ដោយ៖ វិចិត្រ

សេវាសាធារណៈជាមូលដ្ឋានមួយចំនួនដែលសំដៅទៅដល់សាលារៀន និងមន្ទីរពេទ្យ​នៅ​ក្នុង​ខេត្តជាប់ព្រំដែនកម្ពុជា-ថៃ ចំនួន៣ ដែលរងផលប៉ះពាល់ដោយសារសង្គ្រាមឈ្លានពាន​ពីសំ​ណាក់​ប្រទេសថៃនៅមិនទាន់អាចដំណើរការវិញបាននៅឡើយទេ។

តាមរយៈសេចក្តីប្រកាសព័ត៌មានរបស់ក្រសួងមហាផ្ទៃ នៅថ្ងៃទី១១ ខែឧសភា ឆ្នាំ២០២៦នេះ បាន​​ឱ្យដឹងថា គិតត្រឹមព្រឹកថ្ងៃទី១១ ខែឧសភា សេវាសាធារណៈ​ជាមូលដ្ឋាន​មួយចំ​នួន​នៅ​មិន​ទាន់​អាចបើកឱ្យដំណើរការជា​ប្រក្រតី​វិញបាននៅឡើយទេ ដែលក្នុងនោះខេត្តឧត្តរមានជ័យ មាន​សាលារៀន៨ និងមន្ទីរ​ពេទ្យ​/មណ្ឌលសុខភាព៥ នៅបន្តផ្អាក។ ខេត្តបន្ទាយមានជ័យ មាន​សា​លារៀន៥ និងមន្ទីរ​ពេទ្យ​/​មណ្ឌលសុខភាព១ បន្តផ្អាក។ ខេត្តព្រះវិហារ មានសាលារៀន៧ និង​មន្ទីរពេទ្យ/​មណ្ឌល​សុខ​ភាព២ នៅបន្តផ្អាក។

ចំពោះស្ថានភាពពលរដ្ឋភៀសសឹក គឺនៅមានពលរដ្ឋចំនួន៣២.៨៤៣នាក់ទៀត (ស្ត្រី ១៦.៩៩០​នាក់ និងកុមារ១១.០៧២នាក់) ពុំទាន់អាចវិលទៅលំនៅឋានវិញ ក្នុងចំណោមពលរដ្ឋ​ភៀស​សឹកសរុប ៦សែន៤ម៉ឺននាក់។

បើទោះជាស្នូរគ្រាប់កាំភ្លើងបានរលុតបាត់ទៅហើយក្តី ក៏គេនៅសង្កេតឃើញថាស្ថានភាពនៅ​តាមខ្សែបន្ទាត់ព្រំដែនរវាងកម្ពុជា-ថៃ នៅពុំទាន់មានភាពល្អប្រសើរនៅឡើយទេ ដោយ​ភាគី​ថៃ​នៅ​តែ​បន្តធ្វើសកម្មភាពរំលោភបំពានជារឿយៗបន្ថែមទៀតមកលើអធិបតេយ្យ និងបូរណភាព ដែនដីរបស់កម្ពុជា តាមរយៈនៃការព័ទ្ធលួសបន្លា ជីកលេណ្ឋាន ឬជីកប្រឡាយ​ខុស​ច្បាប់​ជា​ដើម៕