ដោយ៖ សំនៀង

មន្ទ្ីរសារធារណៈការ និងដឹកជញ្ជូនខេត្តស្វាយរៀង បានបើកពិធីសម្ពោធដាក់ឱ្យដំណើរការជាផ្លូវការ នូវរោងចក្រប្រព្រឹត្តកម្មទឹកស្អាតអណ្តូងតាសី និងបើកការដ្ឋានសាងសង់គម្រោងពង្រីកហេដ្ឋារចនាសម្ព័ន្ធ ទឹកស្អាតបន្ថែម សម្រាប់ខេត្តចំនួន៥ ក្រោមអធិបតីភាពដ៏ខ្ពង់ខ្ពស់​សម្តេចមហាបវរធិបតី​ ហ៊ុន​ ម៉ាណែត​ នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃព្រហស្បតិ៍ ទី២៦ ខែមីនា ២០២៦។

ប្រធាន​មន្ទីរសាធារណៈការ និងដឹកជញ្ជូនខេត្តស្វាយរៀង លោក យន់ រស្មី បានលើកឡើងនៅក្នុងពិនោះថា​ រោងចក្រថ្មីនេះមានសមត្ថភាពផលិតទឹកស្អាត ៦.៨០០ ម៉ែត្រគូបក្នុងមួយថ្ងៃ​។ លោកបន្តថា រោងចក្រ​ប្រព្រឹត្ត​កម្មទឹកស្អាត និងហេដ្ឋារចនាសម្ព័ន្ធថ្មីទាំងនេះ នឹងអនុញ្ញាតឱ្យរដ្ឋាករទឹកស្វាយរៀងមានលទ្ធភាព​ផ្តល់សេវាទឹកស្អាតពេញលេញសម្រាប់ពលរដ្ឋក្នុងក្រុងស្វាយរៀងទាំងមូល និងពង្រីកអត្រាគ្របដណ្តប់​ក្នុង​តំបន់សេវារបស់ខ្លួន ពី៣២% ទៅ ៥៨%។

លោក យន់ រស្មី បានឱ្យដឹងបន្ថែមថា ទន្ទឹមនឹងនេះរដ្ឋាភិបាលក៏បានប្រកាសបើកការដ្ឋានសាងសង់​គម្រោង​ពង្រីកហេដ្ឋារចនាសម្ព័ន្ធទឹកស្អាតក្នុងខេត្តចំនួន៥ គឺខេត្តស្វាយរៀង ពោធិ៍សាត់ កំពង់ធំ កំពត និងមណ្ឌលគិរី ដែលជាគម្រោងហិរញ្ញប្បទានដោយថវិកាជាតិ ក្រោមទុនវិនិយោគសរុប ៦០លាន​ដុល្លារ​អាមេរិក។ គម្រោងនេះនឹងបង្កើនសមត្ថភាពផលិតទឹកស្អាតសម្រាប់ខេត្តទាំង៥ សរុបប្រមាណ ១៣.៦០០ ម៉ែត្រគូបក្នុងមួយថ្ងៃ ពង្រីកបណ្តាញចែកចាយទឹកស្អាតប្រវែង ៧៣៩ គីឡូម៉ែត្រ ផ្តល់តំណទឹក​ស្អាតថ្មី​ចំនួន ២៨.៦៦០ គ្រួសារ ដោយគ្រោងអនុវត្តរយៈពេល២០ខែ ចាប់ពីខែមីនា ឆ្នាំ២០២៦ ដល់ខែកញ្ញា ឆ្នាំ២០២៧។

លោកបានបន្តថា ចំពោះការវិនិយោគ និងការរៀបចំហេដ្ឋារចនាសម្ព័ន្ធខាងលើនេះ បង្ហាញពីការយកចិត្ត​ទុកដាក់របស់រដ្ឋាភិបាល ក្នុងការលើកកម្ពស់សេវាផ្គត់ផ្គង់ទឹកស្អាតប្រកបដោយសមធម៌ កាត់បន្ថយ​គម្លាត​សេវា​រវាងតំបន់ទីក្រុង និងជនបទ និងគាំទ្រការអភិវឌ្ឍសេដ្ឋកិច្ចសង្គមនៅក្នុងមូលដ្ឋាន នឹងចូលរួមចំណែក ក្នុងការលើកកម្ពស់សុខុមាលភាពប្រជាជន៕