អត្ថបទ៖ សំនៀង

ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានក្រុមការងារបច្ចេកទេសអន្តរក្រសួង សម្រាប់ការចុះបញ្ជីមន្ត្រីសាធារណៈមកក្នុង ប.ស.ស. បានដឹកនាំកិច្ចប្រជុំក្រុមការងារបច្ចេកទេសអន្តរក្រសួង សម្រាប់ការចុះបញ្ជីមន្ត្រីសាធារណៈ មកក្នុង ប.ស.ស. ដែលមានសមាជិកចូលរួមមកពីតំណាងក្រសួងមហាផ្ទៃ ក្រសួងមុខងារសាធារណៈ និងមូលនិធិជាតិជំនួយសង្គម ពិភាក្សាលើការធ្វើបច្ចុប្បន្នភាពទិន្នន័យមន្ត្រីសាធារណៈ អតីតមន្ត្រីរាជការ អតីតយុទ្ធជន និងនីតិវិធីនៃការប្រកាសបង់ភាគទានសម្រាប់មន្ត្រីផ្អែកលើកិច្ចព្រមព្រៀងការងារ នៅ ស្នាក់ការកណ្ដាល ប.ស.ស. រាជធានីភ្នំពេញ នាថ្ងៃទី២៦ ខែវិច្ឆិកា ឆ្នាំ២០២៥។

ក្នុងឱកាសដឹកនាំកិច្ចប្រជុំនេះ ឯកឧត្តម ម៉េង ហុង បានគូសបញ្ជាក់ពីសារៈសំខាន់នៃកិច្ចប្រជុំនេះ ដែលជាជំហានមួយដ៏សំខាន់ក្នុងការលើកកម្ពស់គុណភាពទិន្នន័យបច្ចុប្បន្នរបស់មន្ត្រីសាធារណៈ អតីតមន្ត្រីរាជការ និងអតីតយុទ្ធជន ក៏ដូចជានីតិវិធីនៃការប្រកាសបង់ភាគទានសម្រាប់មន្ត្រីដែលផ្អែកលើកិច្ចព្រមព្រៀងការងារ និងក្រុមគោលដៅពាក់ព័ន្ធផ្សេងៗទៀត ដែលត្រូវទទួលបានការធានាដោយរបបសន្តិសុខសង្គមបានទាន់ពេលវេលា ប្រកបដោយនិរន្តរភាព ស្របតាមគោលនយោបាយរបស់រាជរដ្ឋាភិបាល។

តាមរយៈកិច្ចប្រជុំនេះ តំណាងក្រសួង ស្ថាប័នពាក់ព័ន្ធបានផ្ដល់ធាតុចូល ពិភាក្សាយ៉ាងលម្អិត ស៊ីជម្រៅ និងបានដោះស្រាយបញ្ហាប្រឈមមួយចំនួនប្រកបដោយផ្លែផ្កា ដែលជួយសម្រួលដល់ការអនុវត្តការងារបច្ចុប្បន្នរបស់ ប.ស.ស. កាន់តែមានភាពងាយស្រួល និងឆាប់រហ័សជាងមុន និងអាចធានាបានដល់ការអនុវត្តរបបសន្ដិសុខសង្គម ព្រមទាំងការផ្ដល់អត្ថប្រយោជន៍នានាជូនដល់ក្រុមគោលដៅ ប្រកបដោយប្រសិទ្ធភាព តម្លាភាព និងទាន់ពេលវេលា៕