អត្ថបទ៖ សំនៀង

នៅក្នុងសេចក្ដីជូនដំណឹងរបស់មន្ទីរពាណិជ្ជកម្មខេត្តតាកែវ ចុះថ្ងៃទី២៩ ខែកញ្ញា ឆ្នាំ២០២៥ បានឱ្យដឹងថា មន្ទីរពាណិជ្ជកម្មខេត្ត បានកំពុងអនុវត្តគម្រោងជំរុញទីផ្សារសម្រាប់កសិកម្មខ្នាតតូច(AIMS)។ ការរៀបចំផ្សារផលិតផលខ្មែរ ជាសកម្មភាពអាទិភាពមួយនៃគម្រោង(AIMS) ដើម្បីលើកកម្ពស់តម្លៃ សរុបនៃផលិតផលកសិកម្មនៅលើទីផ្សារ និងជាការតាំងលក់ផលិតផលរបស់ក្រុមផលិត ដែលបានទទួលការគាំទ្រពីគម្រោងក្នុងការអភិវឌ្ឍខ្សែច្រវាក់តម្លៃ ដើម្បីបង្កើនប្រាក់ចំណេញដល់ក្រុមកសិករផលិត និងអាជីវករ។

បើតាមសេចក្ដីជូនដំណឹង ការអនុវត្តសាកល្បង ផ្សារផលិតផលខ្មែរខេត្តតាកែវ (ផ្សារចុងសប្តាហ៍) រយៈពេល៣(បី)ខែ ត្រូវធ្វើនៅរៀងរាល់ថ្ងៃសៅរ៍ និងថ្ងៃអាទិត្យ ដោយនឹងចាប់ផ្តើមអនុវត្តន៍ចាប់ពីសប្តាហ៍ទី១ នៃខែតុលា ត្រូវនឹងថ្ងៃទី៤ និងទី៥ ខែតុលា ឆ្នាំ២០២៥ នេះតទៅ ដែលមានទីតាំងស្ថិតនៅលើសួនច្បារទល់មុខរោងមហោស្របខេត្ត។មន្ទីរពាណិជ្ជកម្មខេត្តតាកែវ បានអំពាវនាវឱ្យសាធារណៈជនចូលរួមជួយគាំទ្រផលិតផលខ្មែរ ស្នាដៃកសិករខ្មែរ ដែលជាផលិតផលក្នុងខេត្តតាកែវ ដើម្បីលើកកម្ពស់ផលិតផលក្នុងស្រុកឱ្យបានច្រើន៕