អត្តបទ៖យូ វាសនា

ក្នុងកិច្ចប្រជុំសហគមន៍កសិកម្មទំនើប នៅទីស្តីការក្រសួងកសិកម្ម រុក្ខាប្រមាញ់ និងនេសាទកាលពីរសៀលថ្ងៃទី១៥ ខែឧសភា ឆ្នាំ២០២៤ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មាន​ប្រសាសន៍ថា សហគមន៍កសិកម្មទំនើប គឺជំរុញធ្វើយ៉ាងណាឱ្យសហគមន៍មានការធ្វើផលិតកម្មធំរួម ដាក់ដី និងទុនរួមគ្នា ដើម្បីទទួលបានផលចំណេញទាំងអស់គ្នា ដោយមិនប្រកួតប្រជែងគ្នាឡើយ។

ឯកឧត្តមរដ្ឋមន្ត្រី បានណែនាំឱ្យកែលម្អសហគមន៍នូវចំណុចខ្វះខាតឱ្យមានភាពល្អរឹងមាំ និងបន្តអ្វីដែលជាភាពខ្លាំងរបស់ពួកគាត់ លើគ្រប់អនុវិស័យទាំងអស់ទាំងកសិកម្ម ព្រៃឈើ ជលផល សត្វ និងកៅស៊ូ ដែលអាចជួយឱ្យសហគមន៍ប្រែក្លាយរូបរាងទៅជាលក្ខណៈក្រុមហ៊ុនមួយពេញលក្ខណៈ ដោយផ្តោតសំខាន់លើគុណភាព មានទីផ្សារ មានតម្លៃបន្ថែមខ្ពស់ មានខ្សែច្រវាក់តម្លៃល្អ ផ្តល់ផលចំណេញ និងមានប្រសិទ្ធភាពសេដ្ឋកិច្ចពិតប្រាកដ។

បើតាម ឯកឧត្តម ឌិត ទីណា ក្នុងនាមថ្នាក់ដឹកនាំត្រូវយល់ឱ្យបានច្បាស់អំពីគោលនយោបាយអាទិភាពវិស័យកសិកម្ម ទើបអាចពន្យល់ដល់សហគមន៍ចំគោលដៅ និងមានប្រសិទ្ធភាព។ លើសពីនេះទៀត ក្រុមការងារត្រូវពិនិត្យឱ្យបានគ្រប់ជ្រុងជ្រោយ និងស៊ីជម្រៅ ធ្វើយ៉ាងណាឱ្យកសិករចេះធ្វើការរួមគ្នា សហការគ្នាល្អ ដើម្បីជួយឱ្យមានការវិនិយោគពិតរីកចម្រើនទាំងអស់គ្នា និងមិនមានការយល់ខុសបន្តទៀតលើរដ្ឋាភិបាល។ ឯកឧត្តមបានបញ្ជាក់បន្ថែមថា ក្រសួងមិនលុបបំបាត់សហគមន៍ចាស់ទេ តែត្រូវធ្វើលើអ្វីដែលមានស្រាប់ ហើយប្រែក្លាយមកជាសហគមន៍កសិកម្មទំនើប ដូច្នេះត្រូវពិនិត្យ និងជំរុញឱ្យចេញជារូបរាង ដោយគិតផលសេដ្ឋកិច្ចជាធំ។

លោក ស្រុយ កុងធាងអនុប្រធានសមាគមស្វាយចន្ទីកម្ពុជាបានប្រាប់បៃតងប៉ុស្តិ៍ថា ការលើកឡើងរបស់រដ្ឋមន្ត្រីក្រសួងកសិកម្មនេះគឺពិតជាល្អ ហើយប្រសិនបើមានការចូលរួមពីកសិករគឺល្អ និងអាចធ្វើអោយជីវភាពរបស់កសិករមានភាពប្រសើរឡើង។ អ្វីដែលសំខាន់លោកថា តើកសិករ នឹងចូលរួមឬទេ ដែលនេះទាមទារឱ្យមានការពន្យល់ដល់កសិករពីសំណាក់ក្រសួងកសិកម្ម និង ភាគីពាក់ព័ន្ធឱ្យបានដឹងច្បាស់លាស់។

កន្លងមកឯកឧត្តម  ឌិត ទីណា បានមានលើកថាការបង្កើតសហគមន៍កសិកម្មទំនើប គឺជាគោលនយោបាយអាទិភាពរបស់ក្រសួងកសិកម្ម និងរបស់រាជរដ្ឋាភិបាលកម្ពុជា ក្នុងវិស័យកសិកម្ម ៕