តាមការចេញផ្សាយនៅលើទំព័រហ្វេសប៊ុកផ្លូវការរបស់ ក្រសួងបរិស្ថាន នៅថ្ងៃទី២៦ ខែឧសភា ឆ្នាំ២០២៦ ក្រសួងបរិស្ថាន បានបន្តអនុវត្តយុទ្ធនាការ «ពន្លកបៃតង» ដោយជំរុញការបណ្តុះ​កូន​ឈើ​សម្រាប់​ចែកជូនសាធារណៈជន យកទៅដាំនៅតាមទីសាធារណៈ និងដាំស្តារព្រៃ ដើម្បីបង្កើនគម្រប​បៃតង​នៅ​កម្ពុជា។

យោងតាមប្រភពដដែល បានឱ្យដឹងថា នៅថ្ងៃទី២៦ ខែឧសភា ឆ្នាំ២០២៦នេះ កូនឈើសរុបចំនួន ៦៦,០៤៤ដើម ត្រូវបានបណ្តុះនៅតាមមន្ទីរបរិស្ថានរាជធានី-ខេត្ត និងថ្នាលតំបន់នានាទូទាំងប្រទេស។

ក្នុងនោះ ខេត្តមណ្ឌលគិរី មានចំនួនកូនឈើច្រើនជាងគេ ដោយថ្នាលតំបន់ខេត្តមណ្ឌលគិរី បានបណ្តុះ​​

កូន​ឈើ​ព្រៃចំនួន ៥២,០៨៣ដើម។ ចំណែកថ្នាលតំបន់ ខេត្តសៀមរាប បានបណ្តុះកូនឈើព្រៃចំនួន ៨,៥០០ដើម ខណៈមន្ទីរបរិស្ថានខេត្តសៀមរាប បន្ថែមការបណ្តុះកូនឈើព្រៃចំនួន ៣,៥០០ដើមទៀត។

ដោយឡែក ខេត្តកំពត បានបណ្តុះកូនឈើព្រៃចំនួន ៦៦៧ដើម ខណៈ ខេត្តព្រះវិហារ បានបណ្តុះកូនត្នោត​ចំនួន ៤០០ដើម និង ខេត្តព្រះសីហនុ បានបណ្តុះកូនឈើហូបផ្លែចំនួន ១៥៥ដើម។

សម្រាប់ខេត្តរតនគិរី មន្ទីរបរិស្ថានខេត្ត បានបណ្តុះកូនឈើព្រៃចំនួន ១៣៧ដើម កូនឈើហូបផ្លែចំនួន ១៤៩​ដើម និងកូនត្នោតចំនួន ២៦៣ដើម។ រីឯខេត្តបន្ទាយមានជ័យ បានបណ្តុះកូនឈើព្រៃចំនួន ១១០​ដើម និងខេត្តស្វាយរៀង បានបណ្តុះកូនឈើហូបផ្លែចំនួន ៨០ដើម។

ជាមួយគ្នានេះ ក្រសួងបរិស្ថាន បានលើកឡើងថា យោងតាមការវាយតម្លៃអន្តរជាតិ កម្ពុជា ត្រូវបានដាក់​ចំណាត់​ថ្នាក់លេខ១ ក្នុងចំណោមបណ្តាប្រទេសលើពិភពលោក ដែលមានបរិស្ថានល្អជាងគេ។ ទោះជា​យ៉ាង​ណា បញ្ហាបម្រែបម្រួលអាកាសធាតុសកល នៅតែជាបញ្ហាប្រឈមធំមួយ ដែលកំពុងជះឥទ្ធិពល និង​ប៉ះ​ពាល់ដល់កម្ពុជាផងដែរ។

យុទ្ធនាការ «ពន្លកបៃតង» ត្រូវបានក្រសួងបរិស្ថានអនុវត្តជាបន្តបន្ទាប់ ក្នុងគោលបំណងលើកកម្ពស់​ការ​ចូល​រួមដាំដើមឈើ ការពារបរិស្ថាន និងស្តារគម្របព្រៃឈើនៅកម្ពុជា ស្របតាមគោលនយោបាយអភិវឌ្ឍ​បៃ​តង និងការប្រែប្រួលអាកាសធាតុ។

តាមរបាយការណ៍ស្ទង់មតិរបស់ US news and world report បានផ្តល់ចំណាត់ថ្នាក់ជាសកលឱ្យ​ប្រទេស​កម្ពុជាថា មានបរិស្ថាន​ធម្ម​ជាតិល្អ​លេខ​១​នៅលើពិភពលោកក្នុងឆ្នាំ២០២៦។ របាយការណ៍ខាងលើនេះ បានវាយ​តម្លៃ​ទៅលើកិច្ចខិតខំប្រឹងប្រែងរបស់កម្ពុជាដែលបានរក្សាតុល្យភាពយ៉ាងល្អរវាងការអភិវឌ្ឍ និង​ការ​ការពារ​បរិស្ថាន​ ក្នុងនោះមានការគ្រប់គ្រងបរិស្ថានល្អ ផ្តល់ខ្យល់អាកាសល្អ ការគ្រប់គ្រង​ធន​ធាន​ធម្ម​ជាតិ និងការ​អភិរក្សជីវចម្រុះប្រកបដោយនិរន្តរភាព៕