ភ្នំពេញ,នៅក្នុងឱកាសអបអរសាទរ ទិវាពលកម្មអន្តរជាតិ ១ ឧសភា ឆ្នាំ២០២៦ សម្ព័ន្ធសហគមន៍កសិករកម្ពុជា (ស៊ីស៊ីអេហ្វស៊ី) សហការជាមួយ សហភាពការងារកម្ពុជា (ស៊ីអិលស៊ី) សហភាពចលនាកម្មករកម្ពុជា (ស៊ីស៊ីដប្ល្យូ) សហជីព សមាគម និងអង្គការសង្គមស៊ីវិលជាច្រើន បានរៀបចំព្រឹត្តិការណ៍មួយនៅសាលមហោស្រពកោះពេជ្រ ដោយមានអ្នកចូលរួមប្រមាណជិត ១៣០០ នាក់ មកពីវិស័យនានាទាំងក្នុង និងក្រៅប្រព័ន្ធ។ ព្រឹត្តិការណ៍នេះផ្តោតលើប្រធានបទគោលនយោបាយឆ្លើយតបគាំពារសង្គម សិទ្ធិការងារ និងវិបត្តិសកល ដែលកំពុងមានឥទ្ធិពលលើជីវភាពកម្មករ និងកសិករ។

ពិធីនេះប្រព្រឹត្តទៅក្រោមអធិបតីភាពរបស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដោយមានការចូលរួមពីតំណាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តំណាងបេឡាជាតិរបបសន្តិសុខសង្គម ក៏ដូចជាតំណាងពីក្រសួងកសិកម្ម រុក្ខាប្រមាញ់ និងនេសាទ យុវកសិករ យុវកម្មករ និងមន្រ្តីរាជការ ដែលបានចូលរួមយ៉ាងសកម្មក្នុងការចែករំលែកបទពិសោធន៍ និងបញ្ហាប្រឈមជាក់ស្តែងក្នុងវិស័យការងារ និងកសិកម្ម។

ក្នុងឱកាសនេះ តំណាងសហជីព និងអង្គការសង្គមស៊ីវិល បានលើកឡើងពីសារៈសំខាន់នៃការពង្រឹងប្រព័ន្ធគាំពារសង្គម ដើម្បីធានាសុវត្ថិភាពជីវភាពរបស់កម្មករ និងកសិករ ជាពិសេសនៅក្នុងបរិបទវិបត្តិសកល ដូចជាការប្រែប្រួលសេដ្ឋកិច្ច អាកាសធាតុ និងសន្តិសុខការងារ។ ពួកគេក៏បានជំរុញឱ្យមានការអនុវត្តយ៉ាងមានប្រសិទ្ធភាពនៃសិទ្ធិការងារ រួមមានសេរីភាពសហជីព លក្ខខណ្ឌការងារសមរម្យ និងប្រាក់ឈ្នួលសមស្រប។

លោក គង់ អាទិត្យ ប្រធានសហភាពការងារកម្ពុជា បានថ្លែងថា « ទិវាពលកម្មអន្តរជាតិ មិនមែនត្រឹមជាថ្ងៃរំលឹកប្រវត្តិសាស្ត្រតស៊ូរបស់កម្មករពិភពលោកប៉ុណ្ណោះទេ ប៉ុន្តែជាឱកាសបញ្ជាក់ថា សិទ្ធិការងារ ការងារប្រកបដោយសេចក្តីថ្លៃថ្នូរ គាំពារសង្គម និងយុត្តិធម៌សង្គម គឺជាមូលដ្ឋានសម្រាប់ការអភិវឌ្ឍប្រកបដោយចីរភាព »។ លោកបានបន្ថែមថា ក្នុងបរិបទដែលពិភពលោកកំពុងប្រឈមនឹងវិបត្តិសេដ្ឋកិច្ច ថាមពល ប្រេងឥន្ធនៈ អតិផរណា និងបម្រែបម្រួលអាកាសធាតុ ប្រធានបទឆ្នាំនេះ គឺសមស្រប និងមានសារៈសំខាន់យ៉ាងខ្លាំង។

ក្នុងនាមសហជីព សហភាព និងសមាគមចម្រុះវិស័យ លោក គង់ អាទិត្យ បានលើកឡើងសំណើសំខាន់ៗចំនួន ៨ចំណុច រួមមាន៖ ការពង្រីកប្រព័ន្ធគាំពារសង្គមឱ្យគ្របដណ្តប់លើកម្មករទាំងអស់ រួមទាំងកម្មករក្រៅប្រព័ន្ធ កសិករ ស្ត្រី និងយុវជន; ការជំរុញប្រាក់ឈ្នួលសមរម្យ និងការងារប្រកបដោយសេចក្តីថ្លៃថ្នូរ; ការពង្រឹងសុវត្ថិភាព និងសុខភាពការងារ; ការធានាសេរីភាពសហជីព និងកិច្ចសន្ទនាសង្គម; ការឆ្លើយតបផលប៉ះពាល់ពីវិបត្តិសកល និងថ្លៃប្រេងឥន្ធនៈ; ការគាំទ្រកសិករ និងវិស័យកសិ-ស្បៀងអាហារ; ការពង្រឹងយន្តការឆ្លើយតបគ្រោះអាសន្ន; និងការលើកកម្ពស់ជំនាញឌីជីថល និងការពារកម្មករក្នុងសេដ្ឋកិច្ចថ្មី។

ចំពោះភាគីរដ្ឋាភិបាល ឯកឧត្តម ហេង សួរ បានថ្លែងថា « ការរៀបចំវេទិកាសាធារណៈបែបនេះ គឺជាយុទ្ធសាស្ត្រល្អដ៏មានប្រសិទ្ធភាព ក្នុងការលើកជាសំណូមពរ និងរកដំណោះស្រាយរាល់កង្វល់របស់បងប្អូនកម្មករ និងកសិករ »។ លោកបានបន្ថែមថា វេទិកាបែបនេះអាចជួយឱ្យអ្នកចូលរួមបានជួបផ្ទាល់ជាមួយមន្ត្រីពាក់ព័ន្ធ និងអ្នកជំនាញ ដើម្បីពិភាក្សា និងស្វែងរកដំណោះស្រាយជាក់ស្តែង។

ឯកឧត្តម ហេង សួរ បានបញ្ជាក់ថា « វេទិកាបែបនេះបន្តជួយពង្រឹងកិច្ចសន្ទនាសង្គម រវាងរាជរដ្ឋាភិបាល សហជីព និយោជក និងអង្គការសង្គមស៊ីវិល ក្នុងទិសដៅជំរុញគោលនយោបាយដោះស្រាយបញ្ហាប្រឈម ជាពិសេសសិទ្ធិការងារ សុវត្ថិភាពការងារ និងប្រព័ន្ធគាំពារសង្គម »។

លោកក៏បានបញ្ជាក់ថា រដ្ឋាភិបាលស្វាគមន៍ និងទទួលយកសំណើរបស់កម្មករ និងបានត្រៀមខ្លួនចូលរួមសហការជាមួយភាគីពាក់ព័ន្ធទាំងអស់ ដើម្បីរកដំណោះស្រាយ ដោយផ្អែកលើគោលការណ៍ច្បាប់ និងស្មារតីយោគយល់អធ្យាស្រ័យ។

អ្នកសង្កេតការណ៍បានលើកឡើងថា ការលើកសំណើរនៅថ្ងៃទិវាពលកម្មឆ្នាំនេះ បង្ហាញពីតម្រូវការកាន់តែខ្លាំងក្នុងការកែលម្អគោលនយោបាយការងារ និងប្រព័ន្ធគាំពារសង្គម ដើម្បីឆ្លើយតបទៅនឹងបញ្ហាប្រឈមសេដ្ឋកិច្ច និងសង្គម ដែលកំពុងផ្លាស់ប្តូរយ៉ាងលឿន។