ដោយ៖ វិចិត្រ

ក្រសួងបរិស្ថាន នៅថ្ងៃទី១៣ ខែកក្កដា ឆ្នាំ២០២៦ បានតម្រូវឱ្យក្រុមហ៊ុន FANG XING GARMENT CO., LTD. ដែលមានទីតាំងនៅរាជធានីភ្នំពេញ កែតម្រូវការបំពុលខ្យល់ និងទទួលរងការពិន័យតាមច្បាប់ បន្ទាប់ពីមន្ត្រីជំនាញរកឃើញការដុតកម្ទេចក្រណាត់ក្នុងឡចំហាយ និងការបញ្ចេញផ្សែងលើសស្តង់ដាគុណភាពខ្យល់។

លទ្ធផលនៃការចុះអធិការកិច្ចបានបង្ហាញថា ក្រុមហ៊ុនបានប្រើប្រាស់កម្ទេចក្រណាត់ជាឥន្ធនៈសម្រាប់ឡចំហាយ បណ្តាលឱ្យមានការបញ្ចេញផ្សែងលើសស្តង់ដាដែលច្បាប់កំណត់ ហើយពុំបានបំពាក់ប្រព័ន្ធសម្អាតផ្សែងត្រឹមត្រូវ។

ជាមួយគ្នានេះ មន្ត្រីជំនាញក៏បានរកឃើញថា ក្រុមហ៊ុនពុំមានកិច្ចសន្យាការពារបរិស្ថាន និងលិខិតអនុញ្ញាតបញ្ចេញសំណល់តាមបទប្បញ្ញត្តិជាធរមាន។

ក្រសួងបរិស្ថានបានបញ្ជាឱ្យក្រុមហ៊ុនបញ្ឈប់ការដុតកម្ទេចក្រណាត់ក្នុងឡចំហាយជាបន្ទាន់ បំពាក់ប្រព័ន្ធសម្អាតផ្សែងឱ្យស្របតាមស្តង់ដាបច្ចេកទេស រៀបចំឯកសារផ្លូវច្បាប់ពាក់ព័ន្ធឱ្យបានត្រឹមត្រូវ និងអនុវត្តតាមការណែនាំរបស់មន្ត្រីជំនាញ។ ទន្ទឹមនឹងនេះ ក្រុមហ៊ុនត្រូវទទួលរងការពិន័យតាមច្បាប់ និងសងសំណងចំពោះផលប៉ះពាល់ដល់សុខភាពសាធារណៈ និងបរិស្ថាន ស្របតាមការវាយតម្លៃរបស់មន្ត្រីជំនាញ៕