ដោយ៖ វិចិត្រ

អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន (អាជ្ញា​ធរមីន​) បានចេញសេចក្តីណែនាំ ស្តីពីការពង្រឹងវិធានការបង្ការ និងទប់ស្កាត់គ្រោះ​ថ្នាក់​ដោយសារយុទ្ធភណ្ឌគ្រឿងផ្ទុះ (មីន គ្រាប់បែកចង្កោម និងសំណល់ជាតិផ្ទុះពីសង្គ្រាម) ក្នុង​ពេល និងក្រោយពេលគ្រោះទឹកជំនន់ ដើម្បីការពារសុវត្ថិភាពប្រជាពលរដ្ឋ។

តាមរយៈលិខិតចុះថ្ងៃទី១៦ ខែកក្កដា ម្សិលមិញ អាជ្ញាធរមីនបានឱ្យដឹងថា កម្ពុជា​កំពុង​ទទួល​ឥទ្ធិ​ពលពីព្យុះទី៩ បាវី (Bavi) និងព្យុះទី១១ ហៃសិន (Haishen) ដែលអាចបង្កឱ្យមានភ្លៀង​ធ្លាក់​ខ្លាំង និងទឹកជំនន់នៅ​រាជ​ធានី-ខេត្តមួយ​ចំនួន។ ស្ថានភាពនេះអាចធ្វើឱ្យមីន និងសំណល់​ជាតិ​ផ្ទុះត្រូវបានទឹកហូរនាំយកពីតំបន់មានហានិភ័យ ទៅកាន់ទីតាំងផ្សេងៗ បង្កការគំរាម​កំហែង​ដល់​អាយុជីវិត និងសុវត្ថិភាពប្រជាពលរដ្ឋ។

ដើម្បីកាត់បន្ថយហានិភ័យ អាជ្ញាធរមីនបានណែនាំឱ្យអាជ្ញាធរមូលដ្ឋាន ស្ថាប័នពាក់ព័ន្ធ និង​ប្រតិ​បត្តិករបោសសម្អាតមីន បង្កើនការផ្សព្វផ្សាយអប់រំអំពីគ្រោះថ្នាក់ដោយសារ​យុទ្ធភណ្ឌ​គ្រឿង​ផ្ទុះ ឆ្លើយតបឱ្យបានទាន់ពេលចំពោះសេចក្តីរាយការណ៍របស់ប្រជាពលរដ្ឋ និងដាក់​ស្លាក​សញ្ញាព្រមាននៅតំបន់សង្ស័យមានគ្រាប់មីន ឬគ្រាប់មិនទាន់ផ្ទុះ។

ជាមួយគ្នានេះ អាជ្ញាធរមីនបានអំពាវនាវដល់ប្រជាពលរដ្ឋ កុំប៉ះពាល់ រើស កាន់ គប់ ដំ ឬកែច្នៃ​វត្ថុ​សង្ស័យជាមីន ឬគ្រាប់មិនទាន់ផ្ទុះគ្រប់ប្រភេទ។ ប្រសិនបើប្រទះឃើញ ត្រូវរាយការណ៍​ជា​បន្ទាន់​ទៅអាជ្ញាធរមូលដ្ឋាន កម្លាំងសមត្ថកិច្ច ឬប្រតិបត្តិករបោសសម្អាតមីនដែលនៅជិតបំផុត ដើម្បីចាត់វិធានការប្រមូល និងកម្ទេចចោលប្រកបដោយសុវត្ថិភាព។

អាជ្ញាធរមីនក៏បានស្នើឱ្យគណៈកម្មាធិការសកម្មភាពមីនរាជធានី-ខេត្ត ក្រសួង ស្ថាប័នពាក់ព័ន្ធ និងប្រតិបត្តិករជាតិ-អន្តរជាតិ សហការអនុវត្តវិធានការទាំងនេះឱ្យបានម៉ឺងម៉ាត់ ដើម្បីទប់​ស្កាត់​គ្រោះថ្នាក់ដែលអាចកើតមានក្នុងអំឡុងពេល និងក្រោយគ្រោះទឹកជំនន់៕