ដោយ៖ វិចិត្រ

អ្នកដើរព្រៃ និងមន្ត្រីឧទ្យានុរក្សនៃមន្ទីរបរិស្ថានខេត្តពោធិ៍សាត់ បានប្រទះឃើញសត្វ បង្គួយបន្លាភ្នំ ឬ បង្គួយស្នែង នៅក្នុងតំបន់សក្តានុពលទេសចរណ៍លម្ហែបៃតងលើភ្នំទំព័រ នៃដែនជម្រកសត្វព្រៃភ្នំសំកុស ដែលមានកម្ពស់ប្រមាណ ១.៥៥១ម៉ែត្រ ស្ថិតក្នុងឃុំប្រម៉ោយ ស្រុកវាលវែង ខេត្តពោធិ៍សាត់។ នេះបើតាមការផ្សព្វផ្សាយឱ្យដឹងរបស់បន្ទីរបរិស្ថានខេត្តពោធិ៍​សាច់ នៅថ្ងៃទី១៥ ខែកក្កដា ឆ្នាំ២០២៦។

បើតាមមន្ទីរបរិស្ថានខេត្តពោធិ៍សាត់ ក្នុងនោះក្រុមអ្នកដើរព្រៃបានឱ្យដឹងថា សត្វប្រភេទនេះជា​ជីវ​ចម្រុះ​ដ៏កម្រ ដែលមិនសូវមានឱកាសបានជួបប្រទះ ដូច្នេះការរកឃើញនេះបានបង្ហាញពី​សក្តា​នុ​​ពល​​ជីវចម្រុះ និងស្ថានភាពប្រព័ន្ធអេកូឡូស៊ីដ៏ល្អនៅក្នុងដែនជម្រកសត្វព្រៃភ្នំសំកុស។

បង្គួយបន្លាភ្នំ ឬ បង្គួយស្នែង មានឈ្មោះវិទ្យាសាស្ត្រ Acanthosaura ដែលត្រូវបានស្គាល់​ជាទូទៅថា Mountain Horned Dragon។ វាមានលក្ខណៈពិសេសគឺមានស្នែង និងបន្លា​ស្រួចៗ​នៅលើក្បាល ព្រមទាំងមានជួរបន្លាតាមបណ្តោយខ្នង។ ខ្លួនរបស់វាមានពណ៌ត្នោត ឬពណ៌ដី ដែលអាចជួយឱ្យវាបន្លំខ្លួនជាមួយមែកឈើ ស្លឹកឈើ និងបរិស្ថានព្រៃបានយ៉ាងល្អ។

សត្វប្រភេទនេះភាគច្រើនរស់នៅក្នុងព្រៃក្រាស់ តំបន់ភ្នំ និងទីកន្លែងដែលមានសំណើមខ្ពស់ និង​អាកាសធាតុត្រជាក់។ វាមិនមានពិស និងមិនបង្កគ្រោះថ្នាក់ដល់មនុស្សឡើយ ខណៈ​អាហារ​ចម្បង​របស់វាគឺសត្វល្អិតតូចៗ។ នេះជាការបញ្ជាក់ឱ្យដឹងបន្ថែមពីមន្ទីរបរិស្ថាន​ខេត្ត​ពោធិ៍​សាត់។

សម្រាប់មន្ទីរបរិស្ថានខេត្តពោធិ៍សាត់ ការប្រទះឃើញបង្គួយបន្លាភ្នំនាពេលនេះ បានឆ្លុះបញ្ចាំង​ពីប្រសិទ្ធភាពនៃការអភិរក្ស​ធន​ធាន​ធម្មជាតិ និងជីវចម្រុះនៅក្នុងដែនជម្រកសត្វព្រៃភ្នំសំកុស ដែលជាតំបន់ការពារធម្មជាតិ​ដ៏សម្បូរបែបមួយរបស់កម្ពុជា៕