ដោយ៖ វិចិត្រ

ក្រសួងសុខាភិបាល នៅថ្ងៃព្រហស្បតិ៍នេះ បានប្រកាសថា កម្ពុជាបន្តសម្រេចបាន​សមិទ្ធ​ផល​ដ៏​សំខាន់ក្នុង​ការប្រយុទ្ធ​ប្រឆាំងជំងឺគ្រុនចាញ់ ដោយក្នុងរយៈពេល៦ខែដើមឆ្នាំ២០២៦ មិនបាន​រក​ឃើញ​ករណីឆ្លងថ្មីក្នុងស្រុកឡើយ ខណៈពុំមានករណីស្លាប់ដោយសារជំងឺនេះ ចាប់តាំង​ពី​ឆ្នាំ​២០១៨​មក។

យោងសេចក្តីប្រកាសព័ត៌មានចុះថ្ងៃទី១៦ ខែកក្កដា ឆ្នាំ២០២៦ របស់ក្រសួងសុខាភិបាល សមិទ្ធផលនេះ​គឺជាជំហានដ៏​សំខាន់ បន្ទាប់ពីប្រទេសកម្ពុជាបានលុបបំបាត់ការចម្លងជំងឺ​គ្រុន​ចាញ់​ក្នុងស្រុកចាប់តាំងពីត្រីមាសទី៣ ឆ្នាំ២០២៥ តាមរយៈការអនុវត្តផែន​ការយុទ្ធសាស្ត្រជាតិ​លុប​បំបាត់ជំងឺគ្រុនចាញ់ ឆ្នាំ២០១១-២០២៥ ប្រកបដោយប្រសិទ្ធភាព។

ក្រសួងបានបញ្ជាក់ថា ការថយចុះ១០០ភាគរយនៃករណីឆ្លងក្នុងស្រុក គឺជាលទ្ធផល​នៃការ​អនុវត្ត​វិធានការរុករក ព្យាបាល បង្ការ តាមដាន និងឆ្លើយតបរហ័សចំពោះករណីជំងឺគ្រុនចាញ់ ដោយមានកិច្ចសហការយ៉ាងជិតស្និទ្ធរវាងក្រសួងសុខាភិបាល អង្គការសុខភាពពិភពលោក (WHO) ក្រសួង ស្ថាប័នពាក់ព័ន្ធ ដៃគូអភិវឌ្ឍន៍ វិស័យឯកជន និងសហគមន៍​នៅទូទាំង​ប្រទេស​។

ទោះជាយ៉ាងណា ក្រសួងសុខាភិបាលបានព្រមានថា កម្ពុជានៅតែប្រឈមហានិភ័យពីការនាំ​ចូល​ជំងឺគ្រុនចាញ់ពីក្រៅប្រទេស និងការឆ្លងតាមរយៈសត្វស្វា ខណៈប្រទេសកំពុងស្ថិតក្នុង​ដំណាក់​កាលទប់ស្កាត់ការកកើតជំងឺឡើងវិញ ដើម្បីឈានទៅទទួលវិញ្ញាបនបត្រលុបបំបាត់​ជំងឺ​គ្រុនចាញ់ពីអង្គការសុខភាពពិភពលោកនៅឆ្នាំ២០៣០។

បច្ចុប្បន្ន កម្ពុជាកំពុងដំណើរការប្រព័ន្ធតាមដាន និងរាយការណ៍ជំងឺគ្រុនចាញ់រយៈ​ពេល​២៤​ម៉ោង (Real-time) នៅទូទាំងប្រទេស តាមរយៈបណ្តាញអ្នកស្ម័គ្រចិត្តភូមិ និងមូលដ្ឋានសុខា​ភិបាល​សាធារណៈ ដើម្បីធានាការរកឃើញ និងឆ្លើយតបបានទាន់ពេលវេលា។ ជាលទ្ធផល រហូតមកដល់ពាក់កណ្តាលឆ្នាំ២០២៦ មិនមានករណីសង្ស័យជំងឺគ្រុនចាញ់ឆ្លងក្នុងស្រុកណា​មួយត្រូវបានរកឃើញនៅតាមតំបន់ព្រំដែននោះទេ។

ជាមួយគ្នានេះ ក្រសួងសុខាភិបាលបានអំពាវនាវដល់ប្រជាពលរដ្ឋ បន្តចូលរួមបង្ការជំងឺគ្រុន​ចាញ់ដោយដេកក្នុងមុង ការពារខ្លួនពីមូសខាំ និងស្វែងរកការពិនិត្យធ្វើតេស្ត និងព្យាបាលឱ្យ​បាន​ឆាប់រហ័ស នៅពេលមានរោគសញ្ញាសង្ស័យ ដើម្បីរក្សាសមិទ្ធផលនៃការលុបបំបាត់​ជំងឺ​គ្រុនចាញ់ និងទប់ស្កាត់ការកើតមានជំងឺឡើងវិញ៕