ដោយ៖ វិចិត្រ

តម្លៃប្រេងឥន្ធនៈលក់រាយនៅកម្ពុជា បានបន្តកើនឡើងជាបន្តបន្ទាប់ ស្របពេលតម្លៃ​ប្រេង​ឆៅ​នៅ​លើទីផ្សារអន្តរជាតិនៅតែស្ថិតក្នុងនិន្នាការកើនឡើង ដោយសារភាពតានតឹង និងជម្លោះ​នៅ​​តំបន់មជ្ឈិមបូព៌ា ដែលបន្តបង្កការព្រួយបារម្ភចំពោះការផ្គត់ផ្គង់ប្រេងសកល។

តាមការប្រកាសរបស់ក្រសួងពាណិជ្ជកម្ម អត្រាតម្លៃប្រេងឥន្ធនៈលក់រាយថ្មីនៅកម្ពុជា បាន​កើន​ឡើងទាំងសាំង និងម៉ាស៊ូត ស្របតាមការប្រែប្រួលនៃតម្លៃប្រេងនៅលើទីផ្សារ​ពិភព​លោក​។ កម្ពុជាជាប្រទេសពឹងផ្អែកលើការនាំចូលប្រេងឥន្ធនៈ ដូច្នេះការប្រែប្រួលតម្លៃប្រេងអន្តរជាតិ តែងជះឥទ្ធិពលដោយផ្ទាល់ដល់ទីផ្សារក្នុងស្រុក។

បើតាមសេចក្តីជូនដំណឹងប្រចាំសប្តាហ៍របស់ក្រសួងពាណិជ្ជកម្ម ចុះថ្ងៃទី២៨ ខែកក្កដា ឆ្នាំ​២០២៦ តម្លៃលក់រាយប្រេងឥន្ធនៈដែលត្រូវអនុវត្តចាប់ពីម៉ោង១:០០រសៀល ថ្ងៃទី២៨ ខែកក្កដា ដល់ថ្ងៃទី៤ ខែសីហា ឆ្នាំ២០២៦ គឺប្រេងសាំងធម្មតាមានតម្លៃ ៤,៥៥០រៀលក្នុងមួយ​លីត្រ ខណៈប្រេងម៉ាស៊ូតមានតម្លៃ ៥,២៥០រៀលក្នុងមួយលីត្រ។

អ្នកវិភាគបានលើកឡើងថា ការរំខានដល់ខ្សែច្រវាក់ផ្គត់ផ្គង់ប្រេង និងហានិភ័យលើផ្លូវដឹក​ជញ្ជូន​​សំ​ខាន់ៗនៅមជ្ឈឹមបូព៌ា បានជំរុញឱ្យតម្លៃប្រេងឆៅពិភពលោកបន្តហក់ឡើង ដែលអា​ច​បង្កើន​សម្ពាធអតិផរណា និងថ្លៃដើមដឹកជញ្ជូននៅបណ្តាប្រទេសនាំចូលប្រេង រួមទាំងកម្ពុជា​ផង​ដែរ។

ទន្ទឹមនឹងនេះ រាជរដ្ឋាភិបាលកម្ពុជា បានបន្តអនុវត្តវិធានការឧបត្ថម្ភ និងតាមដានស្ថាន​ភាព​ទីផ្សារ​យ៉ាងជិតស្និទ្ធ ដើម្បីកាត់បន្ថយផលប៉ះពាល់នៃការកើនឡើង​តម្លៃប្រេងឥន្ធនៈលើ​ការ​រស់​នៅ​របស់ប្រជាពលរដ្ឋ និងសកម្មភាពអាជីវកម្ម។

ការកើនឡើងនៃតម្លៃប្រេងឥន្ធនៈនេះ កំពុងបង្កក្តីបារម្ភដល់ប្រជាកសិករកម្ពុជា ខណៈរដូវធ្វើ​ស្រែ​បានចាប់ផ្តើម។ ការដំឡើងថ្លៃប្រេងសាំង និងប្រេងម៉ាស៊ូត ធ្វើឱ្យការ​ចំណាយ​លើ​ការ​ភ្ជួរ​រាស់ បូមទឹក ប្រើប្រាស់ម៉ាស៊ីនកសិកម្ម និងការដឹកជញ្ជូនកសិផលកើនឡើង ដែលបន្ថែមបន្ទុក​លើ​​ថ្លៃដើមផលិតកម្មរបស់កសិករ។

ក្រុមអ្នកជំនាញព្រមានថា ប្រសិនបើភាពតានតឹងនៅមជ្ឈឹមបូព៌ានៅតែបន្ត ឬកាន់តែធ្ងន់ធ្ងរ តម្លៃប្រេងឥន្ធនៈអាចនៅតែស្ថិតក្នុងកម្រិតខ្ពស់ ដែលនឹងបន្តដាក់សម្ពាធលើថ្លៃដើមផលិតកម្ម ការដឹកជញ្ជូន និងតម្លៃទំនិញប្រើប្រាស់នៅកម្ពុជា៕