ដោយ៖ កែវ រតនៈ

យោងតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា នៅថ្ងៃទី១១ ខែមិថុនា ឆ្នាំ២០២៦ ឯកឧត្ដម ប៉ែន ផល្លីកា អនុរដ្ឋលេខាធិការ​ក្រសួង​កសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្ដមរដ្ឋមន្ត្រី ឌិត ទីណា បានដឹកនាំក្រុមការងារចម្រុះចុះទប់ស្កាត់ និងបង្ក្រាបបទល្មើសជលផល នៅចំណុចលំហទន្លេសាប មុខព្រែកជើងលោង និងព្រែកទាល់ ក្នុងខេត្តកំពង់ធំ ។

ក្នុងដំណើរបេសកកម្មនោះ ការចូលរួមពី លោក ប៉ី វិចិត្រ នាយរងអធិការខាង​ជើង​បឹងទន្លេសាប លោក ជិន ស៊ីថា នាយខណ្ឌរដ្ឋបាលជលផលកំពង់ធំ កម្លាំង​ទី​បញ្ជាការ​ស្រាលប្រចាំផាត់សណ្តាយ និងកម្លាំងយោធាអន្តរាគមន៍​ពិសេស(ភូមិភាគ៤) សរុបចំនួន ២៨នាក់ ដោយប្រើមធ្យោបាយកាណូត​ចំនួន៩គ្រឿង ចុះទប់ស្កាត់ និងបង្ក្រាបបទល្មើសជលផល។

ក្នុងប្រតិបត្តិការបង្ក្រាប ជាលទ្ធផលបាន២ករណី៖ ទី១.បានរុះរើ និងបំផ្លាញ​ចោល​របាំងសាច់អួនក្រឡា ញឹក ១២របាំង ដែលមានប្រវែងស្មើនឹង១២០០ម៉ែត្រ ទ្បុកចំនួន២០គ្រឿង លប/លូចំនួន២០មាត់បង្គោលចំរឹងចំនួន១០០០ដើម ករណីទី២. កាប់បំផ្លាញចោលឧបករណ៍លបប្រើស១០០ឬលបកន្ទុយ​កណ្ដុរ​២៥លប។

មុននឹងបញ្ចប់បេសកកម្ម ឯកឧត្តម ប៉ែន ផល្លីកា បានសម្តែងការថ្លែងអំណរគុណ និងសូមសរសើរដល់ក្រុមការងារចម្រុះរបស់យើង ដែលជានិច្ចកាលតែងតែខិតខំ​ប្រឹង​​ប្រែង ទប់ស្កាត់បទល្មើសជលផលបានយ៉ាងសកម្មដូចភ្លៀងរលឹម ជា​ពិសេស​​​កងកម្លាំងប្រដាប់អាវុធរបស់យើង ដែលតែងតែចុះល្បាត​ជាប្រចាំ​ផងដែរ៕

 រូបភាព៖ ក្រសួងកសិកម្ម