ដោយ៖ វិចិត្រ

ក្រសួងព័ត៌មាន បានស្នើដល់ម្ចាស់ប្រព័ន្ធផ្សព្វផ្សាយ អ្នកផលិតមាតិកា និងអង្គភាព​សារ​ព័ត៌​មាន​ទាំងអស់ ឱ្យបន្តចូលរួមផ្សព្វផ្សាយវីដេអូសារអប់រំស្តីពីការបង្ការការឆ្លងមេរោគអេដស៍ និងការបង្កើនការយល់ដឹងអំពីបញ្ហាគ្រឿងញៀន ឱ្យបានជាប់ជាប្រចាំ និងច្រើនដងក្នុងមួយថ្ងៃ ដើម្បីរួមចំណែកលើកកម្ពស់ការយល់ដឹង និងការពារសុខុមាលភាពសាធារណៈ។

លិខិតរបស់ក្រសួងព័ត៌មាន ចុះថ្ងៃទី១៦ ខែកក្កដា​ ឆ្នាំ២០២៦ ក្រសួងបានថ្លែង​អំណរ​គុ​ណ និងកោតសរសើរចំពោះម្ចាស់ប្រព័ន្ធផ្សព្វផ្សាយ អ្នកផលិតមាតិកា និងអង្គភាព​សារ​ព័ត៌​មាន ដែលបានចូលរួមយ៉ាងសកម្មក្នុងការផ្សព្វផ្សាយសារអប់រំពាក់ព័ន្ធនឹងសុខភាព ការបង្ការ និងទប់ស្កាត់គ្រឿងញៀន ព្រមទាំងបញ្ហាសង្គមផ្សេងៗ ដើម្បីផ្សព្វផ្សាយចំណេះដឹង​ដល់​សាធា​រ​​ណជនឱ្យកាន់តែទូលំទូលាយ។

ជាមួយគ្នានេះ ដើម្បីពង្រឹងយុទ្ធនាការអប់រំសាធារណៈនេះ ក្រសួងព័ត៌មាន បានសហការជា​មួយ​ក្រសួង​សុខាភិបាល អាជ្ញាធរជាតិប្រយុទ្ធនឹងជំងឺអេដស៍ អាជ្ញាធរជាតិប្រយុទ្ធ​ប្រឆាំង​គ្រឿង​ញៀន និងក្រុមហ៊ុន MSA ផលិតវីដេអូសារអប់រំចំនួន ២ រួមមាន “កំហុសនៃទំនុកចិត្ត” ជាវីដេអូស្តីពីការបង្ការ និងការយល់ដឹងអំពីជំងឺអេដស៍ និងមេរោគអេដស៍ និង“ច្រកទ្វារដំបូង” ជាវីដេអូស្តីពីការបង្ការ និងការយល់ដឹងអំពីគ្រឿងញៀន។

ក្រសួងព័ត៌មាន បានស្នើឱ្យគ្រប់ប្រព័ន្ធផ្សព្វផ្សាយ និងអ្នកផលិតមាតិកា បន្តផ្សព្វផ្សាយ​វីដេ​អូ​អប់រំទាំងពីរនេះចាប់ពីថ្ងៃនេះតទៅ ដើម្បីឱ្យសាធារណជនទទួលបានចំណេះដឹងកាន់​តែទូលំ​ទូលា​យ និងរួមចំណែកបង្ការ ទប់ស្កាត់ការឆ្លងមេរោគអេដស៍ និងបញ្ហាគ្រឿងញៀនក្នុងសង្គម​ឱ្យ​កាន់តែមានប្រសិទ្ធភាព៕