុងភូមិត្រពាំងរំដេញ ឃុំក្បាលត្រាច រហូតដល់មុខភូមិ​កំពង់​ថ្គោល ឃុំអន្សារចំបក់ ស្រុកក្រគរ។

នៅក្នុងបេសកកម្មបង្ក្រាបបទល្មើសនេសាទនេះ ក្រុមការងារ ជំនាញបានរឹបអូសលូស្បៃមុង​បាន​​ចំនួន០១ករណី រុះរើរបាំងស្បៃមុង ចំនួន ១៦ខ្សែ ប្រវែង ១.២៥០ម៉ែត្រ លូកងស្បៃមុងចំនួន ១៨មាត់ បង្គោលចំនួន ១៧៥ដើម និងចាក់លែងត្រីចម្រុះចំនួន ១០គីឡូក្រាម៕