ដោយ៖កែវ រតនៈ

ថ្លែងទៅកាន់អង្គវេទិកា​នៅ ថ្ងៃទី២៧​ ខែមីនា​ ឆ្នាំ២០២៦ឯកឧត្តមរដ្ឋមន្រ្តី​ ឯកឧត្តម​ ឌិត​ ទីណា​ រដ្ឋម​ន្រ្តីក្រសួងកសិកម្ម​ រុក្ខាប្រមាញ់​ និងនេសា​ បានលើកឡើងពីគោលនយោបាយអាទិភាពទី៥​ និងទី៦​ និងបាន​យកឱកាសនេះ​ជម្រាបពីការចូលរួមរបស់ក្រសួងកសិកម្ម​ ក្នុងកម្មវិធីកែទម្រង់ហិរញ្ញវត្ថុសាធារណៈ​ ដំណាក់កាល​ទី៤ សម្រាប់ការអភិវឌ្ឍន៍ឱ្យកាន់តែប្រសើរគណនេយ្យភាពសមិទ្ធកម្ម និងប្រសិទ្ធភាពសេដ្ឋកិច្ច ជាពិ​សេសការកំណត់នូវគោលដៅផ្សាភ្ជាប់ទៅនឹងការអនុវត្តគោលនយោបាយ និងសមិទ្ធកម្មរបស់រាជរដ្ឋាភិបាល​។

ឯកឧត្តមរដ្ឋមន្រ្តី​ បានផ្តល់ធាតុចូល​និងសង្កត់ធ្ងន់ពី "មានហូប"​ ដោយធានាបាននូវសន្តិសុខស្បៀង​ និងការជំរុញផលិតកម្មកសិផលយុទ្ធសាស្រ្ត​ ដោយ​ "មានបាន"​ គឺទ្រទ្រង់ជីវភាពរស់នៅប្រចាំថ្ងៃ​ និងជាមូលដ្ឋានសម្រាប់អ្នកជំនាន់ក្រោយចាប់យកឱកាសកសាងសមត្ថភាព​ទៅរកវិស័យឧស្សាហកម្ម​ និងសេវាកម្ម ដេីម្បីទទួលបានប្រាក់ចំណូលល្អមួយកម្រិតទៀត​ និង "មានប្រេី​​ និងមានរហូត" ពោលគឺមានផលិតផល​ និងកសិផលប្រេីប្រាស់គ្រប់គ្រាន់​ ការការពារធនធានធម្មជាតិ​ និងនិរន្តរភាពសេដ្ឋកិច្ច​ និងបរិស្ថាន។

តាមរយៈវេទិកានេះ​ ឯកឧត្តមរដ្ឋមន្រ្តី​ បានបញ្ជាក់កម្មវិធីចំនួន៣​ រួមមាន៖​ ការអភិវឌ្ឍខ្សែច្រវាក់តម្លៃកសិកម្ម​ ការគ្រប់គ្រងធនធានធម្មជាតិកសិកម្ម​ និងការ​គ្រប់គ្រង​ពង្រឹងក្រសួងស្ថាប័ន​ និងសេវាគាំទ្រផ្សេង​ៗ ដែលអនុញ្ញាតឱ្យមន្រ្តីទាំងអស់ផ្តល់សេវាសាធារណៈល្អជូនប្រជាកសិករ​ ទទួលយកបានគ្រប់ភាគីពាក់ព័ន្ធ​ និងទទួលបានផលចំណេញទាំងអស់គ្នា។

ជាទីបញ្ចប់​ ឯកឧត្តមរដ្ឋមន្រ្តី​ លើទឹកចិត្តដល់អង្គវេទិកាទាំងអស់ បើកទូលាយ​ចូលរួមពិភាក្សា​ ផ្តល់ធាតុចូលសំខាន់ៗ និងផ្តល់មតិយោបល់សមិទ្ធកម្មផ្សេងៗទៀត​ ឱ្យស្របតាមគោលដៅ​ គោលនយោបាយ​ ដើម្បីសម្រេចបានលទ្ធផលផ្លែផ្កាសម្រាប់វិស័យកសិកម្ម​កម្ពុជា៕

 រូបភាព៖  ក្រសួងកសិកម្ម