អត្ថបទ៖ កែវរតនៈ

លោក នៅ ភារុណ ហៅភា ប្រជាកសិករដែលដាំទុរេន នៅក្នុងភូមិដំបងរំពាក់ ឃុំវាលម្លូរ ស្រុកពញាក្រែក ខេត្ត​​ត្បូងឃ្មុំ បានប្រាប់បៃតងប៉ុស្តិ៍ថា លោកបានដាំដំណាំធុរេនចំនួន២០០ដើមលើផ្ទៃដីទំហំ១,៥ ហិចតារ​យៈ៧ឆ្នាំមកហើយ ប៉ុន្តែទើបតែប្រមូលផលបាន២ឆ្នាំប៉ុណ្ណោះ។ លោកបន្តថា រដូវកាលណាដែលទិន្នផលល្អលោកអាចប្រមូលផលបាន៤០ទៅ៥០ផ្លែក្នុង១ដើមដោយក្នុងមួយផ្លែទម្ងន់ចន្លោះ២គីឡូក្រាម ហើយធុរេននេះគឺចាប់​​ប្រមូលផលបានក្នុងចុងខែឧសភា​រហូតដល់អំឡុងខែមិថុនា។ លោកអះអាងថា ធុរេនរបស់គាត់គឺដាំរបៀបធម្មជាតិមិនមានប្រើជីគីមី និងមិនបាញ់ថ្នាំលើផ្លែដើម្បីឱ្យឆា​ប់ធំនោះទេ។ លោកបន្ថែមថា បើជាទុរេន​​​​នៅឆ្នាំ២០២៤នេះកាន់មានតម្លៃថោកជាងឆ្នាំមុនៗ​ពោលគឺមានតម្លៃតែជាង ១ម៉ឺនរៀលក្នុង១គីឡូ​ក្រាម​​​​ក្តី ក៏លោកនៅតែបន្តដាំបន្ថែមដោយសង្ឃឹមថាទិន្នផលទុរេនរបស់លោកនឹងបានទិន្នផលខ្ពស់ជាមុននៅឆ្នាំក្រោយៗព្រមទាំងមានតម្លៃសមរម្យជាងនេះ។ យ៉ាងនេះក្តីលោកបង្ហាញភាពជឿជាក់ថា អ្នកដែលបានភ្លក់ទុរេនរបស់លោកហើយ​នឹងពេញចិត្តពោលគឺរសជាតិឆ្ញាញ់ជាងទុរេនដែលនាំចូលពីបរទេស។

អ្នកស្រី វាន់ វីដា គឺជាអ្នកប្រមូលទិញទុរេនពីចម្ការរបស់លោក នៅ ភារុណ។ អ្នកស្រីបានឱ្យដឹងថា អតិថិជនដែលបានទិញទុរេនដែលចេញពីចម្ការរប​ស់លោក នៅ ភិរុណ យកទៅហូបហើយគឺចង់ទិញយកទៅហូបទៀតដោយសារតែទុរេនគាត់មានរសជាតិផ្អែម ស្រួយ ល្មួតព្រោះគាត់មិនប្រើប្រាស់ជីគីមីក្នុងការដាំដុះ    នេះជាមូលហេតុដែលគាត់តែងតែមកប្រមូលទិញធុរេនពីចម្ការរបស់លោក។ អ្នកស្រីបន្តថា សម្រាប់រដូវកាលដែលទុរេនប្រមូលផលនៅកម្ពុជាគឺចាប់ពីខែមីនារហូតដល់ខែមិថុនាគឺទុរេនដែលដាំដុះនៅខេត្តកំពត អាចប្រ​មូលផលបាននិងបន្ទាប់មកទៀតគឺទុរេននៅទឹកដីខេត្តកំពង់ចាម ត្បូងឃ្មុំ និងចុងក្រោយគេគឺទុរេនដែលមកពីខេត្តពោធិ៍សាត់។

លោក ឡៃ រ៉ា ជំទប់ទី១ឃុំវាលម្លូរ ស្រុកពញាក្រែក ខេត្តត្បូងឃ្មុំ មានប្រសាសន៍ថា ក្នុងឃុំវាលម្លូរគឺជាភូមិ​សាស្ត្រ​ដែលមានដីក្រហម ហើយមានដំណាំចំបងចំនួន៤ គឺ​កៅស៊ូ ស្វាយចន្ទី ម្រេច និងទុរេនដែលប្រជាសិករជ្រើសរើសក្នុងការដាំដុះក្នុងនោះកសិករដែលដាំដុះទុរេនប្រមាណ២០គ្រួសារដោយក្នុងមួយគ្រួសារមានទំហំដីដែលដាំទុរេនចាប់ពី១,៥ រហូត៥ហិចតា។ លោក​​បន្តថា កសិករបានចាប់ផ្ដើមដាំពីឆ្នាំ២០១៣ ហើយក៏មានះកសិករបន្តដាំដំណាំនេះជាបន្តបន្ទាប់រហូតមកដល់ពេលនេះ។

គួរបញ្ជាក់ថា មួយរយៈចុងក្រោយនេះទុរេនគឺជាផ្លែឈើ ដែលអតិថិជននិយមបរិភោគបើទោះជាផ្លែឈើប្រភេទ​​នេះហាក់មានតម្លៃថ្លៃជាងផ្លែឈើមួយចំនួនទៀតក្តី៕