ដោយ៖ ​វិចិត្រ

ក្រសួងការបរទេស និងសហប្រតិបត្តិការអន្តរជាតិ បានបញ្ជាក់ថា អ្នកផ្សះផ្សាឯក​រាជ្យ​ទាំង​៤​រូប បានស្នើសុំពេលវេលាបន្ថែម ដើម្បីពិចារណាឱ្យបានហ្មត់ចត់លើការតែងតាំងប្រធានគណៈ​កម្មការផ្សះផ្សាវិវាទដែនសមុទ្រកម្ពុជា-ថៃ ក្រោមអនុសញ្ញាអង្គការសហប្រជាជាតិ​ស្តីពី​នីតិ​សមុ​ទ្រ​ (UNCLOS) ខណៈកម្ពុជា និងថៃ បានឯកភាពចំពោះសំណើនេះ។

តាមសេចក្តីថ្លែងការណ៍របស់អ្នកនាំពាក្យក្រសួងការបរទេស ចេញផ្សាយនៅថ្ងៃទី១៩​ ខែកក្ក​ដា ឆ្នាំ២០២៦ ការស្នើសុំពេលបន្ថែមនេះ មានលក្ខណៈសមស្របទៅនឹងសារៈសំខាន់​នៃការ​តែង​តាំង និងដំណើរការផ្សះផ្សាទាំងមូល ហើយនឹងមិនប៉ះពាល់ដល់ថេរវេលា ឬនីតិវិធីដែល​កំណត់​ក្រោម UNCLOS នោះឡើយ។

ក្រសួងបានបញ្ជាក់ថា ការស្នើសុំនេះឆ្លុះបញ្ចាំងពីភាពហ្មត់ចត់របស់អ្នកផ្សះផ្សា និងបាន​សម្តែ​ង​​ការកោតសរសើរចំពោះការអនុវត្តភារកិច្ចប្រកបដោយវិជ្ជាជីវៈរបស់ពួកគេ។ ជាមួយគ្នានេះ កម្ពុជាបានអះអាងជាថ្មីនូវការប្តេជ្ញាចិត្តក្នុងការជំរុញការដោះស្រាយវិវាទដែនសមុទ្រជាមួយប្រទេសថៃដោយសន្តិវិធី និងផ្អែកលើច្បាប់អន្តរជាតិ។

កាលពីថ្ងៃទី២ ខែមិថុនា ឆ្នាំ២០២៦ ភាគីកម្ពុជា បានតែងតាំងលោក Peter Taksoe-Jensen អតីតអ្នកការទូតដាណឺម៉ាក និងសាស្ត្រាចារ្យ Jean-Marc Thouvenin អ្នកជំនាញច្បាប់អន្តរជាតិជនជាតិបារាំង ជាអ្នកផ្សះផ្សាតំណាងកម្ពុជា។ ចំណែកភាគីថៃ បានតែងតាំងអតីតប្រធានតុលាការអន្តរជាតិស្តីពីនីតិសមុទ្រ Judge Albert J. Hoffmann សញ្ជាតិអាហ្វ្រិកខាងត្បូង និង Judge Rüdiger Wolfrum សញ្ជាតិអាល្លឺម៉ង់ ជាអ្នកផ្សះផ្សាតំណាងភាគីថៃ៕