ពិព័រណ៍ជាតិការងារនិងផលិតភាពការងារឆ្នាំ២០២៦ផ្តល់ឱកាសការងារជាង៣៥,០០០កន្លែងពីក្រុមហ៊ុននិងសហគ្រាស១៥០

2 ម៉ោងមុន

ដោយ៖ កែវ រតនៈ
មហាព្រឹត្តិការណ៍ការងារដ៏ធំប្រចាំឆ្នាំនឹងវិលត្រឡប់មកជួបយុវជន សិស្ស-និស្សិត និងអ្នកស្វែងរកការងារជាថ្មីទៀតហើយ ដោយនៅឆ្នាំ២០២៦នេះ ពិព័រណ៍ជាតិការងារ និងផលិតភាពការងារនឹងនាំមកនូវឱកាសការងារជាង ៣៥,០០០កន្លែងពីសហគ្រាស ក្រុមហ៊ុន និងរោងចក្រប្រមាណ ១៥០ នៅថ្ងៃទី១២-១៣ ខែកញ្ញា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។

លោក ស៊ុន មេសា អ្នកនាំពាក្យក្រសួងការងារនិងបណ្ដុះបណ្ដាលវិជ្ជាជីវៈបានថ្លែងថា ព្រឹត្តិការណ៍នេះត្រូវបានរៀបចំឡើងក្នុងគោលបំណងបង្កើតវេទិកាដ៏សំខាន់មួយសម្រាប់ភ្ជាប់រវាងអ្នកស្វែងរកការងារ និងនិយោជក ដើម្បីឱ្យយុវជន សិស្ស-និស្សិត អ្នកបញ្ចប់ការសិក្សា និងប្រជាពលរដ្ឋដែលកំពុងស្វែងរកឱកាសការងារ អាចស្វែងរកការងារសមស្របទៅតាមជំនាញ សមត្ថភាព និងចំណាប់អារម្មណ៍របស់ខ្លួនបានកាន់តែងាយស្រួល។

គួរបញ្ជាក់ថាកាលពីឆ្នាំ២០២៥ ពិព័រណ៍ការងារ និងផលិតភាពជាតិ បានប្រារព្ធធ្វើរយៈពេល២ថ្ងៃចាប់ពីថ្ងៃទី១ ដល់២ ខែវិច្ឆិកា ដោយមានការចូលរួមពីសំណាក់ក្រុមហ៊ុន សហគ្រាស ក្រសួង ស្ថាប័ន និងគ្រឹះស្ថានអប់រំបណ្តុះបណ្តាលចំនួនប្រមាណ ១៥០ ដែលបានដាក់តាំងបង្ហាញពីឱកាសការងារហូតដល់ជាង ៣ម៉ឺនកន្លែងនៅក្នុងឆ្នាំនេះ ក្នុងនោះ ចំនួនអ្នកដែលបានដាក់ CV ដោយផ្ទាល់ និងអនឡាញសរុបចំនួន ១៧,៤០៤ និងបេក្ខជនជាប់ការងារបឋម សរុបចំនួន ២,០៤១នាក់៕