ដោយ៖ វិចិត្រ

ក្រសួងធនធានទឹក និងឧតុនិយម បានជូនដំណឹងថា សម្ពាធទាបនៅលើមហាសមុទ្រប៉ាស៊ីហ្វិកខាងលិច បានវិវត្តទៅជាព្យុះទី១១ ឈ្មោះ ហៃសិន (Haishen) ដែលកំពុងមានឥទ្ធិពលលើរបបខ្យល់មូសុងនិរតី បក់គ្របដណ្តប់លើឈូងសមុទ្របេងហ្គាល សមុទ្រអាន់ដាម៉ាន់ សមុទ្រចិនខាងត្បូង អាងទន្លេមេគង្គ សមុទ្រកម្ពុជា និងប្រទេសកម្ពុជា។

លិខិតជូនដំណឹងរបស់ក្រសួងធនធានទឹក និងឧតុនិយម ចុះថ្ងៃទី១៣ ខែកក្កដា ឆ្នាំ២០២៦ បានបញ្ជាក់ថា កម្ពុជាមិនស្ថិតក្នុងគន្លងផ្លូវដើររបស់ព្យុះ ហៃសិន នោះទេ ប៉ុន្តែឥទ្ធិពលរបស់វានឹងបន្តរហូតដល់ថ្ងៃទី១៧ ខែកក្កដា ឆ្នាំ២០២៦។ ដោយឡែក ព្យុះទី៩ បាវី (Bavi) ត្រូវបានព្យាករថានឹងរលាយបាត់នៅថ្ងៃទី១៥ ខែកក្កដា ឆ្នាំ២០២៦។

បើតាមការព្យាករពីថ្ងៃទី១៤ ដល់ថ្ងៃទី១៨ ខែកក្កដា ឆ្នាំ២០២៦ តំបន់វាលទំនាបមួយចំនួន រួមមាន រាជធានីភ្នំពេញ និងខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្តាល តាកែវ និងស្វាយរៀង អាចមានភ្លៀងធ្លាក់ ខ្យល់កន្ត្រាក់ និងផ្គររន្ទះគ្របដណ្តប់ប្រមាណ ៥០ភាគរយនៃផ្ទៃដី។

ចំណែកតំបន់ខ្ពង់រាប និងតំបន់មាត់សមុទ្រ អាចមានភ្លៀងធ្លាក់ច្រើនជាង ដោយគ្របដណ្តប់ប្រមាណ ៧០ភាគរយនៃផ្ទៃដី អមដោយខ្យល់កន្ត្រាក់ និងផ្គររន្ទះ។ សម្រាប់តំបន់សមុទ្រ រលកអាចមានកម្ពស់ពី ០,៥០ ម៉ែត្រ ដល់ ១,៧៥ ម៉ែត្រ។

ក្រសួងធនធានទឹក និងឧតុនិយម អំពាវនាវឱ្យប្រជាពលរដ្ឋបង្កើនការប្រុងប្រយ័ត្នខ្ពស់ចំពោះភ្លៀង ផ្គររន្ទះ និងខ្យល់កន្ត្រាក់ ជាពិសេសអ្នកធ្វើដំណើរតាមផ្លូវគោក និងផ្លូវទឹក គ្រាដែលក្រសួងនឹងបន្តតាមដាន និងជូនដំណឹងបន្ថែម ប្រសិនបើមានការប្រែប្រួលស្ថានភាពអាកាសធាតុ៕