អត្ថបទ៖ យូ វាសនា

យោងតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា នៅថ្ងៃទី១២ ខែសីហា ឆ្នាំ២០២៤ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងភាគីពាក់ព័ន្ធ បានចុះត្រួតពិនិត្យ និងបង្រ្កាបបទល្មើសជលផល ក្នុងភូមិសាស្រ្តខេត្តកំពង់ធំ និងខេត្តសៀមរាប។

ឯកឧត្តម ប៉ែន ផល្លីកា បញ្ជាក់ថា នៅខេត្តកំពង់ធំ ក្រុមការងារបានល្បាតពីចំណុចបាឡត រហូតដល់ចំណុចកំព្រាម ក្នុងភូមិសាស្រ្តឃុំពាមបាង ស្រុកស្ទោង និងពីចំណុចផ្សោត ដល់ចំណុចកោះតាបរ ក្នុងភូមិសាស្រ្តឃុំផាត់សណ្តាយ ស្រុកកំពង់ស្វាយ និងខេត្តសៀមរាប នៅចំណុចជ្រោយស និងចំណុចមាត់ខ្លា ក្នុងភូមិសាស្រ្តឃុំអន្លង់សំណរ ស្រុកជីក្រែង។ បន្ថែមពីនេះ កម្លាំងចម្រុះក៏បានចុះពិនិត្យស្ថានភាពកន្លែងអភិរក្សជលផលទន្លេឆ្មារ កន្លែងអភិរក្សជលផលបាឡត (អតីតឡូត៍នេសាទលេខ៤) និងកន្លែងអភិក្សជលផលព្រែកខ្សាច់ (អតីតឡូត៍លេខ២)។

នៅក្នុងប្រតិបត្តិការនេះ កម្លាំងចម្រុះបានបង្រ្កាប និងបំផ្លាញចោលឧបករណ៍នេសាទខុសច្បាប់នៅនឹងកន្លែងចំនួន ៥ករណី ដោយបានដកហូតឈ្នាងអូសលៀស-ខ្ចៅអូសដោយកម្លាំងម៉ាស៊ីនក្នុងរដូវបិទនេសាទចំនួន ៨គ្រឿង របាំងសាច់អួនក្រឡាញឹក ១៤របាំង ប្រវែងប្រមាណ ៥ ២០០ម៉ែត្រ លូសាច់អួនក្រឡាញឹកចំនួន ៣៤មាត់ ឡុកចំនួន ២៧គ្រឿង បង្គោលចម្រឹងចំនួន ២ ៦៥០ដើម និងចាក់លែងកូនត្រីចម្រុះចូលបឹងធម្មជាតិវិញប្រមាណ ២៥០គីឡូក្រាម។

ឯកឧត្តម ប៉ែន ផល្លីកា បន្តថា ក្រុមការងារនឹងបន្តអនុវត្តការងារនេះពេញមួយសប្តាហ៍ជាប់គ្នា ក្នុងគោលបំណងទប់ស្កាត់បទល្មើសជលផលដែលបង្កមហន្តរាយដល់មច្ឆជាតិធម្មជាតិ ក៏ដូចជា ជីវចម្រុះគ្រប់ប្រភេទដែលកំពុងពងកូន និងចល័តទីនារដូវទឹកតម្លើង ពោលគឺរដូវបិទនេសាទ។ តាមការពិនិត្យជាក់ស្តែងក្នុងការទប់ស្កាត់បទល្មើសជលផល ក្រុមការងារសង្កេតឃើញថា កូនត្រីប្រានិងត្រីពោ មានកំណើនច្រើនជាងឆ្នាំមុនផងដែរ។

ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ​បានប្រាប់បៃតងប៉ុស្តិ៍ថា ការបង្ក្រាបបទល្មើសនេសាទនេះ គឺជាអ្វីដែលសមត្ថកិច្ចបានធ្វើជារៀងរាល់ថ្ងៃព្រោះក្រសួងមានក្រុមការងារនៅទូទាំងប្រទេសពោលគឺមិនមែនចាំតែមានបទល្មើសទើបចុះបង្ក្រាបនោះទេគឺមានយន្តការតាមដានបន្ទាប់ពីទទួលព័ត៌មាន និងឈានទៅដល់ការកសាងសំណុំរឿងបញ្ជូនទៅតុលាការ។ ចំពោះករណីដែលមានថ្នាក់ដឹកនាំក្រសួងចុះដឹកនាំបង្ក្រាបដោយផ្ទាល់នេះគឺជាការងារអធិការកិច្ច។

បើតាមឯកឧត្តម ឃឹម ហ្វីណង់ បទល្មើសនេសាទគឺកើតឡើងតាមរដូវកាលគឺមិនអាចកំណត់បានថាកើតនៅតំបន់ណាច្រើនជាងតំបន់ណានោះទេ៕