ដោយ៖ កែវ រតនៈ

ក្រសួងបរិស្ថានឱ្យដឹងថា​ថ្ងៃទី៣ ខែកញ្ញា ឆ្នាំ២០២៦ លោក អ៊ុយ កាម៉ាល អគ្គនាយករង និងជាអនុប្រធានលេខាធិការដ្ឋានរេដបូកជាតិ និងកិច្ចការឥណទានកាបូន បានចូលរួមជាអធិបតីក្នុង សិក្ខាសាលាពិគ្រោះយោបល់ ស្ដីពីការប្រើប្រាស់ដី ការប្រែប្រួលការប្រើប្រាស់ដី និងព្រៃឈើ (LULUCF) ក្នុងតំបន់អាស៊ាន សម្រាប់ករណីសិក្សារបស់មជ្ឈមណ្ឌលតំបន់អាស៊ីអាគ្នេយ៍សម្រាប់ការសិក្សា និងការស្រាវជ្រាវផ្នែកកសិកម្ម (SEARCA) ក្នុងតំបន់គម្រោងរេដបូកកែវសីមា នៃដែនជម្រកសត្វព្រៃកែវសីមា ដោយមានការអញ្ជើញចូលរួមពី លោក ងិន សុវិមាន អភិបាលនៃគណៈអភិបាលខេត្តមណ្ឌលគីរី លោក ហង់ ចាន់ឌី អភិបាលរងនៃគណៈអភិបាលខេត្តក្រចេះ មន្ទីរបរិស្ថានខេត្ត រដ្ឋបាលខេត្ត អង្គការGIZ អង្គការSEARCA អង្គការWCS និងប្រជាសហគមន៍តំបន់ការពារធម្មជាតិក្នុងតំបន់រេដបូកកែវសីមា។

សិក្ខាសាលានេះរៀបចំឡើងក្នុងគោលបំណង៖ ផ្ទៀងផ្ទាត់ទិន្នន័យលំហ៖ ផ្ទៀងផ្ទាត់ផែនទីគម្របដីដែលទទួលបានពីផ្កាយរណប ឱ្យមានភាពសុក្រឹតបំផុត ដោយប្រៀបធៀបជាមួយកំណត់ត្រាផ្លូវការរបស់ក្រសួង និងការយល់ដឹងជាក់ស្តែងនៅក្នុងមូលដ្ឋាន ដើម្បីកែតម្រូវរាល់ព័ត៌មានដែលមិនទាន់ស៊ីសង្វាក់គ្នា។ សិក្សាអំពីកត្តាជំរុញតាមប្រវត្តិកាល៖ រៀបចំឡើងវិញនូវប្រវត្តិនិងមូលហេតុសំខាន់ៗដែលនាំឱ្យមានការផ្លាស់ប្តូរ​ផ្ទៃដីព្រៃឈើ​នាពេលកន្លងមក ជាពិសេសពាក់ព័ន្ធនឹងសម្ពាធសេដ្ឋកិច្ច-សង្គម គម្រោងហេដ្ឋារចនាសម្ព័ន្ធ ដូចជាផ្លូវថ្នល់ និងការផ្តល់ដីសម្បទានផ្សេងៗ។ វាយតម្លៃអភិបាលកិច្ច និងគោលនយោបាយ៖ ពិនិត្យ និងវាយតម្លៃលើប្រសិទ្ធភាពនៃការអនុវត្តច្បាប់ ដើម្បីស្វែងយល់ពីបញ្ហាប្រឈមរវាងការផ្តល់ដីសម្បទានសេដ្ឋកិច្ច តំបន់អភិរក្សរេដបូក និងក្របខ័ណ្ឌនៃការចុះបញ្ជីដីធ្លីជូនសហគមន៍ជនជាតិដើមភាគតិច។ និងកំណត់ការអនុវត្តល្អៗ និងការលើកកម្ពស់គោលនយោបាយ៖ ដកស្រង់នូវរាល់បទពិសោធន៍គ្រប់គ្រងដែលទទួលបានជោគជ័យនៅមូលដ្ឋាន (ឧ​ទា. ការបែងចែកផលប្រយោជន៍ពីរេដបូក រចនាសម្ព័ន្ធក្រុមល្បាត សហគមន៍) ដើម្បីផ្តល់ជាអនុសាសន៍គោលនយោបាយ ដែលស្របទៅនឹងគោលដៅអាកាសធាតុ NDC របស់កម្ពុជា និងតំបន់អាស៊ានទាំងមូល៕

 រូបភាព៖ ក្រសួងបរិស្ថាន