ដោយ៖ កែវ រតនៈ

យោងតាមការផ្សព្វផ្សាយរបស់ បេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ ហៅកាត់ ប.ស.ស. បានឱ្យដឹងថា  នាព្រឹកថ្ងៃទី៣១ ខែសីហា ឆ្នាំ២០២៦នេះប.ស.ស.  បានរៀបចំសិក្ខាសាលា “ប្រមូលធាតុចូលលើលក្ខខណ្ឌ បែបបទ និងនីតិវិធីនៃភាពជាដៃគូរវាង ប.ស.ស. និងភាគីផ្ដល់សេវា” ក្រោមអធិបតីភាព ឯកឧត្តមបណ្ឌិត ជួប ឋិតឋេរឫទ្ធិ អនុរដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ នៅទីស្នាក់ការកណ្ដាល ប.ស.ស. រាជធានីភ្នំពេញ ដោយមានការចូលរួមពីភាគីពាក់ព័ន្ធ សរុបប្រមាណជាង ១០០នាក់។

ថ្លែងក្នុងកម្មវិធីបើកសិក្ខាសាលានោះ ឯកឧត្ដមបណ្ឌិតអនុរដ្ឋលេខាធិការ បានលើកឡើងថា រាជរដ្ឋាភិបាលកម្ពុជា តែងតែចាត់ទុកការអភិវឌ្ឍមូលធនមនុស្ស និងសុខុមាលភាពរបស់ប្រជាពលរដ្ឋជាអាទិភាពចម្បង តាមរយៈការអនុវត្តរបបសន្តិសុខសង្គម ដោយបានពង្រីកវិសាលភាពយ៉ាងទូលំទូលាយ ដើម្បីធានាបាននូវស្ថិរភាពប្រាក់ចំណូល ក្នុងការអភិវឌ្ឍសង្គម សេដ្ឋកិច្ចជាតិប្រកបដោយចីរភាព និងបរិយាបន្ន។

ជាមួយគ្នានោះដែរ ឯកឧត្តមបណ្ឌិតអនុរដ្ឋលេខាធិការ បានបន្ថែមទៀតថា ការផ្តល់សេវាជូនសមាជិក ប.ស.ស. ប្រកបដោយភាពត្រឹមត្រូវ ឆាប់រហ័ស និងតម្លាភាព គឺជាចំណុចសំខាន់ដែលធ្វើឱ្យការអនុវត្តរបបសន្តិសុខសង្គមទទួលបានជោគជ័យ។

ជាទីបញ្ចប់ ឯកឧត្តមបណ្ឌិតអនុរដ្ឋលេខាធិការ បានផ្ដាំផ្ញើ និងស្នើដល់អង្គសិក្ខាសាលាទាំងមូល សូមចូលរួមផ្លាស់ប្ដូរមតិយោបល់ និងពិភាក្សាគ្នាដោយបើកចំហ ត្រង់ទៅត្រង់មក និងប្រកបដោយស្មារតីទទួលខុសត្រូវខ្ពស់ ដើម្បីធ្វើឱ្យសេចក្ដីព្រាងប្រកាសនេះមានលក្ខណៈគ្រប់ជ្រុងជ្រោយ និងធានាផលប្រយោជន៍ជូនដល់សមាជិក ប.ស.ស. គ្រប់រូប៕

 រូបភាព៖ ប.ស.ស.