ដោយ៖ វិចិត្រ

កូនផ្សោតទន្លេមេគង្គទើបកើតថ្មីចំនួន១ក្បាល ត្រូវបានប្រទះឃើញនៅអន្លង់ផ្សោតកាំពី ក្នុង​ភូមិ​កាំពី ឃុំសំបុក ស្រុកចិត្របុរី ខេត្តក្រចេះ នាថ្ងៃទី២៧ ខែមេសា ឆ្នាំ២០២៦។ នេះបើ​តាម​ការ​ផ្សព្វ​ផ្សាយនៅលើទំព័រហ្វេសប៊ុករបស់ក្រសួងកសិកម្ម រុក្ខាប្រមាញ់ និងនេសាទនៅថ្ងៃ​ចន្ទ​នេះ​។ បើតាមក្រសួងកសិកម្ម កូនផ្សោតនេះត្រូវបានប្រទះឃើញ នៅវេលាម៉ោង១៥:២០នាទីរសៀល

ដោយក្រុមផលិតព័ត៌មាន​នៃក្រសួង​ក​សិកម្ម រុក្ខាប្រមាញ់ និងនេសាទ ហើយក៏ត្រូវបាន​ចុះ​ផ្ទៀង​ផ្ទាត់ដោយក្រុមការងារស្រាវជ្រាវនៃអគ្គនាយកដ្ឋានជលផល ខណ្ឌរដ្ឋបាល​ជលផល​ក្រចេះ និងអង្គការ WWF ផងដែរ។ ក្រោយធ្វើការផ្ទៀងផ្ទាត់រួច​ក្រុមអ្នកជំនាញបាន​កំណត់​ឱ្យ​ដឹង​ថា កូនផ្សោតនេះមានអាយុប្រមាណ៣ថ្ងៃ មានសុខភាពល្អ និងកំពុងហែលលេង​ជាមួយ​ក្រុម​សត្វផ្សោតពេញវ័យប្រមាណ ៦ក្បាល ផ្សេងទៀត។

ក្រសួងកសិកម្ម បានបញ្ជាក់ថា នេះគឺជាកូនផ្សោតទី៦ ដែលត្រូវបានកត់ត្រានៅដើមឆ្នាំ២០២៦ ។ តាមរយៈវត្តមានថ្មីនៃកូនផ្សោតនេះ បានធ្វើឱ្យចំនួនសត្វផ្សោតទន្លេមេគង្គនៅកម្ពុជា កើន​ឡើង​ដល់ចំនួនសរុប ១១៨ក្បាល។

ជាមួយគ្នានេះ ក្រសួង ក៏បានអំពាវនាវដល់ប្រជានេសាទ និងប្រជាពលរដ្ឋទាំងអស់ សូមបន្ត​កិច្ច​សហការ និងចូលរួមការពារសត្វផ្សោតដែលជារតនសម្បត្តិជាតិមានជីវិតរបស់កម្ពុជា តាម​រយៈ​ការចូលរួមថែរក្សាបរិស្ថានទន្លេ និងគោរពតាមការណែនាំរបស់ឆ្មាំទន្លេ ដើម្បីឱ្យកូន​ផ្សោត​តូចៗទាំងនេះអាចធំធាត់ដោយសុវត្ថិភាព៕