អត្ថបទ៖ សំនៀង

ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យនៃក្រសួងកសិកម្ម រុក្ខាប្រមាញ់ និងនេសាទ បានប្រាប់បៃតងប៉ុស្តិ៍ថា ប្រភេទដង្កូវហ្វូងដែលបានបំផ្លាញដំណាំរបស់ប្រជាពលរដ្ឋនេះបានកើតឡើងមួយរយៈមកហើយ ប៉ុន្តែរហូតមកដល់ពេលនេះចាត់ទុកថាអាចគ្រប់គ្រងបានហើយ ដោយសារក្រុមការងាររបស់ក្រសួងកសិកម្មបានចុះធ្វើអន្តរាគមន៍ក្នុងការកម្ចាត់ជូនប្រជាពលរដ្ឋ ហើយក៏ស្ថិតក្នុងដំណាក់កាលមួយដែលមិនមែនជាបញ្ហាប្រឈមនោះទេ ស្របពេលដែលដំណាំដែលរងការប៉ះពាល់នោះ រហូតមកដល់ពេលនេះក៏មានការលូតលាស់ឡើងវិញធម្មតា។

ឯកឧត្តមបានបន្ថែមថា ប្រភេទដង្កូវហ្វូងនេះជាប្រភេទមេអំបៅ ដែលមានវដ្តជីវិតវិលជុំ ដោយពេលនៅតូចវាជាដង្កូវ ពេលធំធាត់ទៅជាឌុកឌឿ រួចហើយក៏វិវដ្ដទៅជាមេអំបៅ ហើយពងកូនជាដង្កូវមកវិញ។ បើសិនជានៅក្នុងរដូវធម្មតាវដ្ដជីវិតរបស់វាមានរយៈពេលវែង ប៉ុន្តែដោយសារកន្លងមកអាកាសធាតុមានការប្រែប្រួលទើបធ្វើឲ្យវដ្ដជីវិតលូតលាស់លឿនមានរយៈពេលខ្លីមកត្រឹម៣០ថ្ងៃ ប៉ុន្តែដោយសារមានការចុះអន្តរាគមន៍ និងភាពអំណោយផលពីធម្មជាតិ ទើបធ្វើឲ្យការបំផ្លាញដោយសារដង្កូវនេះមានការថយចុះឡើងវិញ។ ឯកឧត្តមក៏បានលើកឡើងបន្ថែមទៀតថា កន្លងមកប្រភេទដង្កូវហ្វូងនេះបានបំផ្លាញដំណាំរបស់ប្រជាពលរដ្ឋនៅស្ទើរទូទាំងប្រទេស ប៉ុន្តែចំនួននៃការបំផ្លាញនោះគឺក្រសួងមិនអាចកំណត់ឲ្យជាក់លាក់ពីចំនួននៃផលប៉ះពាល់នោះទេ អាចត្រឹមចន្លោះពី២ទៅ៣ម៉ឺនហិចតា ហើយភាគច្រើនប៉ះពាល់ទៅលើដំណាំស្រូវ ដំឡូងមី ពោត និងសណ្ដែក ហើយបើទោះបីជាទំហំនៃផលប៉ះពាល់មានច្រើនម៉ឺនហិកតា តែបើគិតពីទំហំនៃការខូចខាតគឺមិនដល់១០%នោះទេ។

ជាមួយគ្នានេះ ឯកឧត្តម ងិន ឆាយ ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានកសិកម្ម បានឲ្យដឹងថា ក្រោយពីក្រសួងបានបញ្ចប់នូវការកំចាត់ដង្កូវហ្វូងរួចមក នៅក្នុងពេលថ្មីៗក៏មានប្រភេទរុយស បាននិងកំពុងបំផ្លាញដំណាំស្រូវរបស់កសិករនៅក្នុងខេត្តចំនួន៥ គឺខេត្តតាកែវ ព្រៃវែង ស្វាយរៀង កណ្ដាល និងខេត្តត្បូងឃ្មុំ ដែលផលប៉ះពាល់មានជាង៥ម៉ឺនហិកតា តែការខូចខាតមានទំហំតូចនៅឡើយ ហើយភាគច្រើនគឺនៅខេត្តព្រៃវែង។ ឯកឧត្តមបញ្ជាក់ថា ការរាតត្បាតរបស់ពពួកសត្វចង្រៃទាំងនោះ មានស្ថានភាពអាចគ្រប់គ្រងបាន មិនទាន់ធ្លាក់ក្នុងសភាពធ្ងន់ធ្ងរគួរឱ្យព្រួយបារម្ភនោះទេ៕