អត្ថបទ៖ វិចិត្រ

ឯកឧត្តម ម៉ៅ ធនិន អភិបាលនៃគណ:អភិបាលខេត្តកំពត នៅព្រឹកថ្ងៃទី១៨ ខែកញ្ញា ឆ្នាំ២០២៥ នេះ បានអញ្ជើញចុះចែកប័ណ្ណកម្មសិទ្ធិដីជូនពលរដ្ឋចំនួន៦ ភូមិ និងពិធីប្រកាសបិទផ្សាយជាសាធារណៈនៃការវិនិច្ឆ័យចំនួន៣ភូមិ នៅបរិវេណវត្តព្រៃបន្ទាំ ស្រុកបន្ទាយមាស ខេត្តកំពត។

តាមរបាយការណ៍របស់ប្រធានមន្ទីរ រៀបចំដែនដី នគរូបនីយកម្ម សំណង់ និងសុរីយោដី ខេត្តកំពត ដែលបានធ្វើឡើងនៅក្នុងពិធីនោះបានឱ្យដឹងថា​ ការចែកវិញ្ញាបនបត្រសម្គាល់ម្ចាស់អចលនវត្ថុក្នុងថ្ងៃនេះជូនដល់ប្រជាពលរដ្ឋចំនួន ៦ភូមិ ដែលក្នុងនោះរួមមាន ភូមិស្រែកាន់ចិន ឃុំទូកមាសខាងកើត ភូមិព្រែកឫស្សី ភូមិសំរោងចិន ឃុំព្រៃទន្លេ ភូមិពេជ្ជនា ភូមិព្រៃបន្ទាំ និងភូមិស្រែថ្លុក នៃឃុំបន្ទាយមាសខាងកើត ដែលមានក្បាលដីសរុបចំនួន ១០.០៩៩ ក្បាលដី ស្មើនឹង ៣.៥៦១គ្រួសារ និងប្រកាសបិទផ្សាយជាធារណៈនូវឯកសារនៃការវិនិច្ឆ័យចំនួន៣ភូមិ រួមមានភូមិត្នោត ភូមិខ្នាយ នៃឃុំត្នោតចុងស្រង់ និងភូមិព្រៃទន្លេនៃ ឃុំព្រៃទន្លេ ស្រុកបន្ទាយមាស ដែលមានក្បាលដីសរុបចំនួន៤.៩៤៤ ក្បាលដី ស្មើនឹង១.៨៩៥ គ្រួសារ៕