តំបន់គ្រប់គ្រងសត្វផ្សោតទន្លេមេគង្គទំហំជាង១ហិកតា ក្នុងខេត្តស្ទឹងត្រែង បានចុះបញ្ជីដីធ្លីរួចរាល់ជាស្ថាពរ

7 ម៉ោងមុន

ដោយ៖ វិចិត្រ

ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា តំបន់គ្រប់គ្រងសត្វផ្សោតទន្លេមេគង្គ(តំបន់ស្នូលទី២) ក្នុងទំហំជាងមួយហិកតា (១០៨៧៣,៣៥) ក្នុងខេត្តស្ទឹងត្រែង បានចុះបញ្ជីរួចរាល់ជាស្ថាពរ។ បើតាមក្រសួងកសិកម្ម នេះគឺជាសមិទ្ធផលដ៏សំខាន់មួយទៀត ក្នុងការការពារសម្បត្តិធម្មជាតិរបស់កម្ពុជា។

នៅថ្ងៃចន្ទម្សិលមិញ ក្រសួងកសិកម្ម បានបញ្ជាក់ថា កិច្ចសហប្រតិបត្តិការយ៉ាងជិតស្និទ្ធរវាងអគ្គនាយកដ្ឋានជលផលនៃក្រសួងកសិកម្ម រដ្ឋបាលថ្នាក់ក្រោមជាតិ អាជ្ញាធរពាក់ព័ន្ធ អង្គការ WWF និងឆ្មាំទន្លេ ក្នុងការការពារ និងការអភិរក្ស បានធ្វើឱ្យមានកំណើនចំនួនផ្សោតជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ ហើយការចុះបញ្ជីដីធ្លីនេះនឹងធ្វើឱ្យការគ្រប់គ្រងតំបន់អភិរក្សកាន់តែមានប្រសិទ្ធភាព។

តាមរយបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ គិតត្រឹមថ្ងៃទី២៧ ខែមេសា ឆ្នាំ២០២៦ ចំនួនសត្វផ្សោតទន្លេមេគង្គនៅកម្ពុជាមានចំនួនសរុប ១១៨ក្បាល គ្រាដែលក្នុងឆ្នាំ ២០២៦នេះមានកូនសត្វផ្សោតចំនួន៦ក្បាលត្រូវបានក្រុមអ្នកជំនាញប្រទះឃើញ និងកត់ត្រាជាបន្តបន្ទាប់។

ក្នុងនោះក្រសួងកសិកម្ម រុក្ខាប្រមាញ់ និងនេសាទ បញ្ជាក់ថា ការរក្សាបាននូវទីជម្រកប្រកបដោយសុវត្ថិភាព គឺជាការធានាថាស្នាមញញឹមនៃទន្លេមេគង្គនឹងនៅបន្តវត្តមានសម្រាប់កូនចៅជំនាន់ក្រោយ៕