ADB ប្តេជ្ញាគៀរគរថវិកា ៣០ ពាន់លានដុល្លារ ដើម្បីជួយដល់ប្រទេសអាស៊ាន

11-ឧសភា-2026 - ម៉ោង 04:06:PM

ភ្នំពេញ៖ ធនាគារអភិវឌ្ឍន៍អាស៊ី បានប្រកាសនៅថ្ងៃនេះថា ខ្លួននឹងប្រមូលថវិកាចំនួន ៣០ ពាន់លានដុល្លារអាមេរិក ត្រឹមឆ្នាំ២០៣០ ដើម្បីជួយដល់ប្រទេសអាស៊ាន ក្នុងការជំរុញអាទិភាពអភិវឌ្ឍន៍រយៈពេលវែង និងពង្រឹងភាពធន់ចំពោះវិបត្តិ និងសម្ពាធពីខាងក្រៅ។

លោក Masato Kanda ប្រធានធនាគារអភិវឌ្ឍន៍អាស៊ី បានប្រកាសការប្តេជ្ញាចិត្តនេះ ក្នុងអំឡុងការចូលរួមកិច្ចប្រជុំកំពូលអាស៊ានលើកទី៤៨ នៅទីក្រុងសេប៊ូ ដែលមេដឹកនាំអាស៊ានបានស្វាគមន៍ចំពោះភាពជាដៃគូយូរអង្វែងរបស់ ADB ជាមួយអាស៊ាន និងតួនាទីរបស់ស្ថាប័ននេះក្នុងនាមជាធនាគារសំខាន់របស់តំបន់។ លោក Kanda បានចូលរួមកិច្ចប្រជុំនេះក្នុងនាមជាភ្ញៀវកិត្តិយសរបស់ប្រធានអង្គប្រជុំ គឺ Ferdinand R. Marcos Jr. ប្រធានាធិបតីហ្វីលីពីន។

លោក Masato Kanda បានមានប្រសាសន៍ថា៖ «អាស៊ានមានអាទិភាពច្បាស់លាស់ និងមហិច្ឆតាខ្ពស់ ប៉ុន្តែបញ្ហាប្រឈមនៅពេលនេះគឺការអនុវត្ត ជាពិសេសនៅពេលដែលតំបន់កំពុងប្រឈមមុខនឹងវិបត្តិស្មុគស្មាញជាច្រើន ចាប់ពីភាពមិនច្បាស់លាស់ផ្នែកភូមិសាស្ត្រនយោបាយ រហូតដល់វិបត្តិសេដ្ឋកិច្ច។ ក្នុងនាមជាធនាគារសំខាន់របស់តំបន់ ធនាគារអភិវឌ្ឍន៍អាស៊ី កំពុងផ្តល់ហិរញ្ញប្បទាន ជំនាញ និងគម្រោងវិនិយោគទាំងវិស័យសាធារណៈ និងឯកជនតម្លៃ ៣០ ពាន់លានដុល្លារ ដើម្បីគាំទ្រដោយផ្ទាល់ដល់អាទិភាពរបស់អាស៊ាន និងផ្តល់អត្ថប្រយោជន៍យូរអង្វែងដល់ប្រជាជនក្នុងតំបន់»។

ដើម្បីកសាងភាពធន់រយៈពេលវែង ការប្តេជ្ញាចិត្តគៀករថវិកា ចំនួន៣០ ពាន់លានដុល្លាររបស់ ធនាគារអភិវឌ្ឍន៍អាស៊ី នឹងផ្តោតលើគំនិតផ្តួចផ្តើមធំៗចំនួន៥ ក្នុងតំបន់។ កញ្ចប់ហិរញ្ញប្បទាននេះរួមមានថវិកាចំនួន ៦ពាន់លានដុល្លារ សម្រាប់ពង្រឹងទីផ្សារមូលធន និង ៥ពាន់លានដុល្លារ សម្រាប់ពន្លឿនការអនុវត្តគម្រោងបណ្តាញអគ្គិសនីអាស៊ាន (ASEAN Power Grid) ដែលជាផ្នែកមួយនៃការគាំទ្ររបស់ ADB ដែលបានប្រកាសពីមុនរហូតដល់ ១០ពាន់លានដុល្លារត្រឹមឆ្នាំ២០៣៥ សម្រាប់គម្រោងនេះ។ កញ្ចប់នេះក៏រួមបញ្ចូលការវិនិយោគលើការត្រៀមខ្លួនផ្នែកបញ្ញាសិប្បនិម្មិត (AI) ការអភិវឌ្ឍសេដ្ឋកិច្ចខៀវ និងការពង្រឹងភាពធន់នៃប្រព័ន្ធទន្លេផងដែរ។

លោក កៅ គឹមហួន អគ្គលេខាធិការអាស៊ាន បានមានប្រសាសន៍ថា៖ «អាស៊ានស្វាគមន៍ការប្តេជ្ញាចិត្តកាន់តែខ្លាំងរបស់ធនាគារអភិវឌ្ឍន៍អាស៊ី ចំពោះតំបន់ និងប្រជាជនរបស់យើង។ ភាពជាដៃគូដ៏សំខាន់នេះ និងការប្តេជ្ញារបស់ធនាគារអភិវឌ្ឍន៍អាស៊ី ក្នុងការប្រមូលថវិកា ៣០ ពាន់លានដុល្លារត្រឹមឆ្នាំ២០៣០ គឺជាសញ្ញាដ៏មានអត្ថន័យនៃការជឿជាក់លើចក្ខុវិស័យរបស់អាស៊ាន និងសមត្ថភាពរបស់អាស៊ានក្នុងការសម្រេចបានលទ្ធផល។ យើងទន្ទឹងរង់ចាំធ្វើការយ៉ាងជិតស្និទ្ធជាមួយធនាគារអភិវឌ្ឍន៍អាស៊ី ក្នុងនាមជាដៃគូដែលអាចទុកចិត្តបាន ដើម្បីបម្លែងការប្តេជ្ញាចិត្តនេះឱ្យក្លាយជាលទ្ធផលជាក់ស្តែងរួមគ្នាយើងអាចពន្លឿនវឌ្ឍនភាពលើអាទិភាពរួមរបស់យើង ចាប់ពីការតភ្ជាប់ថាមពល និងភាពធន់នឹងអាកាសធាតុ រហូតដល់កំណើនប្រកបដោយបរិយាបន្នសម្រាប់ប្រជាជនទាំងអស់»។

ក្នុងកិច្ចពិភាក្សាជាមួយមេដឹកនាំអាស៊ាន លោក Kanda ក៏បានលើកឡើងអំពីផលប៉ះពាល់សេដ្ឋកិច្ចពិភពលោកដែលទាក់ទងនឹងជម្លោះនៅមជ្ឈិមបូព៌ា និងផលប៉ះពាល់លើខ្សែច្រវាក់ផ្គត់ផ្គង់។ ដើម្បីជួយស្ថិរភាពសេដ្ឋកិច្ចក្នុងតំបន់ ធនាគារអភិវឌ្ឍន៍អាស៊ីកំពុងផ្តល់ជំនួយថវិកាបន្ទាន់ដល់ប្រទេសដែលកំពុងប្រឈមសម្ពាធហិរញ្ញវត្ថុ ហើយបានដំណើរការឡើងវិញជាបណ្តោះអាសន្ននូវកម្មវិធីគាំទ្រវិស័យឯកជនសម្រាប់ការនាំចូលប្រេងឥន្ធនៈ តាមរយៈកម្មវិធីគាំទ្រហិរញ្ញប្បទានសម្រាប់ពាណិជ្ជកម្ម និងខ្សែច្រវាក់ផ្គត់ផ្គង់។

នៅថ្ងៃទី៧ ខែឧសភា លោក Kanda ក៏បានចូលរួមកិច្ចប្រជុំពិសេស BIMP-EAGA និងបានបញ្ជាក់ឡើងវិញនូវការប្តេជ្ញារបស់ ADB ក្នុងការគាំទ្រចក្ខុវិស័យឆ្នាំ២០៣៥ របស់អនុតំបន់នេះ តាមរយៈការគាំទ្រគម្រោងច្រកសេដ្ឋកិច្ច ការតភ្ជាប់បណ្តាញអគ្គិសនីអាស៊ាន និងការវិនិយោគលើសន្តិសុខស្បៀង និងការអភិរក្សប្រព័ន្ធអេកូឡូស៊ីសមុទ្រ ដើម្បីការពារជីវភាពរស់នៅរបស់ប្រជាពលរដ្ឋ។ នៅក្រៅកិច្ចប្រជុំ លោក Masato Kanda បានជួបទ្វេភាគីជាមួយមេដឹកនាំអាស៊ាន និងដៃគូក្នុងតំបន់ជាច្រើន រួមមានលោក ហ៊ុន ម៉ាណែត នាយករដ្ឋមន្ត្រីកម្ពុជា ដែលកំពុងជំរុញការធ្វើទំនើបកម្មសេដ្ឋកិច្ច ការធ្វើសមាហរណកម្មក្នុងតំបន់ និងការអភិវឌ្ឍប្រកបដោយចីរភាព លោក Prabowo Subianto ប្រធានាធិបតីឥណ្ឌូនេស៊ី ដែលផ្តោតលើកំណើនសេដ្ឋកិច្ច ការពង្រីកហេដ្ឋារចនាសម្ព័ន្ធ និងការពង្រឹងតួនាទីឥណ្ឌូនេស៊ីក្នុងតំបន់; លោក Anwar Ibrahim នាយករដ្ឋមន្ត្រីម៉ាឡេស៊ី ដែលជំរុញការកែទម្រង់សេដ្ឋកិច្ច និងកិច្ចសហប្រតិបត្តិការប្រកបដោយចីរភាព លោក Lawrence Wong នាយករដ្ឋមន្ត្រីសិង្ហបុរី ដែលផ្តោតលើនវានុវត្តន៍ ការផ្លាស់ប្តូរឌីជីថល និងភាពធន់សេដ្ឋកិច្ច និង លោក Xanana Gusmão នាយករដ្ឋមន្ត្រីទីម័រខាងកើត និងអតីតមេដឹកនាំចលនាឯករាជ្យ ដែលប្តេជ្ញាលើអភិបាលកិច្ចប្រជាធិបតេយ្យ និងសមាហរណកម្មក្នុងតំបន់។

នៅថ្ងៃទី១១ ខែឧសភា ឆ្នាំ២០២៦ ទំព័រ Facebook របស់ ធនាគារអភិវឌ្ឍន៍អាស៊ីប្រចាំកម្ពុជា បានបង្ហោះព័ត៌មានដោយសរសេរថាអំពី ជំនួបរវាងលោក Masato Kanda និងសម្តេចមហាបវរធិបតី ហ៊ុន ម៉ាណែត ក្នុងអំឡុងកិច្ចប្រជុំកំពូលអាស៊ាននៅទីក្រុងសេប៊ូ។ បន្ទាប់ពីជំនួបនេះ លោក Masato Kanda បានសរសេរនៅលើបណ្ដាញសង្គម LinkedIn ថា៖ “កម្ពុជាកំពុងបន្តសម្រេចបានវឌ្ឍនភាពអភិវឌ្ឍន៍យ៉ាងរឹងមាំ។ ខ្ញុំមានជំនួបប្រកបដោយផលិតភាពខ្ពស់ជាមួយសម្តេចធិបតី ហ៊ុន ម៉ាណែត ដើម្បីអបអរសាទរសមិទ្ធផលទាំងនេះ និងថ្លែងអំណរគុណចំពោះភាពជាដៃគូយូរអង្វែងរវាងកម្ពុជា និងធនាគារអភិវឌ្ឍន៍អាស៊ី។ ក្នុងពេលដែលពិភពលោកកំពុងប្រឈមវិបត្តិស្មុគស្មាញជាច្រើន ADB ត្រៀមខ្លួនក្នុងការបង្កើនការគាំទ្ររបស់ខ្លួន និងពង្រឹងកិច្ចសហប្រតិបត្តិការជាមួយកម្ពុជា ដើម្បីជួយប្រទេសដោះស្រាយបញ្ហាប្រឈម បន្តអាទិភាពជាតិ និងបង្កើតឱកាសពិតប្រាកដសម្រាប់ប្រជាជន”។