ដោយ៖ វិចិត្រ

រដ្ឋមន្ត្រីក្រសួងរ៉ែ និងថាមពល បានអំពាវនាវឱ្យពលរដ្ឋកុំទាន់មានភាពភ័យស្លន់ស្លោ ខណៈ​មានក្រុមហ៊ុនផ្គត់ផ្គត់ប្រេងឥន្ទនៈ និងឧស្ម័ន LPG ធំមួយនៅកម្ពុជាបានប្រកាសអំពីការបាត់ បង់លទ្ធភាពនៅក្នុងការផ្គត់ផ្គង់របស់ខ្លួនលើឧស្ម័ន LPG ដល់អតិថិជនរបស់ខ្លួន។

 កាលពីពេលថ្មីៗនេះក្រុមហ៊ុនសូគីម៉ិចដែលត្រូវបានគេស្គាល់ថាជាប្រភពផ្គត់ផ្គត់ប្រេងឥន្ទនៈ និងឧស្ម័នមួយដ៏ធំក្នុងចំណោមក្រុមហ៊ុនផ្សេងទៀតនៅក្នុងប្រទេសកម្ពុជា បានប្រកាសថាខ្លួន​អស់លទ្ធភាពដើម្បីផ្គត់ផ្គង់ឧស្ម័នLPGដល់អតិថិជន នៅត្រឹមខែមេសាខាងមុខ ព្រោះក្រុម​ហ៊ុន​មិន​អាចនាំចូលឧស្ម័នLPGតាំងពីខែមីនាមក។

ការណ៍នេះបានធ្វើឱ្យមជ្ឈដ្ឋានពលរដ្ឋកម្ពុជាមានការបារម្ភជាខ្លាំងអំពីបញ្ហានៃការខ្វះហ្គាសប្រើប្រាស់នេះ ខណៈភាពតានតឹងនៃសង្រ្គាមនៅមជ្ឈិមបូព៌ានៅមិនទាន់​មានកោះត្រើយ​នៅ​ឡើយ​។   

ដើម្បីឆ្លើយតបទៅនឹងក្តីកង្វល់របស់ប្រជាពលរដ្ឋខាងលើនេះ រដ្ឋមន្ត្រីក្រសួងរ៉ែ និងថាមពល​ ឯកឧត្តម កែវ រតនៈ បាន​អំ​ពាវនាវឱ្យពលរដ្ឋកុំអាលទាន់មានការព្រួយបារម្ភ ភ័យស្លន់ស្លោនៅ ក្នុង​ស្ថានភាពនេះ ព្រោះកម្ពុជានៅមានប្រភពនៃការផ្គត់ផ្គង់​ច្រើន​ផ្សៀង​ទៀត បើទោះជាក្រុម ហ៊ុនសូគីម៉ិចបាត់បង់លទ្ធភាពនៃការផ្គត់ផ្គង់ក៏ដោយ។

តាមរយៈវីដេអូដែលបានផ្សព្វផ្សារនៅលើទំព័រហ្វេសប៊ុកផ្លូវការរបស់ខ្លួន ឯកឧត្តម កែវ រតនៈ បញ្ជាក់ថា ក្រុមហ៊ុនសូគីម៉ិច ជាក្រុមហ៊ុនមួយក្នុង​ចំណោម​ក្រុម​ហ៊ុន​ទាំង​៧​ដែល​រកស៊ីក្នុង វិស័យ​ប្រេងឥន្ទនៈ និងហ្គាសនៅប្រទេសកម្ពុជា ហើយក្រុមហ៊ុន​មួយនេះផ្គត់ផ្គត់​នូវ​ឧស្ម័ន LPG (ហ្គាស) តែចំនួន៣ភាគរយប៉ុណ្ណោះ នៅក្នុងទីផ្សារសរុប។ លោកបន្តថា បើក្រុមហ៊ុននេះ មិនអាចផ្គត់ផ្គង់ដល់អតិថិជនខ្លួនចាប់ពីខែមេសាទៅ ហើយមិនអាចរកប្រភពឧស្ម័ន LPG បន្ថែមទៀតក៏ដោយ កម្ពុជាក៏នៅតែមានប្រភពមួយចំនួនធំទៀតដែលអាចផ្គត់ផ្គង់បាន ដោយ គ្មានការព្រួយបារម្ភ៕