ក្រសួងសុខាភិបាល នៅថ្ងៃទី៨ ខែកក្កដា ឆ្នាំ២០២៦ បានចេញសេចក្តីណែនាំក្រើនរំឮក ដល់​ប្រជាពល​រដ្ឋ អាជ្ញាធរមូលដ្ឋាន និងភាគីពាក់ព័ន្ធទាំងអស់ ឱ្យបង្កើនការប្រុងប្រយ័ត្ន និង​អនុ​វត្ត​វិធាន​ការ​បង្ការជំងឺគ្រុនឈាម ក្នុងរដូវវស្សា ព្រមទាំងបញ្ជូនអ្នកជំងឺទៅទទួលការព្យាបាលនៅ មន្ទីរពេទ្យ​ឱ្យ​បានទាន់ពេល​វេលា ដើម្បីកាត់បន្ថយអត្រាឈឺ និងស្លាប់។

ក្នុងនោះក្រសួងបានបញ្ជាក់ថា រដូវវស្សាបង្កឱ្យមានវត្ថុដក់ទឹកជាច្រើន ដែលជាកន្លែង​បង្កាត់​ពូជ​មូសខ្លា ស្របពេលកម្ពុជាកំពុងទទួលឥទ្ធិពលបាតុភូត El Niño ដែលអាច​ជំរុញ​ឱ្យចំ​នួន​មូស​ខ្លា និងករណីជំងឺគ្រុនឈាមកើនឡើង។ ហេតុដូចនេះ ការចូលរួមរបស់ប្រជាពលរដ្ឋ គ្រួសារ និង​សហ​គម​ន៍ មានសារៈសំខាន់ក្នុងការទប់ស្កាត់ការរាតត្បាតនៃជំងឺនេះ។

ក្រសួងណែនាំឱ្យប្រជាពលរដ្ឋ ត្រូវប្រញាប់ទៅមណ្ឌលសុខភាព ឬមន្ទីរពេទ្យដែលនៅជិតបំ​ផុត ប្រសិនបើមានរោគសញ្ញាគ្រុនក្តៅខ្លាំងពី ៣៩ ទៅ ៤០ អង្សាសេ ជាពិសេសក្នុងរយៈពេល ៤៨ ម៉ោងដំបូង។

ជាមួយគ្នានេះ ក្រសួងក៏បានអំពាវនាវឱ្យសហគមន៍ចូលរួមលុបបំបាត់ប្រភពបង្កាត់ពូជមូសខ្លា ដោយសម្អាតទីកន្លែងដក់ទឹក ផ្លាស់ប្តូរទឹកក្នុងពាង និងអាងទឹកជាប្រចាំ គ្របធុងទឹកឱ្យជិត កម្ចាត់សម្ភារចាស់ៗដែលអាចដក់ទឹក ព្រមទាំងប្រើវិធានការការពារខ្លួន ដូចជា គេងក្នុងមុង ស្លៀក​ពាក់សម្លៀកបំពាក់ការពារ និងប្រើថ្នាំបាញ់ ឬថ្នាំលាបការពារមូស។

លើសពីនេះ ក្រសួងបានជំរុញឱ្យម្ចាស់ការដ្ឋានសំណង់ និងអាជីវករលក់សំបកកង់ ចាត់ចែង​សម្ភារ និងបរិវេណអាជីវកម្មឱ្យបានស្អាត មិនឱ្យមានទឹកដក់ ដែលអាចក្លាយជាប្រភពបង្កាត់​ពូជ​មូស ខណៈមន្ទីរសុខាភិបាលរាជធានី-ខេត្តទាំង២៥ ត្រូវសហការជាមួយអាជ្ញាធរពាក់ព័ន្ធ ចុះត្រួតពិនិត្យ និងជំរុញការអនុវត្តវិធានការបង្ការឱ្យមានប្រសិទ្ធភាព។

ក្រសួងសុខាភិបាលអំពាវនាវឱ្យប្រជាពលរដ្ឋទាំងអស់ ចូលរួមអនុវត្តវិធានការបង្ការជំងឺ​គ្រុន​ឈាម​ឱ្យ​បានខ្ជាប់ខ្ជួន ដើម្បីការពារសុខភាពផ្ទាល់ខ្លួន ក្រុមគ្រួសារ និងសហគមន៍៕