ដោយ៖ កែវ រតនៈ

អ្នកស្រី ខៀវ ​សារ៉ុន ប្រធានសហគមន៍រមាសហែក បានមានប្រសាសន៍ថាការដែលប្រជាកសិករអាចចូលជាសមាជិកបេឡាជាតិសន្តិសុខសង្គមតាមរយៈវិធីសាស្ត្រក្នុងប្រព័ន្ធដូចកម្មករកាត់ដេរ និងដេរស្បែកជើងនេះ ព្រោះថា​កន្លងមកពេលដែលកសិករចង់ចូលជាសមាជិកបេឡាជាតិសន្តិសុខសង្គម គឺមានភាពស្មុគ្រស្មាញដោយត្រូវមានមុខរបរផ្សេងក្រៅពីកសិករដើម្បីបំពេញនិតិវិធីទើបអាចចូលជាសមាជិកបាន ដែលការណ៍នេះធ្វើឱ្យកសិករដែលបានចូលជាសមាជិកបេឡាជាតិសន្តិសុខសង្គមមានចំនួនតិចតួច។

អ្នកស្រីបន្តថា ប្រសិននៅឆ្នាំ២០២៦ កសិករត្រូវបានបញ្ជូលឱ្យធ្វើជាសមាជិកបេឡាជាតិសន្តិសុខសង្គម​ក្នុងប្រព័ន្ធនោះ កសិករនឹងចូលជាសមាជិកកាន់តែច្រើន ព្រោះថានៅពេលដែលក្លាយសមាជិកបេឡាជាតិសន្តិសុខគឺទទួលបានអត្ថប្រយោជន៍ច្រើន។

ថ្លែងនៅក្នុង វេទិការថ្នាក់ជាតិស្ដីពី "គាំពារសង្គមដើម្បីអន្តរកាលយុត្តិធម៌ និងសកម្មភាពបរិស្ថាន" ដែលរៀបចំដោយអង្គការអុកស្វាមកម្ពុជា និងដៃគូរួមមាន CCFC នៅថ្ងៃទី ២៨ ខែវិច្ឆិកា ឆ្នាំ២០២៥ នេះ ឯកឧត្តម ហេង សុផាន់ណារិទ្ធ អគ្គនាយករង បេឡាជាតិរបបសន្តិសុខសង្គម បានលើកឡើងថា ការពិនិត្យនេះគឺដើម្បីឆ្លើយតបទៅនឹងគោលនយោបាយរបស់រាជរដ្ឋាភិបាលក្នុងការកសាងប្រព័ន្ធគាំពារសង្គមមួយដែលទូលំទូលាយ និងនិរន្តរភាពសម្រាប់ប្រជាពលរដ្ឋខ្មែរគ្រប់រូប។

ឯកឧត្តមបានបញ្ជាក់ថា៖ «ប.ស.ស. កំពុងសិក្សាពិនិត្យលើលទ្ធភាព និងយន្តការសមស្របនានា ដើម្បីធានាថា ការដាក់បញ្ចូលកសិករខ្នាតតូចនេះ នឹងផ្តល់ផលប្រយោជន៍ដល់ពួកគាត់ និងអាចអនុវត្តបានប្រកបដោយប្រសិទ្ធភាព ដោយគិតគូរពីលក្ខណៈពិសេសនៃវិស័យកសិកម្ម»។

ការសម្រេចនេះត្រូវបានគេមើលឃើញថា ជាជំហានដ៏សំខាន់មួយក្នុងការកាត់បន្ថយភាពងាយរងគ្រោះផ្នែកសេដ្ឋកិច្ចរបស់ប្រជាកសិករ និងផ្តល់នូវសន្តិសុខសុខភាព និងប្រាក់ចំណូលជាមូលដ្ឋានដល់ពួកគាត់ ស្របពេលដែលកម្ពុជាកំពុងឈានទៅមុខក្នុងដំណើរអន្តរកាលយុត្តិធម៌៕