កម្ពុជា ខកចិត្តនឹងការសម្រេចចិត្តរបស់ថៃដែលលុបចោលក្របខណ្ឌទ្វេភាគីតែមួយគត់ រវាងកម្ពុជា-ថៃ

08-ឧសភា-2026 - ម៉ោង 01:28:PM

ដោយ៖ វិចិត្រ

ជាថ្មីម្តងទៀត កម្ពុជាបានសម្តែងការខកចិត្តទៅនឹងការលុបចោលក្របខណ្ឌទ្វេភាគីតែមួយគត់នៃប្រទេសទាំងពីររវាងកម្ពុជា-ថៃ ដែលបានព្រមព្រៀងគ្នាសម្រាប់ដោះស្រាយដោយសន្តិវិធីនូវតំបន់ត្រួតស៊ីគ្នានៃដែនសមុទ្រ។

តាមរយៈសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការកម្ពុជា ដែលបានដកស្រង់សម្តីរបស់លោកជំទាវ អ៊ាត សោភា រដ្ឋមន្ត្រីស្តីទីនៃក្រសួងការបរទេស និងសហប្រតិបត្តិការអន្តរជាតិ ដែលបានថ្លែងនៅចំពោះមុខប្រធាន និងតំណាងស្ថានបេសកកម្មការទូត និងអង្គការអន្តរជាតិនានាចំនួន៤៣នាក់ នៅរាជធានីភ្នំពេញ កាលពីថ្ងៃទី៦ ខែឧសភា ឆ្នាំ២០២៦ ក្នុងបទបង្ហាញ អំពីការវិវត្តថ្មីៗនៃស្ថានការណ៍ព្រំដែនកម្ពុជា-ថៃ ចាប់តាំងពីខែមករា ឆ្នាំនេះ ហើយស្របពេលដែលប្រទេសថៃបានបញ្ចប់ដោយឯកតោភាគីនូវអនុស្សរណៈ នៃការយោគយល់គ្នារវាងប្រទេសកម្ពុជា និងប្រទេសថៃ ទាក់ទងនឹងតំបន់ដែនសមុទ្រទាមទារត្រួតគ្នានៃខ្ពង់រាបបាតសមុទ្រ (MOU-2001) បានឱ្យដឹងថា កម្ពុជាមានការសោកស្តាយ និងខកចិត្តយ៉ាងខ្លាំង ចំពោះការសម្រេចរបស់ប្រទេសថៃ ក្នុងការលុបក្របខ័ណ្ឌទ្វេភាគីតែមួយគត់ ដែលបានព្រមព្រៀងគ្នារវាងកម្ពុជា និងថៃ សម្រាប់ដោះស្រាយដោយសន្តិវិធីចំពោះតំបន់ទាមទារដែនសមុទ្រត្រួតគ្នា(OCA) និងសម្រាប់កំណត់ព្រំដែនដែនសមុទ្រ ស្របតាមច្បាប់អន្តរជាតិ។

ជាមួយគ្នានេះរដ្ឋមន្ត្រីស្តីទីរូបនេះ បានបញ្ជាក់ថា កម្ពុជាបានជូនដំណឹងជា ផ្លូវការដល់ប្រទេស ថៃអំពីការសម្រេចរបស់ខ្លួន ក្នុងការស្វែងរកដំណោះស្រាយ ចំពោះការទាមទារតំបន់ដែនសមុទ្រត្រួតគ្នានេះ តាមរយៈយន្តការផ្សះផ្សាដោយបង្ខំ ក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS)។

សូមបញ្ជាក់ថា ប្រទេសថៃ នៅថ្ងៃទី៥ ខែឧសភា បានប្រកាដកខ្លួន ឬលុបចោលអនុស្សរណៈយោគយល់គ្នា រវាងកម្ពុជា-ថៃ ឬ(MOU2001) ស្តីពីតំបន់ទាមទារដែនសមុទ្រត្រួតស៊ីគ្នា ដោយនាយករដ្ឋន្ត្រីថៃសំអាងថា ការដកខ្លួននេះ ដោយថា(MOU2001)«គ្មានវឌ្ឍនភាព» នៅក្រោយអនុស្សរណៈនេះ មានអាយុកាលជាង២៥ឆ្នាំ៕