អត្ថបទ៖ កែវ រតនៈ

យោងតាមការផ្សព្វផ្សាយរបស់ឯកឧត្តម យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រម៉ាញ់ និងនេសាទ បានឱ្យដឹងថា ក្រសួងបាននិងកំពុងដាក់ពង្រាយមន្រ្តីកសិកម្មនៅគ្រប់ឃុំ សង្កាត់មានសក្តានុពលកសិកម្មទាំងអស់នៅទូទាំងប្រទេស ដែល​​ក្នុងនោះក៏មានចំនួន ១៥៣ នាក់នៅគ្រប់ឃុំទាំងអស់នៃខេត្តទាំង៤ នៃតំបន់ CLV-DTA នៅក្នុងឆ្នាំ២០២៤ និង២០២៥   ដើម្បីសម្របសម្រួលការអភិវឌ្ឍកសិកម្ម  និងដោះស្រាយបញ្ហាប្រឈមនានារបស់កសិករ។

ករណីនេះ ឯកឧត្តម យ៉ង សាំងកុមារ បានលើកឡើងថា យុវជនដែលស្រ​​ឡាញ់ទឹកដីនិងស្រឡាញ់​ការងារកសិកម្មត្រៀមដាក់ពាក្យប្រឡងដើម្បីក្លាយជាមន្រ្តីកសិកម្មឃុំល្អបម្រើកសិករ និងប្រទេសជាតិ ជាពិសេសនៅតាមឃុំជាប់ព្រំដែន។

ឯកឧត្តម យ៉ង សាំងកុមារ បញ្ជាក់ថាគម្រោង CLV-DTA គ្រាន់តែជាការសហការគ្នារវាងខេត្តជាប់គ្នានៃប្រទេសទាំង ៣ ដើម្បីផលប្រយោជន៍ប្រជាពលរដ្ឋក្នុងខេត្តគោលដៅដោយប្រទេសនីមួយៗនៅរក្សាអាធិបតេយ្យជាតិរៀងខ្លួន។ គម្រោង CLV នេះមានអាយុ២៥ ឆ្នាំរួចមកហើយ។ មកដល់ពេលនេះភូមិឃុំស្រុកក្រុងនៃខេត្តទាំង ៤ អត់មានបាត់ទៅណា ហើយក៏នឹងមិនបាត់ទៅណាដែរនាពេលខាងមុខ។

ផ្ទុយទៅវិញ ខេត្តទាំង ៤ មានការផ្លាស់ប្តូរមុខមាត់ច្រើន ជាពិសេសការអភិវឌ្ឍផ្លូវតភ្ជាប់គ្នាក្នុងខេត្ត និងពីខេត្តមួយទៅខេត្តមួយ និងទៅតំបន់ព្រំដែន ការរៀបចំឲ្យមានប្រព័ន្ធបណ្តាញអគ្គិសនី ការកើនឡើងផលិតកម្មកសិកម្មនិងចំនួនទេសចរដោយសារការសម្រួលខាងផ្លូវគមនាគមន៍ និងអគ្គិសនី។ ជាក់ស្តែងខេត្តមណ្ឌលគីរីមានការអភិវឌ្ឍច្រើនជាងគេខាងវិស័យទេសចរណ៍។ ឯចំនួនប្រជាពលរដ្ឋពីខេត្តផ្សេងៗក៏ទៅរស់នៅខេត្តទាំង ៤នេះកាន់តែច្រើនដែរ ជាពិសេសនៅខេត្តរតនគីរី។

តែទន្ទឹមនឹងនេះក៏នៅមានការប្រឈមមួយចំនួនដែរ ជាពិសេស វិស័យកសិកម្ម និងជីវភាពកសិករ។ គោលនយោបាយដាក់ពង្រាយមន្រ្តីកសិកម្មឃុំនៅគ្រប់ភូមិឃុំ និង ការអភិវឌ្ឍសហគមន៍កសិកម្មទំនើប គឺដើម្បីងាយស្រួលដោះស្រាយបញ្ហា ទុន ទីផ្សារ ទឹក បញ្ហាប្រឈមនានារបស់កសិករ ដែលនឹងនាំមកនូវការបង្កើនផលិតកម្មកសិកម្មផ្សារភ្ជាប់មកទីផ្សារ និងប្រាក់ចំណូលជូនកសិករ។

បើតាមអ្នកនាំពាក្យ​ ក្រសួងកសិកម្ម រុក្ខាប្រម៉ាញ់ និងនេសាទ បានឱ្យដឹងថា ក្រសួងមាន​ផែន​ការពង្រាយ​មន្ត្រី​កសិកម្ម​ឃុំ ចំនួន ១ ៦០០​ នាក់​ ក្នុង​បេស​ក​កម្ម​ធ្វើ​ការបម្រើ​កសិករ ១,៦ លាន​គ្រួសារ ឬ​ស្មើនឹង​ចំនួន​ប្រជាជន ៧,៥​ លាន​នាក់ នៅ​គ្រប់​ភូមិ ឃុំ​ទូទាំងប្រទេស ចាប់​ពី​ឆ្នាំ​ ២០២៣ ដល់​ឆ្នាំ ​២០២៨​៕