ដោយ៖ វិចិត្រ

កម្ពុជាទទួលបានសមិទ្ធផលថ្មីមួយក្នុងវិស័យកសិកម្ម និងកសិ-ឧស្សាហកម្ម ខណៈអគ្គរដ្ឋ​បាល​​គយ​នៃសាធារណរដ្ឋប្រជាមានិតចិន (GACC) បានអនុញ្ញាតជាផ្លូវការឱ្យក្រុមហ៊ុន BEST LIFE PRODUCT Co., Ltd. នាំចេញផលិតផលសំបុកត្រចៀកកាំ​ទៅកាន់ទីផ្សារ​ប្រទេស​ចិន​ជាលើក​ដំបូង។

បើតាមក្រសួងកសិកម្ម រុក្ខាប្រមាញ់ និងនេសាទ ការអនុញ្ញាតនេះ ត្រូវបានផ្តល់កាលពីថ្ងៃទី១៥ ខែកក្កដា ឆ្នាំ២០២៦ ហើយចាត់ទុកជាជំហានដ៏សំខាន់ក្នុងការពង្រីកទីផ្សារនាំចេញផលិត​ផល​កសិកម្មរបស់កម្ពុជា និងបង្កើនឱកាសសម្រាប់វិស័យចិញ្ចឹមត្រចៀកកាំឱ្យកាន់តែរីកចម្រើន។

ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនៅថ្ងៃទី២២ ខែកក្កដា ឆ្នាំ២០២៦ ថា ការបើកទីផ្សារ​នាំចេញ​សំបុក​ត្រចៀក​កាំ​ទៅកាន់ប្រទេសចិន គឺជាលទ្ធផលនៃកិច្ចសហការ យ៉ាង​​ជិត​ស្និទ្ធរវាងក្រសួងកសិកម្ម អគ្គរដ្ឋ​បាលគយចិន (GACC) វិស័យឯកជន និងអាជីវករ ព្រមទាំងអ្នកចិញ្ចឹមត្រចៀកកាំ​នៅទូទាំង​ប្រទេស ដែលបានរួមគ្នាលើកកម្ពស់ស្តង់ដារអនាម័យ និងគុណភាពផលិតផល ឱ្យ​ស្រប​តាម​តម្រូវ​ការអន្តរជាតិ។

សម្រាប់ក្រសួងកសិកម្ម សមិទ្ធផលនេះ ត្រូវបានរំពឹងថា នឹងជួយបង្កើនតម្លៃបន្ថែមដល់​ផលិត​ផល​សំបុកត្រចៀកកាំរបស់កម្ពុជា ពង្រីកទីផ្សារនាំចេញ បង្កើនចំណូលដល់អ្នកផលិត និង​រួម​ចំណែកជំរុញកំណើនសេដ្ឋកិច្ចជាតិ តាមរយៈការនាំចេញផលិតផលដែលមានសក្តានុពល​ទៅកាន់ទីផ្សារដ៏ធំរបស់ប្រទេសចិន៕