ដោយ៖ វិចិត្រ

ក្រុមអ្នកសង្កេតការណ៍អាស៊ានប្រចាំព្រះរាជាណាចក្រកម្ពុជា (AOT) នៅថ្ងៃទី១៤ ខែកក្កដា ឆ្នាំ២០២៦ បានចុះសួរសុខទុក្ខ និងពិនិត្យស្ថាន ភាពរស់នៅរបស់ប្រជាពលរដ្ឋដែលបានផ្លាស់ទីលំនៅជាបណ្តោះអាសន្ន នៅមណ្ឌលសុវត្ថិ ភាពវត្តពើងអង្កាម (វត្តបាក់កាំ) ស្ថិតក្នុងឃុំឈានមុខ ស្រុកត្បែងមានជ័យ ខេត្តព្រះវិហារ ដែល បច្ចុប្បន្នកំពុងស្នាក់នៅចំនួន ២៩៥គ្រួសារ។

យោងតាមអ្នកនាំពាក្យក្រសួងការពារជាតិ ការចុះបំពេញបេសកកម្មនេះ ត្រូវបានសម្រប សម្រួលដោយក្រុមអ្នកសម្របសម្រួល (CLG) នៃព្រះរាជាណាចក្រកម្ពុជា និងដឹកនាំដោយ ប្រធានបេសកកម្មក្រុមអ្នកសង្កេតការណ៍អាស៊ាន (AOT-KH HOM) មកពីសាធារណរដ្ឋ ហ្វីលីពីន។

ក្រសួងការពារជាតិបានឱ្យដឹងថា រហូតមកដល់ពេលនេះ ប្រជាពលរដ្ឋដែលបានផ្លាស់ទីលំនៅ នៅមិនទាន់អាចវិលត្រឡប់ទៅលំនៅដ្ឋានរបស់ខ្លួនវិញបាននៅឡើយ ដោយលើកឡើងថា នៅមានការចូលកាន់កាប់ទឹកដីកម្ពុជាដោយខុសច្បាប់ពីសំណាក់កងកម្លាំងយោធាថៃនៅតំបន់មួយចំនួន រួមទាំងការរាយបន្លាលួស ដាក់ទូកុងតឺន័រ និងការខូចខាតផ្ទះសម្បែងរបស់ប្រជា ពលរដ្ឋ។

សេចក្តីប្រកាសបញ្ជាក់ថា ការចុះសង្កេតការណ៍ និងផ្ទៀងផ្ទាត់ស្ថានភាពជាក់ស្តែងរបស់ក្រុម​អ្នកសង្កេតការណ៍អាស៊ាន បានបង្ហាញពីភាពចាំបាច់ក្នុងការពន្លឿនការចាប់ផ្តើម​ការងារវាស់​វែង និងខ័ណ្ឌសីមាព្រំដែន ដោយគណៈកម្មការចម្រុះខ័ណ្ឌសីមាព្រំដែនគោក (JBC) កម្ពុជា-ថៃ ឱ្យបានឆាប់បំផុត ស្របតាមកិច្ចព្រមព្រៀងដែលមានស្រាប់ ដើម្បីអនុញ្ញាតឱ្យប្រជាពលរដ្ឋអាចវិលត្រឡប់ទៅលំនៅដ្ឋានវិញដោយសុវត្ថិភាព និងមានកិត្តិយស។

ជាមួយគ្នានេះ កម្ពុជាបានអះអាងជាថ្មីនូវជំហរម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដោយគោរពតាមគោលការណ៍ច្បាប់អន្តរជាតិ គោលការណ៍ Uti Possidetis Juris អនុសញ្ញា សន្ធិសញ្ញា ផែនទី និងឯកសារពាក់ព័ន្ធដែលភាគីទាំងពីរបានឯកភាពគ្នាកន្លងមក ហើយបញ្ជាក់ថា កម្ពុជាមិនទទួលស្គាល់ការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងឡើយ៕