អត្ថបទ៖ សំនៀង

យោងតាមការចុះផ្សាយរបស់សហព័ន្ធស្រូវអង្ករកម្ពុជា (CRF) បានឱ្យដឹងថា នៅក្នុងឆមាសទី១ឆ្នាំ២០២៥ កម្ពុជាបាននាំចេញអង្ករបានចំនួន ៣៨៧ ០៧០​តោន​ ដែលគិតជាទឹកប្រាក់ជាង២៨៣លានដុល្លារអាមេរិកទៅកាន់ទីផ្សារចំនួន៦៣នៅជុំវិពិភពលោក​។​

បើតាមព័ត៌មានដដែលបានឱ្យដឹងថា ប្រទេសដែលកម្ពុជានាំអង្ករទៅមានដូចជា ប្រទេសចិន ​និងហុងកុង ចំនួន ៩០ ៦៦៥ តោន គិតជាទឹកប្រាក់ចំនួន ៥៣.២៥ លានដុល្លារសហរដ្ឋអាមេរិក ទៅកាន់ប្រទេសក្នុងអាស៊ាន ចំនួន ៧ ប្រទេសបានបរិមាណចំនួន  ៥២ ៨៩០ តោន​ គិតជាទឹកប្រាក់ចំនួនជាង ៣៧ លានដុល្លារសហរដ្ឋអាមេរិក និងទៅកាន់គោលដៅ ៣២ ប្រទេសផ្សេងទៀតមាន អាហ្វ្រិក   មជ្ឈឹម បូព៌ា អាមេរិក  កាណាដា  អូស្ត្រាលី  ញ៉ូហ្សេឡេន បានចំនួន   ៤៨ ៧៨៥ តោន គិតជាទឹកប្រាក់ចំនួន  ៤២.៤២ លានដុល្លារសហរដ្ឋអាមេរិក។ ចំពោះប្រភេទអង្ករ ដែលបាននាំចេញមានអង្ករក្រអូបចំនួន ៧៥​% ប្រភេទអង្ករសគ្រាប់វែង ១៩.៦៨% អង្ករចំហ៊ុយ ២.៤៩% អង្ករសរីរាង្គចំនួន ២.១៣%  និងអង្ករផ្សេងៗចំនួន ០.៧%។

ជាមួយគ្នានេះ កម្ពុជាក៏បាននាំចេញស្រូវសើមចំនួន ៥ ១៨០ ១៥៥ តោន ដែលគិតជាទឹកប្រាក់ប្រមាណ ១ ៤៩៦ លានដុល្លារសហរដ្ឋអាមេរិក។

គួរបញ្ជាក់ថា សម្រាប់រយៈពេល ១២ខែ នៃឆ្នាំ២០២៤ កម្ពុជាបាននាំចេញអង្ករបានចំនួន ៦៥១ ៥២២តោន ទៅក្រៅប្រទេសដោយអាចរកបានចំណូលបាន៤៩១.១៩លានដុល្លារសហរដ្ឋអាមេរិក៕