អត្ថបទ៖ សំនៀង

ឯកឧត្តម បណ្ឌិត ម៉ៅ ធនិន អភិបាលនៃគណៈអភិបាលខេត្តកំពត បានអញ្ជើញជាអធិបតីក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋចំនួន២ឃុំ នៅបរិវេណវត្តសិរីជ័យមានលក្ខណ៍ នៅថ្ងៃទី២៣ ខែមេសា​ ឆ្នាំ២០២៥។ ពិធីនេះមានការអញ្ជើញចូលរួមពីក្រុមប្រឹក្សាភិបាលខេត្ត អភិបាលរងខេត្ត ប្រធានមន្ទីរ អង្គភាពជុំវិញខេត្ត ក្រុមប្រឹក្សាភិបាលស្រុក អភិបាល/អភិបាលរងស្រុក អាជ្ញាធរមូលដ្ឋានភូមិ ឃុំ និងប្រជាពលរដ្ឋប្រមាណ​ ៨៥០នាក់។

យោងតាមរបាយការណ៍របស់លោក ព្រាប សុផាត ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពតបានឱ្យដឹងថា​ ការរៀបចំពិធីចែកវិញ្ញាបនបត្រសម្គាល់ម្ចាស់អចលនវត្ថុជូនបងប្អូនប្រជាពលដ្ឋចំនួន ៦ ០៣៧ ប័ណ្ណ ស្ថិតក្នុងភូមិល្អាង ឃុំល្អាង ភូមិស្នោរតូច និងភូមិពន្លៃ ឃុំអង្គរមាស ស្រុកដងទង់ ខេត្តកំពត ក្រោមអធិបតីភាព​ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត។

គួរបញ្ជាក់​ថា តាមទិន្នន័យរបស់ក្រសួងរៀបចំដែន​ដី​ នគរូបនីយកម្ម និងសំណង់ បានឱ្យដឹងថា គិតត្រឹមថ្ងៃទី៨ ខែមករា ឆ្នាំ២០២៥ ក្រសួង​វាស់វែង​ដីធ្លីបានចំនួន ១២ ២១១ ២៥៩ក្បាលដី ក្នុងនោះចេញបណ្ណ​បាន​ចំនួន ៨ ០៣១ ២១៧បណ្ណ។ ដោយឡែក​ក្នុងអាណត្តិទី៧នៃរដ្ឋសភា ដែល​មានរយៈពេល​ជាង​១ឆ្នាំកន្លះកន្លងទៅនេះ ក្រសួងរៀបចំដែនដី​ នគរូបនីយកម្ម និងសំណង់​ វាស់វែង​បាន​ចំនួន ៣ ៦៧៥ ៦៥៦ ក្បាលដី ចេញបណ្ណ​បានចំនួន ១ ១២៩ ២៨៤​បណ្ណ​ និង​ចែកបណ្ណ​បានចំនួន ៨៤០ ៨៣៣​បណ្ណ ដោយ​ប្រើប្រាស់​កម្លាំង​ពីមន្ទីរ​ ខេត្ត​សរុប​ចំនួន ជាង​៤០០០នាក់៕