បៃតងប៉ុស្តិ៍

អង្គការសហប្រជាជាតិដើម្បីបរិស្ថាន(UNEP) បានប្រកាសបន្តគាំទ្រកម្ពុជា ដើម្បីលើកកម្ពស់ការគ្រប់គ្រងធនធានធម្មជាតិ ការអភិរក្សជីវៈចម្រុះ ទប់ស្កាត់ការបំពុលដើម្បីនិរន្តរភាពបរិស្ថាន និងការប្រយុទ្ធប្រឆាំងនឹងការប្រែប្រួលអាកាសធាតុ។ នេះជាការលើកឡើងរបស់ លោកស្រី Dechen Tsering នាយកនិងជាតំណាងអង្គការ UNEP ប្រចាំតំបន់សម្រាប់តំបន់អាស៊ី និង​ប៉ាស៊ីហ្វិក ក្នុងឱកាសអញ្ជើញជួបពិភាក្សាការងារជាមួយឯកឧត្តម អ៊ាង សុផល្លែត រដ្ឋមន្ត្រី​ក្រសួងបរិស្ថានកម្ពុជា នៅទីស្តីការក្រសួងបរិស្ថាន នាព្រឹកថ្ងៃទី៦ ខែឧសភា ឆ្នាំ២០២៦។

តាមការផ្សព្វផ្សាយរបស់​ក្រសួង​បរិស្ថានកាល​ពីពេលថ្មីៗនេះ បានឱ្យដឹងថា លោកស្រី Tsering បានបញ្ជាក់ពីការវាយតម្លៃខ្ពស់ចំពោះ ក្រសួងបរិស្ថាន ដែលបានសហការល្អ លើកិច្ច​សហការ​លើ​ផ្នែកបរិស្ថាន និងធនធានធម្មជាតិ ជាពិសេស បានអនុវត្តសកម្មភាពជំរុញលើការ​កាត់​បន្ថយ​ប្លា​ស្ទិក, ការគ្រប់គ្រងការបំពុលបរិស្ថាន ការការពារ និងអភិរក្សធនធានធម្មជាតិ និង​សត្វព្រៃ និងការបន្ស៊ាំទៅនឹងការប្រែប្រួលអាកាសធាតុ ស្របតាមគោលនយោបាយ និងយុទ្ធ​សាស្រ្តរបស់រាជរដ្ឋាភិបាល យុទ្ធសាស្រ្តចក្រាវិស័យបរិស្ថាន និងឆ្លើយតបនឹងកិច្ចព្រមព្រៀង​ទីក្រុងប៉ារីស៍ស្តីពីអាកាសធាតុ។

ក្នុងឱកាសនេះ ឯកឧត្តម អ៊ាង សុផល្លែត បានអរគុណដល់ការគាំទ្ររបស់អង្គការកម្មវិធី​បរិ​ស្ថានអង្គការសហប្រជាជាតិ ដែលបានចូលរួមចំណែកការពារ និងអភិរក្សបរិស្ថាន និងធនធាន​ធម្មជាតិនៅកម្ពុជា។ ឯកឧត្តមបានថ្លែងបន្ថែមអំពីការគាំទ្ររបស់អង្គការ UNEP ចំពោះការពង្រី​កកិច្ចសហប្រតិបត្តិការ ជាមួយក្រសួងបរិស្ថាន ក្នុងការគ្រប់គ្រងគុណភាពខ្យល់ និងសារធាតុ​គីមី ការអភិរក្សជីវៈចម្រុះ និងផែនការសកម្មភាពពង្រឹងភាពធន់នឹងការប្រែប្រួល​អាកាស​ធាតុ​នៅកម្ពុជា។

ឯកឧត្តម អ៊ាង សុផល្លែត បានមានប្រសាសន៍ថា គម្រោងកាត់បន្ថយការ​ប្រើប្រាស់​ប្លាស្ទិក​នៅ​កម្ពុជា កំពុងទទួលបានជោគជ័យ ដោយសារមានអ្នកចូលរួមជាង១៤លាននាក់ គិតត្រឹមឆ្នាំ​២០២៦​នេះ ដែលបានប្តេជ្ញាចិត្តឈប់ប្រើថង់ប្លាស្ទិកជាបណ្តើរៗ។ លោកបន្ថែមថា កន្លងមក​ក្រសួងបរិស្ថាន បានដាក់ចេញនូវវិធានការ និងយុទ្ធនាការជាច្រើន ដើម្បីជំរុញឱ្យមានភាព​ស្អាត និងចូលរួមទប់ស្កាត់ការបំពុលបរិស្ថាន ទាំងក្នុងទឹក លើដី និងលើមេឃ ដើម្បីបង្កើន​ភាព​ធន់នឹងការប្រែប្រួលអាកាសធាតុសម្រាប់សហគមន៍តំបន់ការពារធម្មជាតិនៅកម្ពុជា។ រដ្ឋមន្រ្តីក្រសួងបរិស្ថានរូបនេះ បានបញ្ជាក់អំពីគម្រោងសហប្រតិបត្តិការបន្តទៀតគឺជំរុញការ​អភិវឌ្ឍជីវភាពសហគមន៍មូលដ្ឋាន ដោយផ្សារភ្ជាប់ការអភិរក្សធនធានធម្មជាតិ តាមរយៈ​ការ​ប្រែ​ក្លាយសក្តានុពលធម្មជាតិ ទៅជាគោលដៅលំហែបៃតង និងអេកូទេសចរណ៍ និងការលើក​កម្ពស់ការគ្រប់គ្រងតំបន់ការពារធម្មជាតិ ដែលជួយកាត់បន្ថយឧស្ម័នផ្ទះកញ្ចក់៕